ភ្នំពេញ៖ មន្ត្រីរដ្ឋាភិបាលបានអះអាងថា រាជរដ្ឋាភិបាលកម្ពុជាគ្រោងនិងចុះកិច្ចព្រមព្រៀងជាមួយប្រទេសម៉ាឡេស៊ី និងកូរ៉េខាងត្បូង ស្តីពីការលុបបំចាត់ ការយកពន្ធត្រួតគ្នា ពាក់ពន្ធនឹងពន្ធលើប្រាក់ចំណូលនិងការបង្ការការគេចវេសពន្ធ និងការជៀសវាងពន្ធដើម្បីផ្តល់ទំនុកចិត្តលើអ្នកវិនិយោគនៅកម្ពុជា។
សេចក្តីព្រាងច្បាប់ស្តីពីការអនុម័តយល់ព្រមលើកិច្ចព្រមព្រៀងរវាងរាជរដ្ឋាភិបាលកម្ពុជា និងរដ្ឋាភិបាលម៉ាឡេស៊ី ក៏ដូចជាកិច្ចព្រមព្រៀង ជាមួយសាធារណរដ្ឋកូរ៉េ ស្តីពីការលុបបំបាត់ ការយកពន្ធត្រួតគ្នា ពាក់ពន្ធនឹងពន្ធលើប្រាក់ចំណូលនិងការបង្ការការគេចវេសពន្ធ និងការជៀសវាងពន្ធ។
ឯកឧត្តម កិត្តិសេដ្ឋាបណ្ឌិត ជាម យៀប សមាជិកសភា និងជាប្រធានគណៈកម្មការទី២នៃរដ្ឋសភាជាតិ បានឲ្យដឹងថា សេចក្តីព្រាងច្បាប់ទាំងពីរនេះកំពុងត្រូវបានគណកម្មការជំនាញត្រួតពិនិត្យដោយពិភាក្សាជាមួយតំណាងរាជរដ្ឋាភិបាល ដែលសេចក្តីច្បាប់នេះ បង្ហាញពីការយកចិត្តទុក លើកទឹកចិត្តអ្នកវិនិយោគបរទេស ឲ្យមានជំនឿទុកចិត្តលើរាជរដ្ឋាភិបាលកម្ពុជា ក្នុងការចូលរូមមកបណ្តាក់ទុន នៅកម្ពុជាផ្តល់ការងារដល់ប្រជាជន និងចូលរួមចំណែកជម្រុញកំណើនសេដ្ឋកិច្ច ។
អ្នកវិនិយោគម៉ាឡេស៊ី និងសាធារណរដ្ឋកូរ៉េ បាននិងកំពុងចាប់អារម្មណ៏វិនិយោគ និងធ្វើការបណ្តាក់ទុននៅក្នុងប្រទេសកម្ពុជាលើវិស័យជាច្រើន ដូចជា៖ វិស័យអចលនទ្រព្យ ឧស្សាហកម្មកាត់ដេរសំលៀកបំពាក់និងស្បែកជើង ធនាគារ និងហិរញ្ញវត្ថុនិងវិស័យទេសចរណ៏…៕ ដោយ ៖ CEN
