ភ្នំពេញ៖ តុលាការកំពូលបានប្រកាសសាលដីកាតម្កល់សេចក្តីសម្រេចរបស់សាលាឧទ្ធរណ៍ដែលអនុញ្ញាតឱ្យស៊ើបអង្កេតឡើងវិញលើអតីតអ្នកកាសែតវិទ្យុអាស៊ីសេរីពីររូបគឺលោក អួន ឈិន និងលោក យាង សុធារិន្ទ ។ តុលាការកំពូលក៏បានប្រកាសសាលដីកាករណីរបស់លោក រ៉ាត់ រ័ត្នមុន្នី អ្នកបកប្រែឱ្យទូរទស្សន៍ Russia Today ដែលកំពុងជាប់ពន្ធនាគាររយៈពេលពីរឆ្នាំ។
មជ្ឈមណ្ឌលសិទ្ធិមនុស្សបានឲ្យដឹងថា នៅព្រឹកថ្ងៃទី១៥ ខែកក្កដា ឆ្នាំ២០២០ នេះ តុលាការកំពូលបានប្រកាសសាលដីកាតម្កល់សេចក្តីសម្រេចរបស់សាលាឧទ្ធរណ៍ដែលអនុញ្ញាតឱ្យស៊ើបអង្កេតឡើងវិញលើអតីតអ្នកកាសែតវិទ្យុអាស៊ីសេរីពីររូបគឺលោក អួន ឈិន និងលោក យាង សុធារិន្ទ ពាក់ព័ន្ធនឹងបទ ផលិត និងកាន់កាប់រូបភាពអាសអាភាស តាមមាត្រា៣៩ នៃច្បាប់ស្តីពីការបង្ក្រាបអំពើជួញដូរមនុស្ស និងអំពើធ្វើអាជីវកម្មផ្លូវភេទ។
បន្ថែមពីលើករណីនេះ តុលាការកំពូលក៏បានប្រកាសសាលដីកាករណីរបស់លោក រ៉ាត់ រ័ត្នមុន្នី អ្នកបកប្រែឱ្យទូរទស្សន៍ Russia Today ដែលកំពុងជាប់ពន្ធនាគាររយៈពេលពីរឆ្នាំ បន្ទាប់ពីផ្តន្ទាទោសពីបទញុះញង់ឱ្យមានការរើសអើង ពាក់ព័ន្ធនឹងការផលិតភាពយន្តឯកសារអំពីការជួញដូរផ្លូវភេទដែលមានចំណងជើងថា «ម្តាយខ្ញុំលក់ខ្ញុំ»។ តុលាការកំពូលបានសម្រេចបញ្ជូនករណីនេះទៅសាលាឧទ្ធរណ៍ដើម្បីជំនុំជម្រះសារឡើងវិញ ៕ ដោយ៖កូឡាប
