ស្ទឹងត្រែង៖ បុរសម្នាក់ត្រូវបានប៉ូលិសឃាត់ខ្លួន ពាក់ព័ន្ធករណីហិង្សាដោយប្រើកាំបិតចុងស្រួច បង្កបុរសម្នាក់ទៀតរងរបួស។
ហេតុការណ៍នេះកើតឡើងនៅភូមិវាលដេញ ឃុំអន្លង់ជ្រៃ ស្រុកថាឡាបរិវ៉ាត់ ខេត្តស្ទឹងត្រែងថ្ងៃទី 15 ខែមិថុនា ឆ្នាំ 2020។
សមត្ថកិច្ចឱ្យដឹងថា ជនសង្ស័យដែលកម្លាំងសមត្ថកិច្ចបានឃាត់ខ្លួនមានឈ្មោះ ឈុន ដាំ អាយុ៤៣ឆ្នាំ ស្នាក់នៅកន្លែងកើតហេតុខាងលើ ហើយជនរងគ្រោះមានឈ្មោះ ណៃ សេត អាយុ ៤៤ឆ្នាំ ស្នាក់នៅកន្លែងកើតហេតុខាងលើ ( របួសត្រង់ពោះ) ត្រូវបានបញ្ជូនទៅកាន់មន្ទីរពេទ្យបង្អែកខេត្ត។
បើយោងតាមចម្លើយសារភាពរបស់ជនសង្ស័យ មូលហេតុ បណ្តាលឲ្យមានហិង្សាកើតឡើងគឺដោយ សារជនរងគ្រោះដើរមកដល់កន្លែងជនសង្ស័យផឹកស្រាហើយ យកដំបងវាយលើក្បាលរបស់ជនបង្ក និងច្របាច់កជនបង្កដោយពុំដឹងមូលហេតុ ពេលនោះជនបង្កបានចាប់បោកជនរងគ្រោះទៅលើគ្រែ បណ្តាលឲ្យប៉ះទៅនឹងកាំបិតចុងស្រួចរបួសចំពោះតែម្តង។
ក្រោយកើតហេតុ កម្លាំងបានឃាត់ខ្លួនជនសង្ស័យ ទៅសាកសួររួចបញ្ជូនទៅកាន់ស្នងការដ្ឋាននគរបាលខេត្ត៕
ដោយ៖សុខុម
