សៀមរាប ៖ បុរសម្នាក់ ដែលត្រូវបានប្រជាពលរដ្ឋសន្មតថាជាជនវិកលចរិត បានលើកកាំបិតផ្គាក់គំរាមសម្លាប់ស្ត្រីម្នាក់ត្រូវជាម្តាយមីងដ៏រន្ធត់បំផុត កាលពីប៉ុន្មានថ្ងៃមុននេះ ត្រូវបានចាប់ខ្លួនហើយ កាលពីរសៀលថ្ងៃទី២៤ ខែកក្កដា ឆ្នាំ២០២០ ស្ថិតនៅលើកំពូលភ្នំត្បែងមានជ័យ ក្នុងភូមិក្រាំងដូង ឃុំព្រះឃ្លាំងគោកឃ្លាំង ស្រុកត្បែងមានជ័យ ខេត្តព្រះវិហារ។
ជនសង្ស័យខាងលើនេះដែលមានឈ្មោះ ហែម បញ្ញា អាយុ ២៧ ឆ្នាំ រស់នៅភូមិវិហារចិន សង្កាត់ស្វាយដង្គំ ក្រុងសៀមរាប ត្រូវបានចាប់ខ្លួនដោយកម្លាំងនគរបាលខេត្តសៀមរាប ដឹកនាំដោយលោកឧត្តមសេនីយ៍ត្រី ហួត សុធី ស្នងការរងទទួលផែនការងារសន្តិសុខ សហការជាមួយនគរបាលស្រុកត្បែងមានជ័យ។
បើតាមសមត្ថកិច្ចបានឲ្យដឹងថា ជនរូបនេះក្រោយពីបានធ្វើសកម្មភាពគំរាមសម្លាប់ម្តាយមីង និងវាយបំផ្លាញទ្រព្យសម្បត្តិអ្នកដទៃនៅតាមផ្លូវ បានទៅសម្ងំនៅលើកំពូលភ្នំត្បែងមានជ័យ ដើម្បីឲ្យលោកស្រោចទឹកលើករាសី។ ទោះយ៉ាងណា ពេលនេះ សមត្ថកិច្ចនាំជនរូបនេះមកកាន់ខេត្តសៀមរាបវិញ ដើម្បីកសាងសំណុំរឿងចាត់ការតាមផ្លូវច្បាប់។
អធិការដ្ឋាននគរបាលក្រុងសៀមរាប បានប្រកាសព័ត៌មានថា ករណី ជនមានជំងឺសរសៃប្រសាទឈ្មោះឯម បញ្ញា ភេទប្រុស អាយុ27ឆ្នាំនៅភូមិវិហ៊ាចិន សង្កាត់ស្វាយដង្គុំ ក្រុងសៀមរាប ដែលបានធ្វើសកម្មភាពយកកាំបិតផ្គាក់កាប់លើរថយន្តម៉ាកម៉ាស្ដា ពណ៌ស ស៊េរីឆ្នាំ2020 សម្លុតម្ចាស់ឲ្យចុះចេញហើយជនសរសៃប្រសាទនោះបើកចេញកាលពីវេលាម៉ោង 08និង30នាទី ថ្ងៃទី18 កក្កដា 2020 នៅភូមិវិហ៊ាចិន សង្កាត់ស្វាយដង្គុំ ក្រុងសៀមរាប ពេលនេះកម្លាំងប៉ុស្ដិ៍នគរបាលរដ្ឋបាលស្វាយដង្គុំ នៃអធិការដ្ឋាននគរបាលក្រុងសៀមរាប បានធ្វើការសហការ និងកម្លាំងការិយាល័យព្រហ្មទណ្ឌកំរិតធ្ងន់ កម្លាំងប៉ុស្ដិ៍នគរបាលរដ្ឋបាលអំពិល និងកម្លាំងនគរបាលស្រុកប្រសាទបាគង ស្រាវជ្រាវរកឃើញរថយន្ដនោះនៅចំណុចភូមិថ្នល់បាក់ ឃុំអំពិល ស្រុកប្រាសាទបាគង និងយកមកធ្វើការប្រគល់ជូនម្ចាស់កម្មសិទ្ធិជាជនរងគ្រោះ យកទៅគ្រប់គ្រងថែរក្សា និងជួសជុល ដើម្បីប្រើប្រាស់វិញហើយ។ ចំណែកជនសរសៃប្រសាទខាងលើនោះ បានចុះរត់គេចខ្លួនបាត់ ហើយកម្លាំងនគរបាលយើង កំពុងធ្វើការស្រាវជ្រាវតាមចាប់ខ្លួន តែមិនទាន់ចាប់បាននៅឡើយទេ។ ភិនភាគជនសរសៃប្រសាទ មានកម្ពស់1,65ម៉ែត្រ សម្បុរ ខ្មៅស្រអែម មានធំទម្ងន់80គីឡូក្រាម ស្លៀកខាវប៊ូយពណ៌ខៀវ អាវយឺដៃខ្លីករមូលពណ៌ខៀវ តាមតម្រុយជននោះ កំពុងស្ថិតក្នុងភូមិសាស្ត្រស្រុកបន្ទាយស្រី។ សូមបងប្អូនជួយសហការឃាត់ជននេះ ទុកនិងរាយការណ៍មកសមត្ថកិច្ចផង។
គួររំលឹកផងដែរថា កាលពីថ្ងៃទី១៨ ខែកក្កដា ឆ្នាំ២០២០ មានសេចក្តីរាយការណ៍បង្ហោះតាមបណ្តាញសង្គម ដោយគណនីហ្វេសប៊ុកឈ្មោះ Lyhuong Mombunhak បានប្រាប់សូមឲ្យអ្នកខេត្តសៀមរាបទាំងអស់គ្នា មានការប្រុងប្រយ័ត្ន ព្រោះមានជនវិកលចរិតម្នាក់ កំពុងចាប់ស្ត្រីម្នាក់ជាចំណាប់ខ្លាំង ដោយគំរាមសម្លាប់ជាមួយកាំបិតផ្គាក់ក្នុងដៃ ស្ថិតនៅជិតសាលាបៀលប្រាយ ក្នុងភូមិវិហារចិន សង្កាត់ស្វាយដង្គំ ក្រុងសៀមរាប។ មិនត្រឹមតែប៉ុណ្ណឹងទេ ជនរូបនេះ ក៏បានវាយបំបែកកញ្ចក់ឡានគេជិះកាត់ និងយករថយន្តគេជិះចាកចេញទៅបាត់ ដោយបើកប៉ះគេឯងនៅលើដងផ្លូវទៀតផង៕ ដោយ៖ លឹម ហុង
