ខេត្តព្រះសីហនុ ៖ លោកឧត្តមសេនីយ៍ទោជួន ណារិន្ទ ស្នងការនគរបាលខេត្តព្រះសីហនុ បានឲ្យដឹងថា នគរបាលបង្ក្រាបបានហើយ ករណី លួចមានស្ថានទម្ងន់ទោស(ប្លន់) និង ប៉ុនប៉ងប្រព្រឹត្តបទល្មើស ដែលជនសង្ស័យបានប្រព្រឹត្ត តាំងពីយប់ថ្ងៃទី ១០ ខែមីនា ឆ្នាំ២០២០ នៅចំណុចហាងឈ្មោះ ជៀហុង ស្ថិតក្នុងភូមិ៦ សង្កាត់៤ ក្រុង-ខេត្តព្រះសីហនុ ដោយមានក្រុមជនសង្ស័យចំនួនមានគ្នា ៦នាក់ បានចូលបន្លំខ្លួនធ្វើជាអ្នកមកទិញទំនិញ ឆ្លៀតពេលមានឱកាសល្អ ក្រុមជនសង្ស័យបានយកស្ព្រៃបាញ់ភ្នែកជនរងគ្រោះ ព្រមទាំងវាយធ្វើទារុណកម្ម ហើយបានប្លន់យកប្រាក់ និងសម្ភារមួយចំនួន រួចគេចខ្លួនបាត់អស់ ហើយនៅពេលសមត្ថកិច្ចបង្ក្រាបបាន៤នាក់ និង២នាក់ទៀតកំពុងគេចខ្លួន ។
បើតាមរបាយការណ៍របស់ស្នងការដ្ឋាននគរបាលខេត្តព្រះសីហនុ នៅថ្ងៃទី៣ខែមិថុនាឆ្នាំ២០២០នេះ បានបញ្ជាក់ថា នៅថ្ងៃទី១០ ខែមីនា ឆ្នាំ២០២០ វេលាម៉ោង២១និង៤៧នាទី នៅចំណុចហាងឈ្មោះ ជៀហុង ស្ថិតក្នុងភូមិ៦ សង្កាត់៤ ក្រុង-ខេត្តព្រះសីហនុ មានក្រុមជនសង្ស័យចំនួន៦នាក់ បានចូលបន្លំខ្លូនធ្វើជាអ្នកមកទិញទំនិញ ឆ្លៀតពេលមានឱកាសល្អ ក្រុមជនសង្ស័យបានយកស្ព្រៃបាញ់ភ្នែកជនរងគ្រោះ ព្រមទាំងវាយធ្វើទារុណកម្ម ហើយបានប្លន់យកប្រាក់ និងសម្ភារមួយចំនួន រួចគេចខ្លួនបាត់អស់ ។ ឆ្លងតាមការស្រាវជ្រាវយ៉ាងយកចិត្តទុកដាក់ កម្លាំងជំនាញការិយាល័យនគរបាលព្រហ្មទណ្ឌកម្រិតស្រាល កំណត់បានអត្តសញ្ញាណជនសង្ស័យ ។ រហូតដល់ថ្ងៃទី២៩ ខែឧសភា ឆ្នាំ២០២០ វេលាម៉ោង ២៣ និង០០នាទី សមត្ថកិច្ចយើងបានចាប់ខ្លួនក្រុមជនសង្ស័យចំនួន ៤នាក់ (ខ្មែរ១នាក់ និងចិន៣នាក់) ខណៈជិះរថយន្ត១គ្រឿងម៉ាក TOYOTO PRIUS ពណ៌ទឹកប្រាក់ (ប្រើដីឥដ្ឋមកបិទផ្លាកលេខរថយន្ត) នៅចំណុចផ្លូវអូរ៣ ស្ថិតនៅ ភូមិ៥ សង្កាត់៤ ក្រុង-ខេត្តព្រះសីហនុ ។
នគរបាល បានបន្តថា ជនរងគ្រោះឈ្មោះ Zheng WenJin ភេទប្រុស អាយុ ៣០ឆ្នាំ មុខរបរ អ្នកគ្រប់គ្រង មានទីលំនៅភូមិ៦ សង្កាត់៤ ក្រុង-ខេត្តព្រះសីហនុ ។
ចំណែកជនសង្ស័យចំនួន ៤នាក់ មានដូចខាងក្រោម៖ ១-ឈ្មោះ ជា លក្ខណៈបញ្ញា ភេទប្រុស អាយុ ២០ឆ្នាំ ជនជាតិខ្មែរ (ចេះភាសាចិន) មុខរបរ មិនពិតប្រាកដ មានទីលំនៅ សង្កាត់ច្បារអំពៅ ខណ្ឌច្បារអំពៅ រាជធានីភ្នំពេញ (ចារីដៃដល់ ប្លន់)។ ២-ឈ្មោះ YUE MING WEI ភេទប្រុស អាយុ ៣១ឆ្នាំ ជនជាតិចិន មុខរបរ ឈ្មួញកណ្តាល កាន់លិខិតឆ្លងដែនលេខ (គ្មាន) មានទីលំនៅ ភូមិ១ សង្កាត់៤ ក្រុង-ខេត្តព្រះសីហនុ (ចារីដៃដល់ ប្លន់)។ ៣-ឈ្មោះ LIU JIE ភេទប្រុស អាយុ ៣១ឆ្នាំ ជនជាតិចិន មុខរបរ អ្នកគ្រប់គ្រងកាស៊ីណូ ហ៊ួយហ័រ កាន់លិខិតឆ្លងដែនលេខ (គ្មាន) មានទីលំនៅ ភូមិ១ សង្កាត់៤ ក្រុង-ខេត្តព្រះសីហនុ (ប៉ុនប៉ងចាប់ជម្រិត)។ ៤-ឈ្មោះ ZENG WEI XING ភេទប្រុស អាយុ ៣៣ឆ្នាំ ជនជាតិចិន មុខរបរ មិនពិតប្រាកដ កាន់លិខិតឆ្លងដែនលេខ (គ្មាន) មានទីលំនៅ ភូមិ១ សង្កាត់៤ ក្រុង-ខេត្តព្រះសីហនុ (ប៉ុនប៉ងចាប់ជម្រិត)។ វត្ថុតាងចាប់យកបានរួមមាន៖ កាំបិតស្នៀត ១ដើម ស្នាប់ដៃ ១ កូនសោខ្នោះ ២ ទូរស័ព្ទដៃចំនួន ៤គ្រឿង រថយន្ត ១គ្រឿង ម៉ាក TOYOTO PRIUS ពណ៌ទឹកប្រាក់ ពាក់ផ្លាកលេខ ភ្នំពេញ 2BF-2749 (ប្រើដីឥដ្ឋមកបិទផ្លាកលេខរថយន្ត) ។
ឆ្លងតាមការយកចម្លើយជនសង្ស័យ២នាក់ ១.ឈ្មោះ ជា លក្ខណៈបញ្ញា និងឈ្មោះ ZENG WEI XING បានសារភាពថាពួកវា ពិតជាបានបានចូលរួមធ្វើសកម្មភាពប្លន់ នៅថ្ងៃទី ១០ ខែមីនា ឆ្នាំ២០២០ វេលាម៉ោង ២១ និង៤៧នាទី នៅចំណុចហាងឈ្មោះ ជៀហុង ស្ថិតក្នុងភូមិ៥ សង្កាត់៤ ក្រុង-ខេត្តព្រះសីហនុ ជាមួយបក្ខពួកជនជាតិចិន ៤នាក់ទៀតប្រាកដមែន ។ បច្ចុប្បន្នបក្ខពួកជនជាតិចិន៤នាក់ សមត្ថកិច្ចយើងកំពុងស្រាវជ្រាវ យ៉ាងយកចិត្តទុកដាក់ ដើម្បីស្វែងរកចាប់ខ្លួន មកផ្តន្ទាទោសតាមច្បាប់ ។
ជនសង្ស័យទាំង៤នាក់ខាងលើ បានសារភាពបន្ថែមទៀតថា នៅថ្ងៃទី២៩ ខែឧសភា ឆ្នាំ២០២០ វេលាម៉ោង ២៣ និង ០០នាទី ពួកវាបានប្រើប្រាស់រថយន្ត ១គ្រឿង ម៉ាក TOYOTO PRIUS ពណ៌ទឹកប្រាក់ (ប្រើដីមកបិទផ្លាកលេខរថយន្ត) ក្នុងគោលបំណងចាប់ស្រីជនជាតិចិន ១ម្នាក់ឈ្មោះ Niu Niu ជាបុគ្គលិកហាងម៉ាស្សាឈ្មោះ ជីងហាវ ម្តុំកែងតុលាការ ស្ថិតក្នុងភូមិ៣ សង្កាត់៤ ក្រុង-ខេត្តព្រះសីហនុ ដើម្បីជម្រិតទារប្រាក់ តែត្រូវសមត្ថកិច្ចឃាត់ខ្លួនបាន ។
ចំពោះជនសង្ស័យ និងវត្ថុតាង កម្លាំងការិយាល័យនគរបាលព្រហ្មទណ្ឌកម្រិតស្រាល នៃស្នងការដ្ឋាននគរបាលខេត្តព្រះសីហនុ បានកសាងសំណុំរឿងបញ្ជូនទៅសាលាដំបូងខេត្ត ដើម្បីផ្តន្ទាទោសតាមច្បាប់ ៕
ដោយ៖កូឡាប
