ការឆ្លងវីរុសកូរ៉ូណាទូទាំងពិភពលោកបានកើនលើស ១៤លានករណីហើយ គិតត្រឹមថ្ងៃសុក្រម្សិលមិញនេះ ហើយពិភពលោកយើងបានកំណត់ត្រាមួយ ដោយមានអ្នកឆ្លងសរុបចំនួន ១លាននាក់ ក្នុងរយៈពេល ១០០ម៉ោងចុងក្រោយ។ នេះបើតាមតួលេខរបស់ Reuters។
ករណីវីរុសកូរ៉ូណាដំបូង កើតឡើងនៅក្នុងប្រទេសចិនកាលពីដើមខែ មករា ហើយវាត្រូវការរយៈពេល ៣ខែ ទំរាំដល់វីរុសរាតត្បាតមកដល់ ១លានករណី។ ប៉ុន្តែត្រឹមរយៈពេលតែ ៤ថ្ងៃប៉ុណ្ណោះ ករណីឆ្លងហក់ឡើងពី ១៣លាន មកដល់ ១៤លានករណី។
សហរដ្ឋអាមេរិច ដែលបច្ចុប្បន្នមានករណីឆ្លងជាង ៣,៦លាន នៅតែបន្តមានអត្រាឆ្លងប្រចាំថ្ងៃខ្ពស់។ កាលពីថ្ងៃសុក្រ ប្រទេសមហាអំណាចនេះ មានការឆ្លងចំនួន ៧៧.៦៣៨ករណី។
ចំណែកនៅប្រទេសប្រេស៊ីលវិញ មានអ្នកឆ្លងសរុបជាង ២លាននាក់ដោយក្នុងនោះមាន ប្រធានាធិបតី Jair Bolsonaro ឆ្លងផងដែរ និងអ្នកស្លាប់សរុបជាង ៧៦.០០០នាក់។
ប្រទេសឥណ្ឌា មានអ្នកឆ្លងសរុបជាង ១លាននាក់ ហើយក្នុងរយៈពេល ១សប្តាហ៍ចុងក្រោយ ឥណ្ឌាមានអ្នកឆ្លងថ្មីជិត ៣០.០០០ករណីជារៀងរាល់ថ្ងៃ។
ប្រទេសទាំង ៣នេះ មានការឆ្លងខ្លាំងជារៀងរាល់ថ្ងៃ ដែលវាបានធ្វើឲ្យតួលេខរបស់អង្គការសុខភាពពិភពលោក កើនឡើងខ្លាំង៕
អត្ថបទប្រែសម្រួលដោយ៖ សុភ័ក្រ
ប្រភព៖ Reuters
