ភ្នំពេញ ៖ នៅយប់ថ្ងៃចន្ទ ទី១៣ ខែមិថុនា ឆ្នាំ២០២០ វេលាម៉ោង២១ និង៣០នាទី គណៈបញ្ជាការឯកភាពខណ្ឌចំការមន ដឹកនាំដោយលោក ថេង សុថុល អភិបាលខណ្ឌចំការមន បានចុះត្រួតពិនិត្យទីតាំងអាជីវកម្មខារ៉ាអូខេចំនួន ២កន្លែង ស្ថិតនៅផ្លូវ៤៨៨ សង្កាត់ផ្សារដើមថ្កូវ ខណ្ឌចំការមន រាជធានីភ្នំពេញ។
ក្រោយពីក្រុមការងារពិនិត្យរួចមកឃើញថា ទីតាំងអាជីវកម្មខាងលើ បានបើកដំណើរការខារ៉ាអូខេជាធម្មតា។ ដូចនេះក្រុមការងារបានណែនាំឱ្យម្ចាស់អាជីវកម្មផ្អាកអាជីវកម្មជាបណ្ដោះអាសន្ន ដោយឱ្យប្រែក្លាយទីតាំងខាងលើនេះ ទៅជាភោជនីយដ្ឋានវិញ ប៉ុន្តែត្រូវមានលិខិតអនុញ្ញាតពីរដ្ឋបាលរាជធានីភ្នំពេញ ។
លោកអភិបាលខណ្ឌ បានដឹកនាំកម្លាំងចម្រុះ ចុះត្រួតពិនិត្យទីតាំងទី១ គឺក្នុងខារ៉ាអូខេ ចេ ដែលមានទីតាំង លេខ៣០ ផ្លូវ៤៨៨ សង្កាត់ផ្សារដើមថ្កូវ ខណ្ឧចំការមន រាជធានីភ្នំពេញ ឃើញថា ទីតាំងខាងលើកំពុងដំណើរការខារ៉ាអូខេ ដោយមានភ្ញៀវ ចំនួន៦៥នាក់ នារីបម្រើ ចំនួន២០៩នាក់ និងបុគ្គលិក ចំនួន ៩០នាក់ស្រី៧០នាក់ ។
បន្ទាប់មកក្រុមការងារចម្រុះបានចុះទៅត្រួតពិនិត្យទីតាំងខារ៉ាអូខេឡាស៍ ដែលមានទីតាំងលេខ១៧ ផ្លូវ៤៨៨ សង្កាត់ផ្សារដើមថ្កូវ ឃើញថា ទីតាំងខាងលើកំពុងដំណើរការខារ៉ាអូខេ ដោយមានភ្ញៀវ ចំនួន៦៤នាក់ប្រុស នារីបម្រើ ចំនួន១០០នាក់ និងបុគ្គលិកចំនួន៣៥នាក់ ស្រី២០នាក់ ៕
ដោយ៖កូឡាប