ភ្នំពេញ៖ ថ្លែងក្នុងជំនួបពិភាក្សាការងារជាមួយ ឯកឧត្តម ជា ចាន់តូ ទេសាភិបាល ធនាគារជាតិនៃកម្ពុជា កាលពីថ្ងៃទី១៧ ខែមិថុនា ឆ្នាំ២០២០,ឯកឧត្តម W. Patrick Murphy ឯកអគ្គរដ្ឋទូតវិសាមញ្ញ និងពេញសមត្ថភាព នៃសហរដ្ឋអាមេរិកប្រចាំនៅកម្ពុជា បានថ្លែងកោតសរសើរ និងវាយតម្លៃខ្ពស់លើកិច្ចខិតខំប្រឹងប្រែង របស់រដ្ឋាភិបាលកម្ពុជា ក្នុងការអភិវឌ្ឍសេដ្ឋកិច្ច ជាពិសេសការដាក់ចេញវិធានការ ក្នុងការទប់ស្កាត់ការរីករាលដាលនៃជំងឺកូវីដ១៩។
លោកឯកអគ្គរដ្ឋទូតអាមេរិកថា ក្នុងការអបអរសាទរខួប៧០ឆ្នាំ នៃទំនាក់ទំនងការទូតរវាងសហរដ្ឋអាមេរិកនិងកម្ពុជា ស្ថានទូតអាមេរិកប្រចាំនៅកម្ពុជា បានរៀបចំប្រធានបទពាក់ព័ន្ធនឹងទំនាក់ទំនង រវាងប្រទេសទាំងពីរ ទៅតាមខែនីមួយៗក្នុងឆ្នាំ២០២០ រួមមាន ១/- ខែមករា៖ កសិកម្ម ២/- ខែកុម្ភៈ៖ យុវជន ការអប់រំ និងបច្ចេកវិទ្យា ៣/- ខែមីនា៖ ស្ត្រី និងសមភាពយេនឌ័រ ៤/- ខែមេសា៖ បរិស្ថាន ៥/- ខែឧសភា៖ សុខភាពសាធារណៈ ៦/- ខែមិថុនា៖ ទំនាក់ទំនងរវាងប្រជាជន ៧/- ខែកក្កដា៖ ការប្រារព្ធខួប៧០ឆ្នាំ នៃទំនាក់ទំនងការទូតរវាងប្រទេសទាំងពីរ ៨/- ខែសីហា៖ ជំនួយមនុស្សធម៌ ៩/- ខែកញ្ញា៖ ពាណិជ្ជកម្មនិងការវិនិយោគ ១០/- ខែតុលា៖ ការពង្រឹងច្បាប់ ១១/- ខែវិច្ឆិកា៖ កិច្ចសហប្រតិបត្តិការក្នុងតំបន់/អាស៊ាន និង១២/- ខែធ្នូ៖ ប្រជាធិបតេយ្យនិងសិទ្ធិមនុស្ស។
ក្នុងនោះដែរ ឯកឧត្តម ទេសាភិបាល បានសម្តែងការស្វាគមន៍ចំពោះ ឯកឧត្តម W. Patrick Murphy ដែលបានឆ្លៀតឱកាសអញ្ជើញមកធនាគារជាតិនៃកម្ពុជា និងបានជម្រាបជូនអំពីស្ថានភាពសេដ្ឋកិច្ចកម្ពុជា។ ឯកឧត្តមថា ផលប៉ះពាល់ដោយសារឥទ្ធិពល នៃការរីករាលដាលជំងឺកូវីដ១៩ បានធ្វើឱ្យសកម្មភាពសេដ្ឋកិច្ចកម្ពុជាថមថយ ជាពិសេសក្នុងវិស័យទេសចរណ៍ និងវិស័យកាត់ដេរសម្លៀកបំពាក់និងស្បែកជើង។ ទោះយ៉ាងណា វិស័យកសិកម្មនិងវិស័យធនាគារក៏នៅតែបន្តកើនឡើង។ ប៉ុន្តែក្នុងវិស័យធនាគារ ធនាគារជាតិនៃកម្ពុជា ក៏បានចាត់វិធានការជាបន្តបន្ទាប់ ដើម្បីផ្តល់លទ្ធភាពដល់គ្រឹះស្ថានធនាគារ និងហិរញ្ញវត្ថុ មានសាច់ប្រាក់ក្នុងដៃគ្រប់គ្រាន់ និងបានលើកទឹកចិត្តឱ្យគ្រឹះស្ថានធនាគារ និងហិរញ្ញវត្ថុ រៀបចំឥណទានឡើងវិញ ដើម្បីជួយសម្រាលការលំបាក របស់អតិថិជន ដែលរងឥទ្ធិពលនៃវិបត្តិសុខភាពពិភពលោក ជំងឺកូវីដ១៩។
ឯកឧត្តម ទេសាភិបាល ក៏បានជម្រាបជូនអំពី ការពង្រឹងមូលដ្ឋានគតិយុត្តិ កាតព្វកិច្ចរបស់បុគ្គលរាយការណ៍ និងចំណេះដឹងរបស់វិស័យសាធារណៈនិងឯកជន លើការប្រឆាំងការសម្អាតប្រាក់និងហិរញ្ញប្បទានភេរវកម្ម (AML-CFT) ហើយនាពេលថ្មីៗនេះ ព្រឹទ្ធសភានៃព្រះរាជាណាចក្រកម្ពុជា បានអនុម័តលើសេចក្តីព្រាងច្បាប់ ស្តីពីការប្រឆាំងការសម្អាតប្រាក់ និងហិរញ្ញប្បទានភេរវកម្ម ដែលគ្រោងនឹងដាក់ឱ្យអនុវត្តនាពេលឆាប់ៗនេះ។
ឯកឧត្តម ទេសាភិបាល ក៏បានលើកឡើងអំពីការវិវឌ្ឍនៃសេដ្ឋកិច្ចកម្ពុជា និងការស្តារ និងពង្រឹងប្រព័ន្ធធនាគារ ក្នុងរយៈពេល៤០ឆ្នាំចុងក្រោយ ក៏ដូចជាការពង្រឹងគោលនយោបាយ លើកកម្ពស់ការប្រើប្រាស់ប្រាក់រៀល។
ឆ្លៀតក្នុងឱកាសនោះ ឯកឧត្តម ទេសាភិបាល បានថ្លែងអំណរគុណ ចំពោះរដ្ឋាភិបាលអាមេរិក ដែលបានគាំទ្រនិងផ្តល់ជំនួយបច្ចេកទេស ដល់កម្ពុជា ហើយដោយឡែកនៅធនាគារជាតិនៃកម្ពុជា ជំនួយបច្ចេកទេស ពីរដ្ឋាភិបាលអាមេរិក បានរួមចំណែកក្នុងការពង្រឹងការត្រួតពិនិត្យ ការវិភាគសេដ្ឋកិច្ច និងការអភិវឌ្ឍប្រព័ន្ធរាយការណ៍ តាមអេឡិចត្រូនិក របស់អង្គភាពស៊ើបការណ៍ហិរញ្ញវត្ថុកម្ពុជា (FIU)៕
ដោយ៖CEN
