ភ្នំពេញ៖ ការអភិវឌ្ឍន៍នៅតែបន្ត ចរាចរណ៍លើដងផ្លូវត្រូវតែមានសុវត្ថិភាព។ អភិបាលរាជធានីភ្នំពេញកំពុង ដើម្បីស្វែងរកដំណោះស្រាយ និងបញ្ចៀសគ្រោះថ្នាក់ចរាចរណ៍ដែលអាចនឹងកើតមានឡើងជាយថាហេតុ ដែលបង្កដោយរថយន្តធំៗដឹកទំនិញ និងរថយន្តដឹកដី។ សូមបញ្ជាក់ថានៅតាមបណ្ដោយផ្លូវ 60 ម៉ែត្របានបង្កឲ្យមានគ្រោះថ្នាក់ចរាចរណ៍ជាច្រើនករណីដែលបង្កឡើងដោយរថយន្តដឹកខ្សាច់ ដឹកដីនិងដឹកទំនិញធុនធំតូចក្នុងនោះបណ្ដាលឱ្យជនរងគ្រោះស្លាប់និងរបួសជាច្រើននាក់ដែលជាក់ស្ដែងក្នុងពេលថ្មីៗនេះរថយន្តដឹកខ្សាច់បានបើកបុកម៉ូតូមួយគ្រឿងពេលកំពុងឈប់រង់ចាំភ្លើងស្តុបបណ្តាលឱ្យអ្នកបើកម៉ូតូម្នាក់ស្លាប់យ៉ាងអាណោចអាធ័មហើយរថយន្តដឹកខ្សាច់បានបើករត់គេចបាត់។
នារសៀលថ្ងៃសុក្រ ថ្ងៃទី១៩ ខែមិថុនា ឆ្នាំ២០២០នេះ រដ្ឋបាលរាជធានីភ្នំពេញបានបើកកិច្ចប្រជុំស្ដីពីស្ថានភាពនៃចរាចររថយន្តដឹកដីតាមបណ្ដោយមហាវិថី សម្ដេចតេជោ ហ៊ុន សែន ក្នុងភូមិសាស្ត្រខណ្ឌមានជ័យ ខណ្ឌដង្កោ រាជធានីភ្នំពេញ ក្រោមអធិបតីភាពឯកឧត្ដម ឃួង ស្រេង អភិបាល នៃគណៈអភិបាលរាជធានីភ្នំពេញ ដើម្បីស្វែងរកដំណោះស្រាយ និងបញ្ចៀសគ្រោះថ្នាក់ចរាចរណ៍ដែលអាចនឹងកើតមានឡើងជាយថាហេតុ ដែលបង្កដោយរថយន្តធំៗដឹកទំនិញ និងរថយន្តដឹកដី ក្នុងការចាក់បំពេញតំបន់អភិវឌ្ឍន៍មួយចំនួនក្នុងតំបន់នោះ។ ដើម្បីកុំឱ្យមានការរាំងស្ទះនឹងការអភិវឌ្ឍ ត្រូវប្ដូរពីការដឹកដីតាមរថយន្ត មកជីកកប់បំពង់ទុយោក្រោមដីមកចាក់បំពេញវិញ ហើយចំពោះរថយន្តដឹកទំនិញត្រូវអនុវត្តតាមសារាចរណែនាំរបស់រដ្ឋបាលរាជធានីភ្នំពេញ ក្នុងការដឹកទំនិញចូលរាជធានីភ្នំពេញ។
ឯកឧត្ដមឃួង ស្រេង បានអះអាងថា អាជ្ញាធរមិនហាមឃាត់ការចាក់ដី ចាក់ខ្សាច់ នៅតំបន់អភិវឌ្ឍន៍ជើងឯកនោះទេ ប៉ុន្ដែគ្រាន់តែបង្វែរទិសចរាចរណ៍ សម្រាប់រថយន្ដដឹកដី ដឹកខ្សាច់កុំឲ្យធ្វើចរាចរណ៍លើកំណាត់ផ្លូវ៦០ម៉ែត្រ ជាបណ្ដោះអាសន្នសិន។
អភិបាលរាជធានីភ្នំពេញ បានបញ្ជាក់ថា ការដាក់ចេញវិធានការនេះ គឺដោយសារតែកន្លងមកសង្កេតឃើញថា ការដឹកដី ដឹកខ្សាច់ កាត់ផ្លូវនេះបានបង្កឲ្យប្រឡាក់ នៅលើទ្រូងផ្លូវ កកស្ទះចរាចរណ៍ គ្រោះថ្នាក់ចរាចរណ៍ និងធ្វើឲ្យខូចផ្លូវផងដែរដូច្នេះ អាជ្ញាធរត្រូវតែមានវិធានការដើម្បីរក្សាផ្លូវនេះ ឲ្យនៅតែល្អស្អាតជានិច្ច ខណៈដែលកំណាត់ផ្លូវនេះ កន្លងមកត្រូវបានសម្ដេចតេជោ ហ៊ុន សែន មានប្រសាសន៍ថា ផ្លូវនេះជាផ្លូវដែលអាចឲ្យយន្តហោះចុះចតបាន។
ពាក់ព័ន្ធនឹងវិធានការខាងលើនេះ ឯកឧត្ដម ឃួង ស្រេង បានឲ្យដឹងទៀតថា មុននឹងមានវិធានការណ៍បិទការធ្វើចរាចរណ៍សម្រាប់រថយន្តដឹកដី ដឹកខ្សាច់ នៅលើកំណាត់ផ្លូវ៦០ម៉ែត្រនេះ អាជ្ញាធរត្រូវកោះប្រជុំជាមួយម្ចាស់អាជីវកម្មទាំងអស់ ដើម្បីណែនាំឲ្យពួកគាត់បានដឹង និងត្រៀមបង្វែរពីការចាក់ដី ទៅជាការជីកដាក់បំពង់ទុយោ ដើម្បីបូមខ្សាចដាក់ចូលតំបន់ខាងលើនេះវិញ ដោយនឹងទុករយៈពេលឲ្យពួកគាត់ពី១ខែ ទៅ២ខែ ដើម្បីជីកដាក់បំពង់ទុយោនេះ។
ជាមួយគ្នានេះ លោកឧត្តមសេនីយ៍ទោ ចេវ ហាក់ ស្នងការរងនគរបាលរាជធានីភ្នំពេញ បានបញ្ជាក់ថា ក្នុងរយៈពេល៥ខែ ឆ្នាំ២០២០នេះ នៅតាមបណ្ដោយផ្លូវ៦០ម៉ែត្រ រថយន្តដឹកដី ដឹកខ្សាច់នេះ បានបង្កគ្រោះថ្នាក់ចរាចរណ៍សម្លាប់ប្រជាពលរដ្ឋ ៥នាក់ របួសធ្ងន់៧នាក់ និងស្រាល២នាក់៕ ដោយ៖កូឡាប
