ដូចដែលបងប្អូន ជាពិសេសអ្នកប្រើប្រាស់បណ្តាញសង្គមជាច្រើនបានស្គាល់រួចហើយ ម៉ែរួយ ជាអគ្គនាយិកាក្រុមហ៊ុន Rouy Infinity Co,.ltd មុនពេលដែលទទួលបានភាពជោគជ័យក្នុងអាជីវកម្មអនឡាញនេះ គឺអ្នកនាងបានជួបរឿងរ៉ាវ និងឧបសគ្គក្នុងខ្សែជីវិតដ៏កម្សត់ខ្លាំងណាស់ រួមជាមួយម្តាយជាស្ត្រីមេម៉ាយ និងប្អូនៗ។
ពិតមែនហើយ ក្រោយភ្លើងឆេះផ្ទះរលាយដូចអំបិលត្រូវទឹក ដែលជាកម្លាំងញើសឈាមស៊ីឈ្នួលថៅកែនៅក្នុងប្រទេសថៃ ពោលគឺដំណាក់ខ្សែជីវិតរបស់គ្រួសារអ្នកនាងនៅពេលនោះ បើទោះជាស្ទើរតែគ្មានអ្វីទាំងអស់ក៏ដោយ ក៏ម៉ែរួយ ខិតខំរកធ្វើការរកស៊ីបន្តដោយមិនបាក់ទឹកចិត្តឡើយ និងឈានទៅចាប់យកមុខរបរលក់ផលិតអនឡាញ រហូតមកទល់ពេលបច្ចុប្បន្ននេះ ម៉ែរួយ ក្លាយជាម្ចាស់ក្រុមហ៊ុនគ្រឿងសម្អាងដ៏ល្បីឈ្មោះ ដែលមានអ្នកគាំទ្ររាប់សែននាក់ និងមានលុយ ឡាន ផ្ទះវីឡាដ៏ស្គឹមស្កៃ ស្ទើរតែមិននឹកស្មាន ។
ជាមួយភាពជោគជ័យនេះផងដែរ កាលពីសប្តាហ៍មុននេះ ម៉ែរួយ ក៏បានបោះពុម្ពសៀវភៅមួយក្បាលដែលមានចំណងជើងថា៖ «សៀវភៅ១៤ថ្ងៃផ្លាស់ប្តូរជីវិតជារៀងរហូត»។ ហើយបន្ទាប់ពីនេះ ម៉ែរួយ ស្រាប់តែបង្ហោះវីដេអូមួយ បង្ហាញពីសកម្មភាពតំណាងចែកចាយរបស់ខ្លួន ចូលមកសម្តែងការដឹងគុណ ក្រាបសំពះ និងយំគ្រប់ៗគ្នា ដោយលើកឡើងថា គឺមានតែម៉ែរួយទេ ដែលអាចធ្វើឲ្យពួកគេអាចផ្លាស់ប្តូរជីវិតថ្មី ពោលគឺធ្លាប់ជាមនុស្សបាក់ទឹកចិត្ត មកក្លាយទៅជាមនុស្សមានចន្ទៈ និងគោលដៅច្បាស់លាស់៕ ដោយ៖ លឹម ហុង
