ភ្នំពេញ ÷ ស្ត្រីស្រស់ស្អាតម្នាក់បានបើករថយន្តម៉ាកfortune ស៊េរីទំនើបយ៉ាងលឿនដូចហោះ តាមបណ្ដោយផ្លូវ ២១៧ ដល់ផ្លូវកោងលឿនពេកបួងចង្កូតមិនទាន់បណ្ដាលឱ្យហោះឡើងលើចិញ្ចើមផ្លូវទៅបុកបង្គោលភ្លើងថ្មបាក់អស់ ១ ដើម កាលពីវេលាម៉ោង ២និង ៤០នាទីយប់រំលងអធ្រាត្រឈានចូលថ្ងៃអាទិត្យ ទី១៩ ខែកក្កដា ឆ្នាំ ២០២០ ត្រង់ចំណុចដេប៉ូលក់គ្រឿងសំណង់ ឡុង សិទ្ធារី ស្ថិតនៅតាមបណ្តោយផ្លូវ ២១៧ ក្នុងសង្កាត់ស្ពានថ្មខណ្ឌដង្កោ រាជធានីភ្នំពេញ។
ស្ត្រីដែលបើករថយន្តបង្កមិនត្រូវបានស្គាល់អត្តសញ្ញាណនោះទេដោយបើករថយន្តម៉ាកFORTUNERស៊េរីឆ្នាំ២០១៩ ពណ៌ស ពាក់ផ្លាកលេខភ្នំពេញ2-BA.0029។
តាមប្រភពពីកន្លែងកើតហេតុបានឲ្យដឹងថាដំបូងឡើយគេឃើញរថយន្តស៊េរីទំនើបមួយគ្រឿងបើកបរដោយស្ត្រីម្នាក់ តាមបណ្តោយផ្លូវ២១៧ ទិសដៅពីជើងមកត្បូងយ៉ាងលឿនដូចហោះ ខណៈមកដល់ចំណុចកើតហេតុខាងលើ ដោយសារតែផ្លូវកោងផងបើកលឿនមិនប្រយ័ត្នបានហោះឡើងលើចិញ្ចើមផ្លូវទៅបុកបង្គោលភ្លើងថ្មបាក់ជាពីរជាបីកំណាត់និងជ្រុះប្រអប់កុងទ័ររាយប៉ាយលើដី។តែក្នុងហេតុការណ៍គ្រោះថ្នាក់ចរាចរណ៍នេះមិនបង្កឲ្យនរណាម្នាក់រងរបួសនោះទេសូម្បីតែអ្នកបើកបរជាស្ត្រីមិនមានរងរបួសនោះដែរ បានបើកទ្វាររថយន្តរត់ឡើងជិះរថយន្តមួយគ្រឿងទៀតចាកចេញពីកន្លែងកើតហេតុនេះបាត់ស្រមោល។
ក្រោយពីកើតហេតុសមត្ថកិច្ចជំនាញចុះមកស្ទូចយករថយន្តបង្កទៅរក្សាទុកនៅអធិការដ្ឋានខណ្ឌដង្កោរង់ចាំម្ចាស់ចូលខ្លួនមកដោះស្រាយនៅពេលក្រោយ៕ ដោយ៖សា មេត
