ភ្នំពេញ ៖ ស្ត្រីម្នាក់បានបង្កឲ្យមានការភ្ញាក់ផ្អើលដល់អ្នកសារព័ត៌មានមកសួរនាំព្រោងព្រាត និងព្រមទាំងសមត្ថកិច្ចមូលដ្ឋាន ខណៈស្ត្រីរូបនេះត្រូវបានគេប្រទះឃើញកំពុងដេកននៀលលើដីយ៉ាងខ្លាំង បន្ទាប់កើតជម្លោះឈានវាយតប់គ្នាជាមួយស្ត្រីជាប្រពន្ធដើមម្នាក់ និងកើតទុក្ខមិនសុខចិត្ត ព្រោះត្បិតប្តីហេងស៊យបោកប្រាស់យកខ្លួនប្រាណម្តងម្កាល ពុំចេញមុខមកអើពើទទួលខុសត្រូវក្នុងរឿងស្នេហាត្រីកោណនេះ។
ហេតុការណ៍បង្កការភ្ញាក់ផ្អើលខាងលើនេះ បានកើតឡើងកាលពីវេលាម៉ោង ៨ និង ៣០ នាទី យប់ថ្ងៃទី២០ ខែកក្កដា ឆ្នាំ ២០២០ នៅតាមបណ្តោយផ្លូវ ៥២៨ ក្នុងសង្កាត់បឹងកក់១ ខណ្ឌទួលគោក រាជធានី ភ្នំពេញ។
ស្ត្រីរូបនេះបានប្រាប់អ្នកសារព័ត៌មានឲ្យដឹងថា ប្ដីហេងស៊យរបស់គាត់ ឈ្មោះ រស្មី ភេទប្រុស អាយុ ៣៨ ឆ្នាំ មុខរបរមេកាសំណង់ បានយកគ្នាជាប្ដីប្រពន្ធក្រៅច្បាប់ ដោយភូតថា គាត់គ្មានប្រពន្ធកូននោះទេ ហើយក៏រស់នៅជាមួយគ្នាបានជិតមួយឆ្នាំ។ ប៉ុន្តែ ក្រោយស៊ីចុកឆ្អែតឆ្អន់ ស្រាប់តែប្ដីហេងស៊យរូបនេះ បានដោះដៃចោលរូបនាងតែម្តង ។
ស្ត្រីរូបនេះបន្តទៀតថា ដោយមិនអស់ចិត្ត ខណៈនាងក៏មានផ្ទៃពោះជាង២ខែផងនោះ ទើបនៅយប់កើតហេតុនេះ រូបនាងបានមករកប្ដីហេងស៊យ ដើម្បីធ្វើការដោះស្រាយគ្នា ស្រាប់តែជួបប្រពន្ធដើមរបស់គាត់ នៅក្នុងការដ្ឋានកំពុងសាងសង ក៏ទាស់សំដីគ្នា ឈានទៅដល់ប្រើអំពើហឹង្សាវាយតប់គ្នា បណ្ដាលរងរបួសទាំងសងខាងតែម្តង។
ក្រោយកើតហឹង្សា ត្រូវបានគេដេញចេញពីក្នុងការដ្ឋាន និងក៏ព្រោះតែឈឺចាប់ខ្លាំង ស្ត្រីរូបនេះពុំបានទៅផ្ទះវិញទេ ដោយនៅខំប្រឹងស្រែកយំននៀលដីលើដងផ្លូវ បង្កឲ្យមានការភ្ញាក់ផ្អើលតែម្តង។
ប៉ុន្តែ អ្វីដែលហួសចិត្ត និងធ្វើឲ្យគ្រប់គ្នាអស់ក្តីអាណិតអាសូរនោះ គឺថាស្ត្រីរូបនេះ ពិតជារឹងរូស មិនស្តាប់ការពន្យល់ណែនាំរបស់បងប្អូនក្រុមអ្នកកាសែតនោះទេ និងផ្ទុយទៅវិញ រឹតតែក្រាញននៀលដី និងគំរាមបន្តធ្វើទុក្ខទោសមកលើខ្លួនឯង ដែលគេហៅថា ស៊ីជោរ ឬ បានចិត្ត ខណៈឃើញមនុស្សមកចោមរោមកាន់ច្រើននោះ។
ទោះយ៉ាងណា ទីបំផុត ស្ត្រីរូបនេះដែលគេដឹងថាជាអ្នកធ្វើការនៅហាងម៉ាស្សាដែលយកប្តីគេពុំទទួលស្គាល់ខ្លួនខុស ត្រូវបានសមត្ថកិច្ចប្រើវិធានការក្តៅ ចាប់បង្ខំរុញចូលម៉ូតូកង់បីដឹកទៅផ្ទះតែម្តង៕ ដោយ៖ លឹម ហុង