តាកែវ ៖ ឯកឧត្តម អ៊ូច ភា ណែនាំឲ្យក្រុមគ្រូពេទ្យត្រូវតែមានការអត់ធ្មត់ និងមានការទទួលខុសត្រូវខ្ពស់ ជាមួយនឹងអ្នកជំងឹ និងត្រូវប្រើប្រាស់ឲ្យអស់ពីសមត្ថភាព ក្នុងការព្យាបាលអ្នកជំងឹឲ្យបានធូរស្រាល ឬជាសះស្បើយ ជៀសវាងមានការប៉ះទង្គិចជាមួយនឹងការិះគន់នានា ពីសំណាក់បងប្អូនប្រជាពលរដ្ឋ ទៅក្រមសីលធម៌ឬវិជ្ជាជីវៈរបស់គ្រូពេទ្យ ។
ឯកឧត្តមអភិបាលខេត្តតាកែវ ថ្លែងបែបនេះនៅក្នុងពិធី ផ្សព្វផ្សាយនិងដាក់ឲ្យដំណើរការមន្ទីរសុខាភិបាល ស្ថិតក្រោមការគ្រប់គ្រងរបស់រដ្ឋបាលខេត្តតាកែវ នៅសាលប្រជុំសាលាខេត្តតាកែវ នៅព្រឹកថ្ងៃទី ១២ ខែមិថុនា ឆ្នាំ២០២០ ។
ឯកឧត្តម អ៊ូច ភា បានបន្តថា ជាធម្មតាក្រុមគ្រូពេទ្យប្រឈមនឹងការប៉ះទង្គិចច្រើនជាមួយនឹងអ្នកជំងឺ ទៅលើការតាមដានសុខភាព និងព្យាបាលដល់អ្នកជំងឹមួយថ្ងៃៗរាប់រយនាក់ ដែលការងារទាំងនេះ សុទ្ធសឹងតែជាការងារមួយដែលត្រូវប្រើប្រាស់ខួរក្បាលក្នុងគិត និងវិភាគលើរោគវិនិច្ឆ័យរបស់អ្នកជំងឺ ដើម្បីព្យាបាលពួកគាត់ឲ្យបានធូរស្រាល ម្លោះហើយក្នុងស្ថានភាពបែបនេះ ធ្វើឲ្យគ្រូពេទ្យមួយចំនួនទទួលរងនូវសម្ពាធតានតឹង លើការងារមួយចំនួន ហើយមកជួបជាមួយនិងសាច់ញាតិអ្នកជំងឺមានការតក់ក្រហល់ លើការស្នើសុំឲ្យគ្រូពេទ្យជួយ ធ្វើពិបាកក្នុងការនិយាយគ្នា ទើបកើតមកជាមានរឿងស្តាប់គ្នាមិនបាន និងលើកយកហេតុផលផ្សេងៗមកធ្វើការរិះគន់ដល់ក្រុមគ្រូពេទ្យ ក៏ប៉ុន្តែក្នុងមួយរយៈចុងក្រោយក្នុងអំឡុងពេលយុទ្ធនាការប្រយុទ្ធប្រឆាំងនឹងជំងឺកូវីដ១៩នេះ ក្រុមគ្រូពេទ្យទាំងអស់ ត្រូវបានលើកទឹកចិត្ត និងមានការកោតសរសើរច្រើនពីបណ្តាមហាជនទាំងអស់ ដូច្នេះក្រុមគ្រូពេទ្យត្រូវតែបន្ត និងរក្សាឲ្យបានចំពោះការកោតសរសើរនេះបន្តទៀត ជាមួយនិងការពិនិត្យនិងព្យាបាលសុខភាព ដល់បងប្អូនប្រជាពលរដ្ឋដែលមកទទួលសេវាពីមន្ទីរពេទ្យ ៕
ដោយ៖ តាកែវ
