បន្ទាយមានជ័យ៖ អាជ្ញាធរថៃ បង្ហើបបង្អូចទ្វារព្រំដែនអន្តរជាតិប៉ោយប៉ែត-ខ្លងលឹកហើយ តែអនុញ្ញាតឲ្យឆ្លងដែនសម្រាប់រថយន្ត១គ្រឿង គឺជិះបានតែអ្នកបើកបរម្នាក់ និងអ្នករួមដំណើរម្នាក់ប៉ុណ្ណោះ។
លោក ង៉ោ ម៉េងជ្រួន អភិបាលរងខេត្តបន្ទាយមានជ័យ លោក គាង ហ៊ុល អភិបាលក្រុងប៉ោយប៉ែត មន្ត្រីនគរបាលអន្តោប្រវេសន៍ និងកងកម្លាំង នៅរង់ចាំត្រួតពិនិត្យ ការចេញចូលរបស់ពលរដ្ឋ និងប្រាប់ពីនិតិវិធី ដើម្បីឲ្យការធ្វើដំណើរចូលផ្សាររុងក្លឿប្រព្រិត្តទៅដោយរលូន។
លោក គាត ហ៊ុល អភិបាលក្រុងប៉ោយប៉ែត បាននិយាយថា ៖ « រដ្ឋបាលខេត្តបន្ទាយមានជ័យប្រទេសកម្ពុជា និងរដ្ឋបាលខេត្តស្រះកែវ ប្រទេសថៃ បានឯកភាពគ្នា ដើម្បីអនុញ្ញាតឱ្យបងប្អូនអាជីវករខ្មែរពិនិត្យ និងប្រមូលទំនិញរបស់ពួកគេ នៅផ្សាររុងក្លឿ ចាប់ពីថ្ងៃទី១៥ ខែកក្កដា ឆ្នាំ២០២០ តទៅ » ។
ប៉ុស្តិ៍ត្រួតពិនិត្យនឹងត្រូវបើករយៈពេល ៥ ម៉ោង ជារៀងរាល់ថ្ងៃ ចាប់ពីម៉ោង ៨ ព្រឹក ហើយមានតែរថយន្ត ចំនួន ៥០ គ្រឿង ដែលត្រូវបាន អនុញ្ញាតឆ្លងកាត់ក្នុងមួយថ្ងៃ ។ តែពេលព្រឹកនៃថ្ងៃដំបូងនេះ មានរថយន្តតែ១៨គ្រឿងប៉ុណ្ណោះបានឆ្លង ។
លោក គាត ហ៊ុល បានប្រាប់ទៀតថា ការបើកច្រកព្រំដែនជាថ្មីគឺ ដើម្បីជួយសម្រួលដល់ អាជីវករកម្ពុជា ក្នុងការនាំទំនិញរបស់ពួកគេ ត្រឡប់ពីផ្សារថៃមកប៉ោយប៉ែតវិញ ។ ពួកគេមិនត្រូវបានអនុញ្ញាតឲ្យធ្វើ សកម្មភាពអាជីវកម្មណាមួយ នៅទីផ្សារនោះទេ ។
លោកបន្តថា មុនពេលឆ្លងកាត់ព្រំដែន អ្នកអាជីវករទាំងអស់ ត្រូវអនុវត្តតាមវិធានការឱ្យបានតឹងរ៉ឹង ដើម្បីការពារការរីករាលដាល នៃមេរោគឆ្លងជំងឺកូវីដ១៩ ។ ការអនុញ្ញាតត្រូវបានផ្តល់សម្រាប់តែអាជីវករកម្ពុជាប៉ុណ្ណោះ ដែលចូលមកក្នុង គោលបំណងយកទំនិញរបស់ពួកគេ មុនពេលធ្វើដំណើរត្រឡប់ទៅប៉ោយប៉ែតវិញ ។ អាជីវករត្រូវបានរារាំង មិនឱ្យចូលរួមក្នុងការទិញ ឬ លក់ទំនិញនោះទេ។ ពួកគេ ក៏ត្រូវចុះឈ្មោះសម្រាប់ការចូលព្រំដែន ហើយអាជីវករម្នាក់ៗ អាចមកដល់តែឡានដឹកទំនិញ ដែលមានមនុស្សមិនលើសពីពីរនាក់ឡើយ ។ នៅពេលទៅដល់ទីនោះ ពួកគេនឹងឆ្លងកាត់ការត្រួតពិនិត្យសុខភាពហើយ ត្រូវ ពាក់ម៉ាសគ្រប់ពេល ។ ពួកគេនឹងត្រូវបានឃ្លាំមើលដោយអាជ្ញាធរនិងមិនអនុញ្ញាតឱ្យចាកចេញទៅណាឡើយ លើកលែងតែវិលត្រឡប់មកប៉ោយប៉ែតវិញ ។
ចំណែក លោក ង៉ោ មេងជ្រួន អភិបាលរងខេត្តបន្ទាយមានជ័យ បានស្នើដល់ភាគីថៃ បង្កើនពេលចូលទៅផ្សាររុងក្លឿរហូតដល់ម៉ោង៣ ល្ងាច ដើម្បីសម្រួលដល់ការធ្វើឯកសារ និងស្នើសុំមនុស្សលើសពីពីរនាក់ បានចូលរួមដំណើរផងដែរ។
រីឯបងប្អូនអាជីវករមានតែម៉ូតូ ក៏ស្នើសុំអន្តរាគមន៍ឲ្យពួកគេបានចេញ ចូលផងដែរ ៕
ដោយ ៖ បន្ទាយ
