ប៉ូលិសហុងកុង នៅថ្ងៃសុក្រនេះបាននិយាយថា ពួកគេបានចាប់ខ្លួនមនុស្សចំនួន ៧នាក់ ដោយសារបានជួយដល់បុរសង្ស័យម្នាក់ ដែលបានចាក់មន្ត្រីម្នាក់ នៅក្នុងអំឡុងការតវ៉ាប្រឆាំងនឹងច្បាប់សន្តិសុខ កាលពីថ្ងៃទី ១ ខែកក្កដា។
អាជ្ញាធរចាប់ខ្លួនបុរស ៥នាក់ និងស្ត្រី ២នាក់ អាយុចន្លោះ ២៤ និង ៧១ឆ្នាំ ពីបទសង្ស័យមួយចំនួន រួមមានការជួយទិញសំបុត្រយន្តហោះឲ្យជនសង្ស័យ និងរៀបចំដឹកជញ្ជូនបុរសនោះទៅកាន់ព្រលាន។
មន្ត្រីប៉ូលិសជាន់ខ្ពស់ម្នាក់ឈ្មោះ Yua Kin-hung បាននិយាយថា “ពួកយើងបដិសេធថា មនុស្សជាច្រើននាក់ទៀតនឹងត្រូវចាប់ខ្លួននោះទេ”។
សូមរំលឹកថា កាលពីថ្ងៃទី ២ ខែកក្កដា ប៉ូលិសបានចាប់បុរសវ័យ ២៤ឆ្នាំម្នាក់នៅព្រលានយន្តហោះពីបទសង្ស័យបានចាក់ និងធ្វើឲ្យរបួសមន្ត្រីប៉ូលិសម្នាក់អំឡុងមានការតវ៉ា ក្រោយពេលច្បាប់សន្តិសុខសម្រាប់ហុងកុងត្រូវបានដាក់ឲ្យប្រើ។
កាលពីសប្តាហ៍មុន រដ្ឋាភិបាលចិនបានអនុម័តច្បាប់សន្តិសុខសម្រាប់ហុងកុង ដែលច្បាប់នោះនឹងធ្វើការដាក់ទោសទណ្ឌ រហូតដល់ជាប់គុកមួយជីវិត ទៅលើអ្វីដែលរដ្ឋាភិបាលមើលឃើញថា ជាសកម្មភាពផ្តាច់ខ្លួន ភេរវកម្ម វិទ្ធង្សនា និងការឃុបឃិតជាមួយកងកម្លាំងបរទេស។
ទីក្រុងហុងកុង ត្រូវបានអង់គ្លេសប្រគល់ទៅឲ្យចិនវិញ កាលពីថ្ងៃទី ១ ខែកក្កដា ឆ្នាំ ១៩៩៧ ក្រោមកិច្ចព្រមព្រៀងមួយ ដែលផ្តល់សេរីភាព និងស្វ័យភាពកម្រិតខ្ពស់ដល់ទីក្រុងហុងកុងរយៈពេល ៥០ឆ្នាំ។ ហុងកុងជាផ្នែកមួយរបស់ចិន ប៉ុន្តែហុងកុងមានប្រព័ន្ធដឹកនាំដោយឡែកពីចិន។
ការដាក់ច្បាប់សន្តិសុខរបស់ចិនទៅលើហុងកុង ត្រូវបានគេមើលឃើញថា វានឹងធ្វើឲ្យហុងកុងបាត់បង់ស្វ័យភាពកម្រិតខ្ពស់។
អាមេរិចបានប្រកាសថា ទីក្រុងហុងកុងលែងមានស្វ័យភាពពីចិនទៀតហើយ ខណៈដែលអង់គ្លេសប្រកាសផ្តល់សញ្ជាតិអង់គ្លេស ដល់ប្រជាជនហុងកុងជាង ៣លាននាក់ដែលមានលិខិត្តឆ្លងដែន ៕
អត្ថបទប្រែសម្រួលដោយ៖ សុភ័ក្រ
ប្រភព៖ Reuters
