អ្នកស្រាវជ្រាវកំពុងធ្វើការរីកចម្រើនយ៉ាងល្អ ក្នុងការអភិវឌ្ឍន៍វ៉ាក់សាំងប្រឆាំង COVID-19 ដោយមានការសាកល្បងនៅដំណាក់កាលចុងក្រោយ ប៉ុន្តែវ៉ាក់សាំងដំបូងមិនទាន់អាចមានឡើយ រហូតដល់ដើមឆ្នាំ ២០២១។ នេះបើតាមការបញ្ជាក់របស់អ្នកជំនាញអង្គការសុខភាពពិភពលោក (WHO) កាលពីថ្ងៃពុធម្សិលមិញនេះ។
លោកវេជ្ជបណ្ឌិត Mike Ryan ប្រធានកម្មវិធីសង្គ្រោះបន្ទាន់របស់ WHO បាននិយាយថា WHO កំពុងធ្វើកិច្ចការដើម្បីធានាឲ្យមានការចែកចាយវ៉ាក់សាំងដោយស្មើភាព ប៉ុន្តែក្នុងពេលបច្ចុប្បន្ននេះ វាពិតជាមានសារសំខាន់ណាស់ក្នុងការទប់ស្កាត់ការរីករាលដាលរបស់វីរុស។
លោកលើកឡើងថា “ពួកយើងកំពុងរីកចម្រើនយ៉ាងល្អ” ដោយវ៉ាក់សាំងជាច្រើនបានឈានចូលដល់ការសាកល្បងដំណាក់កាលទី ៣ ហើយរហូតមកដល់ពេលនេះ មិនទាន់មានវ៉ាក់សាំងណាមួយបរាជ័យឡើយ ទាក់ទងទៅនឹងសុវត្ថិភាព ឬក៏សមត្ថភាពក្នុងការបង្កើតប្រព័ន្ធការពារ។
“តាមពិតទៅ វានឹងក្លាយជាផ្នែកដំបូងបង្អស់នៃឆ្នាំក្រោយ មុនពេលយើងចាប់ផ្តើមឃើញមនុស្សទទួលបានវ៉ាក់សាំង”។
សូមរំលឹកថា វីរុសកូរ៉ូណាដែលមានឈ្មោះជាផ្លូវការថា COVID-19 បានផ្ទុះចេញដំបូងពីទីក្រុងវូហាន ប្រទេសចិន កាលពីចុងឆ្នាំ ២០១៩។ វីរុសនេះបានរាតត្បាតយ៉ាងលឿនទៅជុំវិញពិភពលោក ក្នុងរយៈពេលជិត ៨ខែ។
រហូតមកដល់ពេលនេះ វីរុសមរណៈនេះបានឆក់យកជីវិតមនុស្សជាង ៦២០.០០០នាក់ និងឆ្លងទៅកាន់មនុស្សជាង ១៥លាននាក់ទូទាំងពិភពលោក៕
អត្ថបទប្រែសម្រួលដោយ៖ សុភ័ក្រ
ប្រភព៖ Reuters
