ភ្នំពេញ៖ នៅថ្ងៃទី ២ ខែកក្កដា ឆ្នាំ២០២០ កម្លាំងសមត្ថកិច្ច របស់ គណៈម្មាធិការប្រយុទ្ធប្រឆាំងផលិតផលក្លែងក្លាយ (គ.ប.ផ.ក) បានចុះបង្ក្រាបទីតាំងសិប្បកម្ម លីងកាហ្វេ និងសណ្តែក យីហោ ឈ្មោះថុន ណាត ដែលអន់គុណភាព និងខុសច្បាប់ ស្ថិតនៅភូមិត្រពាំងខ្ទឹម ឃុំក្រាំងម្កាក់ ស្រុកអង្គស្នួល ខេត្តកណ្តាល ។
ការចុះបង្ក្រាបនេះ មានការសម្របសម្រួលដោយលោក ឯក ស៊ុន រស្មី ព្រះរាជអាជ្ញារង នៃអយ្យការអមសាលាដំបូងខេត្តកណ្តាល និងមានការចូលរួមពីសមត្ថកិច្ចពាក់ព័ន្ធ អាជ្ញាធរដែនដី និងតំណាងមន្ទីរឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ខេត្តកណ្តាល។
ក្រោយពីការចុះត្រួតពិនិត្យ គណៈកម្មាធិការអន្តរក្រសួង របស់ គ.ប.ផ.ក. បានរកឃើញផលិតផលអន់គុណ និងខុសច្បាប់ជាច្រើនមុខរួមមាន ៖
១-គ្រាប់សណ្តែកសៀង ចំនួន៦០បាវ, ២-គ្រាប់កាហ្វេលេខ១ ចំនួន០៦បាវ, ៣-គ្រាប់កាហ្វេលេខ២ ចំនួន១០បាវ, ៤-កាហ្វេលីងរួច ចំនួន០៦បាវ, ៥-ម៉ាស៊ីនលាយប៊ឺ ចំនួន០១គ្រឿង, ៦-ម៉ាស៊ីនលាយស្ករ ចំនួន០១គ្រឿង, ៧-កាហ្វេច្រកជាកញ្ចប់រួច ចំនួន៣០កញ្ចប់, ៨-ប៊ឺរ ចំនួន០៦ធុង, ៩-មេក្លិនសំរាប់លាយកាហ្វេ ចំនួន១២ធុង, ១០-ទឹកត្រី ចំនួន០៣កាដុង, ១១-ស្រាស ចំនួន ០១កាន, កាហ្វេផលិតរួច ចំនួន ១៤កញ្ចាប់ (កាហ្វេខ្មែរធម្មជាតិ) ។ ក្នុងនោះក៏មានគ្រឿងសម្រាប់លាយកាហ្វេមួយចំនួន៖ ប៊ឺរ, ទឹកស្ករ CARAMEL, មេក្លិនសម្រាប់លាយកាហ្វេ, ល័ក្ខពណ៌, ស្ករស, អំបិល, ទឹកត្រី, ស្រាស, ប៊ីចេង, ទឹក,ដោះគោ, សណ្តែកសៀង។
ក្រោយពីការត្រួតពិនិត្យរួច សមត្ថកិច្ចចម្រុះ អន្តរក្រសួង របស់ គ.ប.ផ.ក ពិនិត្យឃើញថាទីតាំងសិប្បកម្ម
លីងកាហ្វេ និងសណ្តែកនេះមានកំហុសជាច្រើន៖ មិនមានលើកស្លាកយីហោ ពុំមានចុះបញ្ជីផលិតផល(ចបផ) គ្មានវិញ្ញាបនបត្រត្រួតពិនិត្យគុណភាព នៅលើសម្បកវិចខ្ចប់កាហ្វេមិនមានដាក់អាសយដ្ឋាន និងរបៀបប្រើប្រាស់ នៅលើសម្បកវេចខ្ជប់កាហ្វេដាក់កាហ្វេសុទ្ធ១០០% ដែលនៅក្នុងការវេចខ្ជប់នោះលាយសារធាតុផ្សំជាច្រេីន និងទីតាំងគ្មានអនាម័យ។
ក្រៅពីសម្ភារវត្ថុតាងខាងលើនេះ សមត្ថកិច្ចពុំបានដកហូត រឺធ្វើឲ្យខូចខាតរបស់របរអ្វីទេ ហើយព្រះរាជអាជ្ញាបានអនុញ្ញាតឲ្យ សមត្ថកិច្ចចម្រុះ ឃ្លុំបេបិទទីតាំង និងអញ្ជើញម្ចាស់ទីតាំងខាងលើមកបំភ្លឺពាក់ពន្ធ័ករណីខាងលើ នៅលេខាធិការដ្ឋាន នៃគ.ប.ផ.ក. ដើម្បីអនុវត្តតាមនីតិវិធី នៃច្បាប់ ជាបន្ត៕ ដោយ៖កូឡាប
