មនុស្សរាប់លាននាក់នៅក្នុងទីក្រុងប៉េកាំង កំពុងរស់នៅក្រោមការរឹតបន្តឹងសារជាថ្មី ខណៈការឆ្លងវីរុសកូរ៉ូណា នៅក្នុងទីក្រុងកំពុងបន្តកើនឡើងខ្ពស់។
នៅថ្ងៃពុធនេះ ប៉េកាំងបានរកឃើញអ្នកឆ្លងវីរុសកូរ៉ូណាចំនួន ៣១នាក់បន្ថែម ធ្វើឲ្យតួលេខឆ្លងសរុបកើនដល់ ១៣៧នាក់។
មុនពេលមានការឆ្លងខ្លាំង ប៉េកាំង ដែលជារដ្ឋធានីរបស់ចិន គ្មានការឆ្លងវីរុសក្នុងស្រុករយៈពេល ៥៧ថ្ងៃជាប់គ្នា។
ការផ្ទុះវីរុសត្រូវបានគេជឿជាក់ថា កើតចេញពីផ្សារលក់ម្ហូបដ៏ធំឈ្មោះ Xinfandi ដែលផ្សារនេះផ្គត់ផ្គងសាច់ និងបន្លែចំនួន ៨០ភាគរយទៅដល់ទីក្រុង។
តំបន់យ៉ាងតិចចំនួន ២៧ត្រូវបានគេចាត់ចូលជាតំបន់មានហានិភ័យមធ្យម និងតំបន់ ១ដែលស្ថិតនៅក្បែរផ្សារនោះ ជាតំបន់មានហានិភ័យខ្ពស់ខ្លាំង។
ប្រជាជនដែលរស់នៅក្នុងតំបន់ប្រឈមមធ្យម និងខ្ពស់ មិនអាចចាកចេញពីទីក្រុងបានទេ ចំណែកប្រជាជននៅតំបន់ប្រឈមទាប អាចចាកចេញបាន ប៉ុន្តែត្រូវតែមានការធ្វើតេស្តចេញអវិជ្ជមានសិន។
ជើងហោះហើរជាច្រើន ត្រូវបានលុបចោល ចំណែកសេវាកម្មរថភ្លើង ក៏ត្រូវបានកាត់បន្ថយរហូតយ៉ាងតិច ដល់ថ្ងៃទី ៩ ខែកក្កដា។
សាលាបឋមសិក្សា មធ្យមសិក្សា និងមហាវិទ្យាល័យត្រូវបានផ្អាក ចំណែកក្រុមកីឡាមិនអាចលេងបាន ខណៈដែលអាងហែលទឹក និងកន្លែងហាត់ប្រាណត្រូវបានបិទ។
ប៉ុន្តែ ផ្លូវនៅតែបន្តបើក ហើយក្រុមហ៊ុន និងរោងចក្រ នៅតែបន្តដំណើរដដែល។
ប្រព័ន្ធផ្សព្វផ្សាយបាននិយាយថា វិរុសត្រូវបានគេរកឃើញនៅលើជ្រុញសម្រាប់ធ្វើត្រីសាលម៉ុងនាំចូល នៅផ្សារ Xinfandi។ ប៉ុន្តែអ្នកគ្រប់គ្រងផ្សារ និងមន្ត្រីប្រចាំតំបន់ផ្សេងទៀត បានធ្វើការបដិសេធការចុះផ្សាយ។
រដ្ឋាភិបាលក្រុងប៉េកាំងបាននិយាយថា អ្នកពាក់ព័ន្ធទាំងអស់ដែលនៅផ្សារនោះ នឹងមិនត្រូវបានអនុញ្ញាតិឲ្យចាក់ចេញពីទីក្រុងឡើយដោយមិនគិតពីតំបន់ដែលពួកគេរស់នៅ។
ផ្សារនោះមានមនុស្សចេញចូលរាប់ម៉ឺននាក់រៀងរាល់ថ្ងៃ។
សូមបញ្ជាក់ថា វីរុសកូរ៉ូណា បានផ្ទុះដំបូងចេញពីទីក្រុងវូហាន កាលពីចុងឆ្នាំ ២០១៩ និងបានរាតត្បាតយ៉ាងលឿនទៅកាន់ទូទាំងពិភពលោក។ បច្ចុប្បន្ន តួលេខចុងក្រោយនេះអ្នកឆ្លងវីរុសមានចំនួនជិត ៨លាននាក់ និងសម្លាប់មនុស្សជាង ៤៣៥.០០០នាក់ទូទាំងពិភពលោក៕
អត្ថបទប្រែសម្រួលដោយ៖ សុភ័ក្រ
ប្រភព៖ BBC
