ភ្នំពេញ៖ ក្រសួងពាណិជ្ជកម្មបានចេញសេចក្តីណែនាំ ដល់ក្រុមហ៊ុនធ្វើអាជីវកម្មនាំចូលចែកចាយ និងផ្គត់ផ្គង់ផលិតផលសម្រាប់ចិញ្ចឹមទារក និងកុមារទាំងអស់ សូមអនុវត្តឲ្យបានត្រឹមត្រូវតាមខ្លឹមសារច្បាប់ និងឯកសារគតិយុត្ត ដែលកំពុងមានជាធរមាន នៅក្នុងព្រះរាជាណាចក្រកម្ពុជា។
បើតាមសេចក្តីជូនដំណឹងនៅថ្ងៃទី 28 ខែកក្កដា ឆ្នាំ 2020 នេះ ក្រសួងពាណិជ្ជកម្ម ក៏បានប្រកាសថា ក្នុងរយៈពេល 30 ថ្ងៃ បន្ទាប់ពីថ្ងៃចេញសេចក្តីជូនដំណឹងនេះ ឬប្រសិនបើមន្ត្រីនៃអគ្គនាយកដ្ឋាន .ក.ប.ប. នៃក្រសួងពាណិជ្ជកម្ម រកឃើញផលិតផលសម្រាប់ចិញ្ចឹមទារក និងកុមារ ប្រភេទណាមួយ មិនបានអនុវត្តតាមខ្លឹមសារ ឬមិនបានបំពេញតាមលក្ខខណ្ឌតម្រូវផ្សេងៗទៀត នៃអនុក្រឹត្យលេខ 133 និងប្រកាសរួមលេខ ០៦១ សនរប មន្ត្រីអគ្គនាយកដ្ឋាន.ក.ប.ប. នៃក្រសួងពាណិជ្ជកម្ម និងចាត់វិធានការជាបណ្ដោះអាសន្ន នូវការចរាចរ និងដកហូតចេញពីទីផ្សារ ឬអនុវត្តនីតិវិធីផ្សេងៗទៀត ដោយអនុលោមតាមច្បាប់ ស្តីពីការគ្រប់គ្រងគុណភាពសុវត្ថិភាព លើផលិតផលទំនិញ និងសេវាច្បាប់ ស្ដីពីកិច្ចការពារអ្នកប្រើប្រាស់ និងបទប្បញ្ញត្តិជាធរមានផ្សេងៗទៀត ដោយមិនលើកលែងឡើយ។
ក្រសួងពាណិជ្ជកម្ម នឹងបន្តសកម្មភាពការងាររបស់ខ្លួន ដោយឈរលើអាណត្តិ ការងារតាមតួនាទី និងភារកិច្ចហើយសង្ឃឹមជឿជាក់យ៉ាងមុតមាំ លើកិច្ចសហការពីគ្រប់ភាគីពាក់ព័ន្ធ ក្នុងការជំរុញការអនុវត្តច្បាប់ និងលិខិតបទដ្ឋានគតិយុត្តនានា ឲ្យប្រព្រឹត្តទៅបានល្អប្រសើរ ដើម្បីផលប្រយោជន៍សម្រាប់សង្គមជាតិទាំងមូល។
ក្រសួងពាណិជ្ជកម្ម បានសង្កេតឃើញថា ការចរាចរផលិតផលសម្រាប់ចិញ្ចឹមទារក និងកុមារ នៅលើទីផ្សារមួយចំនួន មិនបានអនុវត្តតាមខ្លឹមសារនៃមាត្រា ៩ ១០ ១១ ១២ នៃអនុក្រឹត្យលេខ 113 អនក្រ.បក និងប្រកាសរួមលេខ ០៦១ សនរប ចុះថ្ងៃទី 16 ខែសីហា ឆ្នាំ 2007 ស្ដីពីការអនុវត្តអនុក្រឹត្យ ស្ដីពីការផ្សព្វផ្សាយលក់ផលិតផល សម្រាប់ចិញ្ចឹមទារកនិងកុមារ ដោយមិនទាន់បំពេញកាតព្វកិច្ចរបស់ខ្លួន នៅលើសម្បកវេចខ្ចប់ ជាប់នឹងផលិតផលរបស់ខ្លួន ដូចជាការបង្ហាញណែនាំអំពីវិធីប្រើផលិតផល ជាភាសាខ្មែរ និងជាពិសេសពាក្យថា ” គ្មានអ្វីប្រសើរជាងការបំបៅកូន ដោយទឹកដោះម្ដាយតែមួយមុខគត់ រហូតបាន 6ខែ នឹងបន្តការបំបៅដោះម្ដាយរហូតបានអាយុ 2 ឆ្នាំ ឬលើសឡើយ”៕ ដោយ៖កូឡាប
