ភ្នំពេញ៖បុរស់ម្នាក់បានស្លាប់បាត់បង់ជីវិតក្រោយពេលមកដឹកប្រពន្ធចេញពីធ្វើការត្រូវរថយន្តធុនធំបើកវ៉ាជែងបុកពីក្រោយពេញទំហឹងបណ្តាលឲ្យស្លាប់ភ្លាមៗ រីឯម៉ូតូវិញនៅក្រោមរថយន្តអូសទៅមុខប្រហែល ៤០០ ម៉ែត្រ។
ហេតុការណ៍ភ្ញាក់ផ្អើលនេះកើតឡើងនៅវេលាម៉ោង ៦ និង ០០ ថ្ងៃព្រហស្បតិ៍ ទី១៦ ខែកក្កដា ឆ្នាំ២០២០ នៅតាមបណ្តោយផ្លូវជាតិលេខ ៣ ក្នុងភូមិទួលកី សង្កាត់ភ្លើងឆេះរទេះ ខណ្ឌកំបូល រាជធានីភ្នំពេញ ។
សពបុរសខាងលើមានឈ្មោះ ជាសុវណ្ណ អាយុ ២៦ ឆ្នាំ មានប្រពន្ធ រួមនិងកូន ៣ នាក់ មានស្រុកកំណើតក្នុងភូមិព្រៃកី(ខ) សង្កាត់ពងទឹក ខណ្ឌដង្កោ រាជធានីភ្នំពេញ។
បើយោងតាមប្រភពព័ត៌មានពីកន្លែងកើតហេតុបានឲ្យដឹងថាមុនពេលកើតហេតុគេឃើញបុរសម្នាក់ជិះម៉ូតូគុបជ្រុងមួយគ្រឿងដែលពាក់ផ្លាកលេខ ភ្នំពេញ1-BU 2327 ធ្វើដំណើក្នុងទិសដៅពីកើតមកលិច ក្នុងល្បឿនធម្មតា ដែលគាត់បម្រុងទៅឌុបប្រពន្ធគាត់ចេញពីធ្វើការ ស្រាប់តែភ្លាមនោះដែរគេបានឃើញរថយន្តប្រភេទធុនធំមួយគ្រឿងទៀត ដែលពាក់ផ្លាកលេខ ស្វាយរៀង3A 0241 ធ្វើដំណើក្នុងទិសដៅស្របគ្នាពីកើត មកលិច នៅពីក្រោយនិងម៉ូតូ ស្រាប់តែរថយន្តធុនធំក៏បួងចង្កូតវ៉ាជែងក្នុងល្បឿនលឿន រួចទាក់ដៃចង្កូតម៉ូតូ បណ្តាលឲ្យកិនស្លាប់ រីឯម៉ូតូនៅក្រោមនិងរថយន្តអូសទៅមុខ ប្រហែលជា ៤០០ ម៉ែត្រផងដែរ ហើយភ្លាមៗតៃកុងរថយន្តចុះ រត់គេចខ្លួនបាត់ស្រមោលទៅ។
ក្រោយពេលកើតហេតុសមត្ថកិច្ចមូលដ្ឋានចុះមកដល់រួចក៏ទាក់ទងទៅខាងជំនាញចរាចរណ៍ក្រុងឱ្យចុះមកធ្វើការវាស់វែងរួចយករថយន្ត និងម៉ូតូទៅរក្សាទុករង់ចាំដោះស្រាយជាមួយតំណាងរថយន្តនៅពេលក្រោយ រួចធ្វើកំណត់ហេតុដើម្បីប្រគល់សពជូនទៅដល់ក្រុមគ្រួសារយកទៅធ្វើបុណ្យនៅស្រុកកំណើតតាមប្រពៃណី៕ ដោយ៖ សា មេត