រៀងរាល់មួយនាទី មានមនុស្សម្នាក់នៅអាមេរិចស្លាប់ដោយសារ COVID-19 ខណៈដែលចំនួនអ្នកស្លាប់សរុប នៅអាមេរិចកើនលើស ១៥០.០០០នាក់ ដែលជាតួលេខស្លាប់ច្រើនបំផុតក្នុងពិភពលោក។
កាលពីថ្ងៃពុធ អាមេរិចមានអ្នកស្លាប់ចំនួន ១.៤៥៦នាក់ មានន័យថា មនុស្សម្នាក់ស្លាប់រៀងរាល់មួយនាទីម្តង ហើយវាក៏ជាតួលេខស្លាប់ខ្ពស់បំផុតដែរ ក្នុងរយៈពេលមួយថ្ងៃ ចាប់តាំងពីមានការស្លាប់ច្រើនបំផុត រហូតដល់ ១.៤៨៤នាក់ កាលពីថ្ងៃទី ២៧ ខែឧសភា។ នេះបើតាមតួលេខរបស់ទីភ្នាក់ងារសារព័ត៌មាន Reuters។
ចំនួនអ្នកស្លាប់ដោយសារ COVID-19 នៅអាមេរិចកើនឡើងខ្លាំង ក្នុងអត្រាខ្ពស់ ក្នុងរយៈពេល ២ខែចុងក្រោយ ហើយត្រឹមរយៈពេល ១១ថ្ងៃចុងក្រោយ មានអ្នកស្លាប់រហូតដល់ ១១.០០០នាក់ឯណោះ។
សូមបញ្ជាក់ថា វីរុសកូរ៉ូណា បានផ្ទុះចេញដំបូងពីទីក្រុងវូហាន ប្រទេសចិនកាលពីចុងឆ្នាំ ២០១៩ និងបានរីករាលដាលយ៉ាងលឿនទៅជុំវិញពិភពលោក។
រហូតមកដល់ពេលនេះ វីរុសមរណៈនេះ បានផ្តាច់ជីវិតមនុស្សជាង ៦៦៤.០០០នាក់ និងឆ្លងទៅកាន់មនុស្សជិត ១៧លាននាក់ ទូទាំងពិភពលោក៕
អត្ថបទប្រែសម្រួលដោយ៖ សុភ័ក្រ
ប្រភព៖ Reuters
