កំពង់ស្ពឺ៖ កសិករក្នុងសហគមន៍ដាំបន្លែចម្រុះ គ្មានជាតិគីមីជាយក្រុងច្បារមននៃខេត្តកំពង់ស្ពឺ បាននិងកំពុងប្រឈមនូវបញ្ហាមួយចំនួន ជាពិសេសកង្វះគ្រាប់ពូជ ដែលធ្វើឱ្យការផលិតជួបនូវការលំបាក និងថយចុះទិន្ទផលក្នុងរយៈពេលចុងក្រោយក្នុងឆ្នាំ២០២០ ពោលគឺចន្លោះខែឧសភា និងខែមិថុនា។
ប្រធានសហគមន៍កសិកម្មបន្លែចម្រុះជាយក្រុងច្បារមន លោកស្រី យូ លន់ បានមានប្រសាសន៍ថា បច្ចុប្បន្ននេះ បញ្ហាប្រឈមខ្លាំងគឺកង្វះគ្រាប់ពូជបន្លែ ដែលតែងតែនាំចូលមកពីក្រៅប្រទេសត្រូវបានខកខានដោយសារជំងឺកូវីដ-១៩ ហើយមួយផ្នែកទៀតនោះគឺការបម្រែបម្រួលអាកាសធាតុ ដោយរដូវនេះជារដូវវស្សា ស្របពេលដែលគ្មានគ្រាប់ពូជនាំចូលផងនោះ។
បច្ចុប្បន្នកសិករប្រើគ្រាប់ពូជក្នុងស្រុក ដែលមិនសូវមានគុណភាព ព្រោះតែមិនអាចនាំចូលពីក្រៅបាន ទើបការទទួលផលមិនសូវបានច្រើនដូចមុន ហើយតាមការរំពឹងទុករបស់កសិករថា នឹងអាចប្រសើរឡើងវិញក្នុងអំឡុងខែកក្កដា។
លោកស្រី បានឱ្យដឹងទៀតថា បច្ចុប្បន្នសហគមន៍មានតែក្រុមហ៊ុនជប៉ុនមួយប៉ុណ្ណោះ ដែលបានធ្វើកុងត្រាទទួលទិញកសិផល យកទៅដាក់លក់នៅផ្សារទំនើបៗនៅទីប្រជុំជន ក្រៅនោះជិត១០ អតិថិជនទៀត ជាលក្ខណៈឯកជន និងម្ចាស់ហាងលក់បន្លែសរីរាង្គ និងធម្មជាតិ ដែលទីផ្សារភាគច្រើនគឺនៅរាជធានីភ្នំពេញ និងក្រុងសៀមរាប។ រីឯក្រុងព្រះសីហនុមិនមានការបញ្ជាទិញទេមួយរយៈពេលចុងក្រោយនេះ។
គួរបញ្ជាក់ថា កសិករនៅក្នុងសហគមន៍នេះ មានចំនួន ២២០គ្រួសារ រស់នៅក្នុងស្រុកចំនួន៤ គឺស្រុកសំរោងទង ស្រុកភ្នំស្រួច ស្រុកឱរ៉ាល់ និងក្រុងច្បារមន។ បន្លែដែលសហគមន៍ដាំសព្វថ្ងៃ មានចំនួន២៤ប្រភេទ គឺមាន បន្លែស្លឹក ១០ប្រភេទ និងប្រភេទបន្លែផ្លែ ១៤ប្រភេទ។ ក្នុងនោះ ប្រភេទបន្លែស្លឹកក្នុង១គីឡូក្រាម តម្លៃពី ៤ពាន់ ទៅ៥ពាន់រៀល និងប្រភេទបន្លែផ្លែក្នុង១គីឡូក្រាម តម្លៃពី ៤ពាន់ ទៅ៦ពាន់រៀល ហើយតម្លៃនេះឡើងចុះទៅតាមរដូវកាល និងតាមការព្រមព្រៀង រវាងសហគមន៍ និងក្រុមហ៊ុន៕
ដោយ៖CEN
