ភ្នំពេញ៖ ជនសង្ស័យម្នាក់បានធ្វើសកម្មភាពលួចម៉ូតូរបស់ស្ត្រីម្នាក់ ជិះរត់គេចតែជ្រុលចង្កូតទៅបុកជាមួយនឹងរថយន្តបណ្ដាលឲ្យដួលត្រូវបងប្អូនប្រជាពលរដ្ឋឃាត់បានប្រគល់ជូនសមត្ថកិច្ច។
ហេតុការណ៍ភ្ញាក់ផ្អើលនេះកើតឡើងនៅវេលាម៉ោង ២ និង០០ នាទីរំលងអធ្រាត្រ ឈានចូលថ្ងៃចន្ទទី១៣ ខែកក្កដា ឆ្នាំ ២០២០ នៅតាមបណ្តោយផ្លូវ ១០៨ ជិតនិងផ្សាររាត្រី ក្នុសង្កាត់វត្តភ្នំ ខណ្ឌដូនពេញ។
យោងតាមប្រភពព័ត៌មានពីកន្លែងកើតហេតុបានឲ្យដឹងថាមុនពេលកើតហេតុគេឃើញស្ត្រីខាងលើយកសំរាមចោលនៅជិតនិងផ្សាររាត្រីរួចក៏អត់បានដកសោចេញពីម៉ូតូ ។
ស្រាប់តែជនសង្ស័យខាងលើឃើញមានឱកាសរួចក៏រត់ទៅឡើងលើម៉ូតូកាច់សោបញ្ឆេះមួលហ្គែទៅមុខប្រុងជិះរត់គេចក៏ជ្រុលចង្កូតទៅបុកជាមួយនឹងរថយន្តមួយគ្រឿងដែលមិនចាំម៉ាកបណ្ដាលឲ្យដួលត្រូវបានបងប្អូនប្រជាពលរដ្ឋដេញឃាត់ខ្លួនបានភ្លាមៗរួចប្រគល់ជនសង្ស័យឲ្យទៅសមត្ថកិច្ចចាត់ការតាមច្បាប់។
ជនសង្ស័យខាងលើពុំស្គាល់ នៃអត្តសញ្ញាណនៅឡើយ។
ក្រោយពេលកើតហេតុសមត្ថកិច្ចនាំជនសង្ស័យខាងលើយកមកប៉ុស្តិ៍នគរបាលរដ្ឋបាលសង្កាត់វត្តភ្នំដើម្បីសាកសួរនាំបន្ថែម និងកសាងសំណុំរឿងដើម្បីបញ្ជូនទៅតុលាការចាត់កាទៅរតាមផ្លូវច្បាប់៕ ដោយ៖សា មេត
