អតីតតារាងសម្តែងក្នុងភាពយន្តក្តៅសាច់ហុងកុង អ្នកស្រី Veronica Yip បានធ្វើការបញ្ជាក់ថា ប្តីមហាសេដ្ឋីរបស់អ្នកស្រីឈ្មោះ Jeffrey Wu បានក្ស័យធន់ហើយ។ ប៉ុន្តែអ្នកស្រីនិយាយថា ស្ថានភាពគ្រួសាររបស់គាត់មិនធ្ងន់ធ្ងរ ដូចសេចក្តីរាយការណ៍បានលើកឡើងឡើយ។
គ្រួសាររបស់លោក Wu រស់នៅកោះ Long Island ទីក្រុងញូវយ៉ក សហរដ្ឋអាមេរិច។
លោក Jeffrey Wu កាលពីមុនមានទ្រព្យសម្បត្តិសរុប ១ពាន់លានដុល្លា។ គាត់មានផ្សារទំនើបហុងកុងនៅអាមេរិច មានភាគហ៊ុននៅក្នុងធនាគារជាច្រើន ព្រមទាំងក្រុមហ៊ុនពាណិជ្ជកម្មយន្តហោះ និងក្រុមហ៊ុនអភិវឌ្ឍនអចលនទ្រព្យនៅក្នុងទីក្រុងញូវយ៉ក។
មានពាក្យចចាមអារ៉ាមថា លោក Wu ជួបវិបត្តិហិរញ្ញវត្ថុកាលពីឆ្នាំ ២០១៨។ ការរាតត្បាតវីរុសកូរ៉ូណា ត្រូវបានគេជឿជាក់ថាបានធ្វើឲ្យដួលរលំចក្រភពរបស់គាត់។
លោកបានដាក់ពាក្យក្ស័យធន ដែលអនុញ្ញាតិឲ្យកូនបំណុលទាំងអស់ស្នើគម្រោងរៀបផែនការជាថ្មី ដែលធ្វើឲ្យគាត់អាចសង់បំណុលដល់ម្ចាស់បំណុលទាន់ពេល ខណៈដែលធ្វើឲ្យជំនួញរបស់គាត់នៅដំណើរការបាន។
នៅពេលទាក់ទងទៅ អតីតតារាសម្តែងក្តៅសាច់រូបនោះបាននិយាយថា គាត់មិនរំពឹងថាជីវិតបែបស៊ីវិល័យរបស់គ្រួសារគាត់ផ្លាស់ប្តូរច្រើននោះទេ។
គាត់និយាយដូច្នេះថា “ដរាបណាការក្ស័យធនមិនប៉ះពាល់ដល់ជីវិត ឬការស្លាប់ វាមិនមែនជាបញ្ហាធំនោះឡើយ”។
“ការដាក់ពាក្យក្ស័យធនដើម្បីការពារខ្លួន មិនមែនមានន័យថាពួកយើងបាត់បង់អ្វីៗទាំងអស់ឡើយ។ រាល់តម្រូវការចាំបាច់ប្រចាំថ្ងៃ ចំណូល ទ្រព្យសម្បតិ្ត និងឡានរបស់ពួកយើងត្រូវបានលើកលែង”។
អ្នកស្រីបន្ថែមទៀតថា ការដាក់ពាក្យសុំក្ស័យធនគឺជាការអនុវត្តទូទៅនៅក្នុងសហរដ្ឋអាមេរិច ហើយអ្នកស្រីនិយាយថា ប្រធានាធិបតីដូណាល់ ត្រាំ ក៏ធ្លាប់ដាក់ពាក្យសុំក្ស័យធនជាច្រើនដងផងដែរ៕
អត្ថបទប្រែសម្រួលដោយ៖ សុភ័ក្រ
ប្រភព៖ CNA
