ភ្នំពេញ៖ បុរសម្នាក់បើកម៉ូតូក្នុងល្បឿនយ៉ាងលឿនមិនប្រុងប្រយត្ន័ហើយបានគេចពីមនុស្សដើរឆ្លងផ្លូវក៏ជ្រុលទៅបុកថូផ្កានិងបង្គោលភ្លើងដែកមួយដើមបណ្ដាលអោយផុងលលាដ៍ ក្បាលស្លាប់ភ្លាមៗនៅក្នុងថ្លុកឈាម យ៉ាងអាណោចអាធម៌ ។ហេតុការណ៍គ្រោះថ្នាក់ចរាចរណ៍ដ៏រន្ធត់នេះ បានកើតឡើង នៅវេលាម៉ោង២និង៣០នាទីរំលងអធ្រាត្រឈានចូលថ្ងៃទី១២ ខែតុលា ឆ្នាំ២០១៧ នៅតាមបណ្ដោយផ្លូវជាតិលេខ២ ត្រង់ចំនុចមុខអគ្គីសនីទី២ ស្ថិតក្នុងភូមិព្រែកតាគង់ សង្កាត់ ចាក់អង្រែក្រោម ខណ្ឌមានជ័យ។
ជនរងគ្រោះដែលស្លាប់បាត់ជីតមាន ឈ្មោះ ធី ចាន់ថន ភេទប្រុសអាយុ២៥ឆ្នាំ មុខរបរធ្វើការនៅហាងមួយកន្លែង ស្នាក់នៅសង្កាត់ចាក់អង្រែក្រោម ខណ្ឌមានជ័យ ។
មុនពេលកើតហេតុគេឃើញបុរសម្នាក់បើកម៉ូតូអៃខន ពណ៌ស លាយទឹកក្រូច ពាក់ស្លាកលេខភ្នំពេញ.1AH-8920 បើកបរទិសដៅពីជើងទៅត្បូងក្នុងល្បឿនយ៉ាងលឿនខណៈមកដល់ចំណុចកើតហេតុខាងលើស្រាប់តែមានមនុស្សបានដើរឆ្លងផ្លូវធ្វើអោយជនរងគ្រោះបើកម៉ូតូគេច ក៏ជ្រុលទៅបុកថូផ្កានិងបង្គោលភ្លើងនៅចញ្ចើមផ្លូវពេញទំហឹងបណ្ដាល អោយបែកក្បាលធ្លាយខួរស្លាប់ភ្លាមៗនៅក្នុងថ្លុកឈាមតែម្ដង។
ក្រោយពេលកើតហេតុភ្លាមៗសមត្ថកិច្ចមូលដ្ឋានបានចុះមក ដល់កន្លែងនិងធ្វើកំណត់ហេតុរួចរាល់ហើយបានប្រគល់សពឲ្យទៅក្រុមគ្រួសារយកទៅធ្វើបុណ្យតាមប្រពៃណីព្រមទាំងម៉ូតូផងដែរ៕ ដោយ៖សំណាង
