ភ្នំពេញ ៖ ជនសង្ស័យម្នាក់ លួចម៉ូតូបាន៥ថ្ងៃបានយកហើយទៅលក់បញ្ជាំ ត្រូវកម្លាំងនគរបាលបង្ក្រាបឃាត់ខ្លួន។ ហេតុការណ៍នេះកើតឡើង កាលវេលាម៉ោង៥និង៣០នាទីល្ងាចថ្ងៃទី១៤ ខែ កក្កដា ឆ្នាំ ២០២០ នៅចំណុចផ្លូវភូមិក្បាលទំនប់៣ សង្កាត់បឹងទំពន់ទី២ ខណ្ឌមានជ័យ ។
ជនរងគ្រោះឈ្មោះ ភាន រ៉ូបឺត ភេទប្រុស អាយុ ១៩ ឆ្នាំ ទីលំនៅផ្ទះលេខ៥០C ផ្លូវ ៥៣BT ភូមិក្បាលទំនប់ សង្កាត់បឹងទំពុនទី២ ខណ្ឌមានជ័យ ជាម្ចាស់ម៉ូតូម៉ាកស្គុបពីពណ៌សពាក់ផ្លាកលេខបាត់ដំបង១AC-៥១៥៧ ។
លោក ឃុន ឡេង នាយប៉ុស្តិ៍រដ្ឋបាលបឹងទំពុនទី ២ បានឃាត់ជនសង្ស័យឈ្មោះ ភឹម ផាន់នី ភេទប្រុស អាយុ ២៧ ឆ្នាំ ទីលំនៅផ្ទះគ្មានលេខ ផ្លូវ៣៦BT ភូមិក្បាលទំនប់៣ សង្កាត់បឹងទំពន់ទី២ ខណ្ឌមានជ័យ រាជធានីភ្នំពេញ មុខរបរមិនពិតប្រាកដ ដោយឃាត់ជនសង្ស័យពីបទលួចម៉ូតូ ។
លោក គឹម កល្យាណ អធិការរងខណ្ឌបានបញ្ជាក់ថា កាលពីថ្ងៃទី៩ ខែកក្កដា ឆ្នាំ ២០២០ វេលាម៉ោង៦៣០នាទីល្ងាច ជនរងគ្រោះឈ្មោះ ភាន រ៉ូបឺត បានយកម៉ូតូ១គ្រឿងហុងដាស្គូបពី មកចតទុកនៅក្នុងផ្ទះលេខ ៥០C ផ្លូវ ៥៣BT ភូមិក្បាលទំនប់ សង្កាត់បឹងទំពុនទី២ ខណ្ឌមានជ័យ រាជធានីភ្នំពេញ (ចំណុចកើតហេតុ) ហើយបានចូលទៅផឹកស៊ីនៅក្នុងផ្ទះជាមួយមិត្តភក្កិ ដោយពុំបាទបិទទ្វារបងផ្ទះ និង ចាក់សោកម៉ូតូ រហូតដល់វេលាម៉ោង២៣និង៣០នាទី ថ្ងៃដដែល ជនរងគ្រោះឈ្មោះ ភាន រ៉ូបឺត បានចេញមកមើលម៉ូតូស្រាប់តែបាត់មិនឃើញ ។ លុះមកដល់ថ្ងៃទី១០ ខែកក្កដា ឆ្នាំ ២០២០ វេលាម៉ោង៩និង៣០នាទី ទើបជនរងគ្រោះឈ្មោះ ភាន រ៉ូបឺត បានមកដាក់ពាក្យបណ្តឹង នៅស្នាក់ការនគរបាលប៉ុស្តិ៍បឹងទំពុនទី២ឲ្យជួយស្រាវជ្រាវ ។ បន្ទាប់មកកម្លាំងនគរបាលប៉ុស្តិ៍បឹងទំពុនទី២ បានចុះមកពិនិត្យកន្លែងកើតហេតុ ធ្វើការស្រាវជ្រាវរហូតដល់ថ្ងៃទី១៤ ខែកក្កដា ឆ្នាំ២០២០ វេលាម៉ោង១៧និង៣០នាទី ទើបឃាត់ខ្លួនបានជនសង្ស័យម្នាក់ឈ្មោះ ភឹម ផាន់នី នៅចំណុចផ្លូវភូមិក្បាលទំនប់៣ សង្កាត់បឹងទំពន់ទី២ ខណ្ឌមានជ័យ និង ចាប់យកវត្ថុតាងម៉ូតូ១គ្រឿងហុងដាស្គូបពី ជារបស់ជនរងគ្រោះឈ្មោះ ភាន រ៉ូបឺត ដែលបាត់) ។ ចំណែកម៉ូតូរងគ្រោះ នគរបាលប៉ុស្តិ៍ប្រគល់ឲ្យម្ចាស់ប្រើប្រាស់បណ្ដោះអាសន្នសិន។ បច្ចុប្បន្នជនសង្ស័យខាងលើ នគរបាលប៉ុស្តិ៍បញ្ជូនទៅអធិការដ្ឋាននគរបាលខណ្ឌ ដើម្បីចាត់ការបន្តតាមនីតិវិធីច្បាប់ ៕ដោយ៖កូឡាប
