រដ្ឋមន្ត្រីការបរទេសអាមេរិច លោក Mike Pompeo កាលពីថ្ងៃពុធម្សិលមិញនេះ បានជំរុញប្រទេសឥណ្ឌាឲ្យផ្តោតលើខ្សែសង្វាក់ផ្គត់ផ្គងក្នុងស្រុក និងកាត់បន្ថយការពឹងផ្អែកលើចិន សម្រាប់វិស័យទូរគមនាគមន៍ និងការផ្គត់ផ្គងវេជ្ជសាស្ត្រ ខណៈដែលទំនាក់ទំនងរវាងអាមេរិច និងចិនកំពុងតែដុនដាបខ្លាំង។
លោកបាននិយាយក្នុងកិច្ចប្រជុំកំពូលឥណ្ឌា តាមអនឡាញថា ឥណ្ឌាមាន “ឱកាសក្នុងការផ្លាស់សង្វាក់ផ្គង់ផ្គងចេញពីចិន និងកាត់បន្ថយការពឹងផ្អែករបស់ខ្លួន ទៅលើក្រុមហ៊ុនចិន ដូចជាក្នុងវិស័យទូរគមនាគមន៍ ការផ្គត់ផ្គងវេជ្ជសាស្ត្រ និងវិស័យផ្សេងៗ”។
លោកបន្តទៀតថា ឥណ្ឌាគឺកំពុងស្ថិតក្នុងជំហរនេះ ដោយសារតែឥណ្ឌាទទួលបានការទុកចិត្តពីប្រទេសជាច្រើនជុំវិញពិភពលោក រួមមានទាំងអាមេរិចផងដែរ។
ទំនាក់ទំនងឥណ្ឌាជាមួយនឹងចិនមានភាពតានតឹង ក្រោយពេលមានការប៉ះទង្គិចគ្នានៅតំបន់ព្រំដែនកាលពីខែមុន ដែលបណ្តាលឲ្យទាហានឥណ្ឌា ២០នាក់ស្លាប់បាត់បង់ជីវិត និងជាច្រើននាក់ទៀងរងរបួស។
រដ្ឋមន្ត្រីការបរទេសអាមេរិចចោទប្រកាន់ចិនថាជាអ្នកធ្វើឲ្យមានជម្លោះ ប៉ុន្តែត្រូវបានភាគីខាងចិនបដិសេធ។
លោកនិយាយថា “ជម្លោះកាលពីពេលថ្មីដែលបង្កឡើង ដោយកងទ័ពរំដោះប្រជាជន គឺជាឧទាហរណ៍ចុងក្រោយ នៃឥរិយាបទដែលមិនអាចទទួលយកបាន របស់បក្សកុម្មុយនិស្ត”។
ឥណ្ឌា ដែលកាលពីពេលថ្មីៗនេះ បានធ្វើការហាមឃាត់កម្មវិធីល្បីៗជាច្រើន របស់ចិននៅក្នុងប្រទេស រួមមាន TikTok ជាដើម មិនទាន់បានទទួលយកបច្ចេកវិទ្យារបស់ Huawei ឡើយក្រោយពេលអនុញ្ញាតឲ្យក្រុមហ៊ុនចិន ចូលរួមការសាកល្បងប្រព័ន្ធ 5G។
សូមបញ្ជាក់ថា ឥណ្ឌាជាប្រទេសផ្គត់ផ្គង់ថ្នាំ ដ៏សំខាន់មួយរបស់ពិភពលោក ហើយឥណ្ឌាពឹងផ្អែកទៅលើវត្ថុធាតុដើម របស់ចិន រហូតដល់ ៧០ភាគរយក្នុងការផលិតថ្នាំ៕
អត្ថបទប្រែសម្រួលដោយ៖ សុភ័ក្រ
ប្រភព៖ CNA
