ឧត្តរមានជ័យ ៖ សហគមន៍សង្ឃរុក្ខវ័ន ហៅព្រៃលោក ទទួលសត្វចចក២ក្បាល ដែលគេយកមកព្រលែងដើម្បីអភិរក្ស ។ ព្រះតេជគុណ ប៊ុន សាលួត ព្រះមេគណខេត្តឧត្តរមានជ័យនិងប្រធានសហគមន៍សង្ឃរុក្ខាវ័ន មានសង្ឃដីកាថ្ងៃទី២៩ខែកក្កដាថា ៖ សត្វចចកពីរក្បាលនេះ គឺទទួលបានពីញោមញាតិអ្នកស្រុកដែលនាំប្រគេនប្រគល់ ហើយពេលនេះត្រូវព្រលែងវាចូលក្នុងដែនអភិរក្សព្រៃធម្មជាតិវិញនេះ ។
ទោះយ៉ាងណា ព្រះអង្គមិនព្រមមានដីកាប្រាប់ពីម្ចាស់ទាន និងប្រភពសត្វតិរច្ឆាននោះទេ ដោយគ្រាន់តែអនុមោទនាថា ញោមនោះមានសទ្ធារួមចំណែកអភិរក្សសត្វព្រៃយើងហើយ ។
ទាក់ទិនព្រៃសហគមន៍នេះ កាលពីសប្តាហ៍មុនមន្ត្រីឧទ្យានុរក្ស បានបង្ហាញនូវលទ្ធផលនៃប្រតិបត្តិការបង្ក្រាបបទល្មើសធនធានធម្មជាតិ ដែលមានឧបករណ៍សម្ភារ និងមធ្យោបាយល្មើសច្បាប់ជាង១០០ករណី ក្នុងតំបន់ដែនជម្រកសត្វព្រៃសង្ឃរុក្ខាវ័ន នៅខេត្តឧត្តរមានជ័យ។
លោក ភួង លីណា ប្រធានមន្ទីរបរិស្ថានខេត្តឧត្តរមានជ័យ បានឱ្យដឹងថា តំបន់ការពារដែនជម្រកសត្វសង្ឃរុក្ខាវ័័ន កម្លាំងមន្ត្រីឧទ្យានុរក្សបង្ក្រាបបទល្មើស និងរឹបអូសបាននៅឧបករណ៍៍៍៍សម្ភារ និងមធ្យោបាយពីជនល្មើស ធ្វើសកម្មភាពបានចំនួន១៣៤ករណី ។
នេះបើគិតពីផ្តើមពីអំឡុងពាក់កណ្តាលឆ្នាំ២០១៨ ដល់ខែកក្កដា ២០១២០។
ឧបករណ៍សម្ភារនិងមធ្យោបាយល្មើសទាំងនោះ រួមមាន គោយន្តកន្ត្រៃ មធ្យោបាយដឹកជញ្ជូនចំនួន២២គ្រឿង, រណារយន្តចំនួន៤៨គ្រឿង, ឈើប្រណិតប្រភេទឈើធ្នង់កាត់អាច្រៀក និងមូល ចំនួន២៣៤កំណាត់, ឈើសំំណង់ច្រៀកនិងមូលជិតចំនួន២០ម៉ែត្រគូប, កាំភ្លើងកែច្នៃចំនួន១៣ដើម, អន្ទាក់ដាក់ចាប់សត្វព្រៃចំនួន៦០២អន្ទាក់ ។ល។
សូមរំលឹកថា តំបន់ការពារដែនជម្រកសត្វព្រៃសង្ឃរុក្ខាវ័ននេះ ត្រូវបានបង្កើតឡើងនៅអំឡុងឆ្នាំ២០១៨ មានផ្ទៃដីសរុបចំនួន៣០.២៥៤ហិកតា មានព្រំប្រទល់ជាប់ចំនួន៣ គឺស្រុកអន្លង់វែង ស្រុកចុងកាល់ និងក្រុងសំរោង។
ដែនជម្រកសត្វព្រៃសង្ឃរុក្ខាវ័ន នាបច្ចុប្បន្នភាពនេះ មានបញ្ហាប្រឈមនិងរងការគំរាមកំហែងហឹង្សាជាច្រើន ដូចជា ការរុករានទន្ទ្រានកាន់កាប់ដីរដ្ឋ ក្នុងតំបន់ពីសំណាក់ពលរដ្ឋ ពីកងកម្លាំងមានអាវុធ និងសកម្មភាពលូចកាត់អារឈើ ។
ការបរបាញ់សត្វព្រៃ និងការនេសាទខុសច្បាប់ ៕
ដោយ ៖ បន្ទាយ
