វ៉ាក់សាំងប្រឆាំង COVID-19 ដែលផលិតដោយចិន បានឈានដល់ការសាកល្បងដំណាក់ចុងក្រោយហើយកាលពីថ្ងៃអង្គារ នៅក្នុងប្រទេសប្រេស៊ីល ដោយមន្ត្រីមានក្តីសង្ឃឹមថា វ៉ាក់សាំងនោះនឹងធ្វើឲ្យពិភពលោកមានការផ្លាស់ប្តូរ។
វ៉ាក់សាំងដែលផលិតដោយក្រុមហ៊ុនឯកជនរបស់ចិនឈ្មោះ Sinovac បានក្លាយជាវ៉ាក់សាំងទី ៣របស់ពិភពលោកដែលបានឈានចូលការសាកល្បងដំណាក់កាលទី ៣ ឬការសាកល្បងទ្រង់ទ្រាយធំលើមនុស្ស។
វេជ្ជបណ្ឌិតវ័យ ២៧ឆ្នាំម្នាក់ ដែលទទួលបានការចាក់វ៉ាក់សាំង នៅមន្ទីរពេទ្យក្នុងក្រុង Sao Paulo បានថ្លែងថា “ពួកយើងកំពុងរស់នៅក្នុងពេលវេលាតែមួយ និងជាប្រវត្តិសាស្ត្រ ដូច្នេះហើយទើបខ្ញុំចង់ចូលរួមក្នុងការសាកល្បងនេះ”។
បុគ្គលិកសុខាភិបាលប្រហែល ៩.០០០នាក់មកពីរដ្ឋចំនួន ៦នៃប្រទេសប្រេស៊ីល នឹងធ្វើការចាក់វ៉ាក់សាំង ដែលមានឈ្មោះថា CoronaVac ចំនួន ២ក្នុងរយៈពេល ៣ខែក្រោមការសិក្សា។
អភិបាលក្រុង Sao Paulo ឈ្មោះ Joao Doria បានថ្លែងថា លទ្ធផលដំបូងនៃការចាក់វ៉ាក់សាំងនឹងចេញក្នុងរយៈពេល ៩០ឆ្នាំ។
ក្រុមហ៊ុន Sinovac កំពុងសហការជាមួយនឹងមជ្ឈមណ្ឌលស្រាវជ្រាវសុខភាពសាធារណៈប្រេស៊ីល លើការសាកល្បងវ៉ាក់សាំងនោះ។
ប្រសិនជាវ៉ាក់សាំង បង្ហាញពីប្រសិទ្ធភាព និងសុវត្ថិភាព វិទ្យាស្ថាននឹងមានសិទ្ធិផលិតវ៉ាក់សាំងចំនួន ១២០លាន ក្រោមកិច្ចព្រមព្រៀង។
សូមបញ្ជាក់ថា ប្រេស៊ីលជាប្រទេសទី ២ ដែលរងការវាយប្រហារខ្លាំងបំផុតពីវីរុសកូរ៉ូណា បន្ទាប់ពីសហរដ្ឋអាមេរិច។
នៅប្រេស៊ីល មានអ្នកស្លាប់សរុបដោយសារ COVID-19 ចំនួនជាង ៨០.០០០នាក់ គិតត្រឹមថ្ងៃចន្ទ និងមានអ្នកឆ្លងសរុបជាង ២,១លាននាក់៕
អត្ថបទប្រែសម្រួលដោយ៖ សុភ័ក្រ
ប្រភព៖ AFP
