ភ្នំពេញ៖ នាយកដ្ឋាននគរបាលព្រហ្មទណ្ឌ នៃអគ្គស្នងការដ្ឋាននគរបាលជាតិ ក្រសួងមហាផ្ទៃ នៅថ្ងៃទី៣០កក្កដាបានផ្សព្វផ្សាយព័ត៌មាន ជូនសាធារណជន អ្នកសារព័ត៌មាន ពិសេសអ្នកនិយមប្រើប្រាស់បណ្ដាញទំនាក់ទំនងសង្គមឲ្យបានជ្រាបពាក់ព័ន្ធនឹងករណីជ្រុះបាត់ជញ្ជៀនពេជ្រមួយវង់ និងត្រូវអ្នកជិតខាងរើសបាន ទាមទារប្រាក់ចំនួន៦០០ដុល្លារ ជាថ្នូរនឹងការប្រគល់ជញ្ជៀនពេជ្រនោះមកម្ចាស់ដើមវិញ។
នាយកដ្ឋាននគរបាលព្រហ្មទណ្ឌ បានឲ្យដឹងថា កាលពីយប់ថ្ងៃទី០៩ ខែកក្កដា ឆ្នាំ២០២០ ឈ្មោះ យឹម វុទ្ធី បានជ្រុះបាត់ចិញ្ចៀនពេជ្រមួយវង់ដែលមានតម្លៃ ២,៦៥៤ដុល្លារ ពេលដែលចតឡាននៅជិតផ្ទះ។ ដល់ពេលព្រឹកឡើងនៅថ្ងៃទី១០ ខែកក្កដា ឆ្នាំ២០២០ ឈ្មោះ យឹម វុទ្ធី បានរកជញៀនដែលខ្លួនពាក់នៅនឹងដៃពុំឃើញ ហើយបានទៅរកនៅកន្លែងដែលខ្លួនចតឡាន នាពេលយប់នោះតែពុំឃើញសោះ។
ក្រោយមកឈ្មោះ យឹម វុទ្ធី ក៏សុំពិនិត្យទិន្នន័យក្នង Camara សុវត្ថិភាពរបស់ម្ចាស់ផ្ទះអ្នកជិតខាង (រើសចិញ្ចៀនបាន) តែត្រូវម្ចាស់ផ្ទះបដិសេធ ដោយសំអាងថា Camera សុវត្ថិភាពខូច។ លោកបានបន្តទៅសុំម្ចាស់ Camera សុវត្ថិភាពអ្នកជិតខាងម្នាក់ទៀតដើម្បីពិនិត្យតាមដានរកអ្នកដែលរើសយកចិញ្ជៀននោះ។ ជាលទ្ធផលក្នុង Camera សុវត្ថិភាពនោះបានថតជាប់សកម្មភាពរបស់ឈ្មោះ ជើង សៀមឆេង (ជាម្ដាយរបស់ឈ្មោះ សេង កុសែន និងប្រពន្ធឈ្មោះ លី ស្រីអូន) រើសយកចិញ្ជៀន។
ឈ្មោះ យឹម វុទ្ធី បានទៅជួបឈ្មោះ ជើង សៀមឆេង សាកសួរអំពីជញ្ជៀន តែត្រូវគាត់បានប្រាប់ថា គាត់ពិតជារើសបានចិញ្ជៀននោះប្រាកដមែន តែគាត់បានប្រគល់ឲ្យទៅកូនប្រុសរបស់គាត់ឈ្មោះ សេង កុសែន បាត់ទៅហើយ ក្រោយមកលោកបានជួបជាមួយប្រពន្ធ សេង កុសែន ឈ្មោះ លី ស្រីអូន សុំលេខទូរស័ព្ទទំនាក់ទំនងដើម្បីសុំចិញ្ជៀនវិញ តែគាត់ពុំព្រមឲ្យលេខទូរស័ព្ទប្ដីគាត់ឡើយ។
ឈ្មោះ យឹម វុទ្ធី បានព្យាយាមទទូចសុំលេខប្ដីគាត់ជាច្រើនលើករួចមកគាត់បានខលទៅប្ដីគាត់ ដើម្បីឲ្យប្ដីគាត់ខលត្រឡប់មកវិញ ពេលនោះឈ្មោះ សេង កុសែន បានប្រាប់ថា គាត់បានលក់ចិញ្ជៀននោះឲ្យទៅមិត្តភក្ដិគាត់ក្នុងតម្លៃ៦០០ដុល្លារ ហើយបើចង់បានចិញ្ជៀននោះវិញ គឺតម្រូវឲ្យបង់លុយតាមរយៈធនាគា ABA ចំនួន៦០០ដុល្លារ ដើម្បីយកលុយទៅប្រគល់ឲ្យទៅមិត្តភ័ក្រខ្លួនវិញ ពេលនោះឈ្មោះ យឹម វុទ្ធី បានសួរគាត់ថាមិត្តភក្ដិគាត់នៅទីណា, ឈ្មោះអីក៏គាត់មិនប្រាប់ដែរ គឺគាត់មានចេតនានិយាយពង្វាង។
លុះដល់ថ្ងៃទី១៥ ខែកក្កដា ឆ្នាំ២០២០ ឈ្មោះ យឹម វុទ្ធី បានសម្រេចដាក់ពាក្យបណ្ដឹងនៅនាយកដ្ឋាននគរបាលព្រហ្មទណ្ឌ ដើម្បីធ្វើការស្រាវជ្រាវ និងអនុវត្តនីតិវិធី។
បន្ទាប់ពីទទួលបានពាក្យបណ្ដឹង នាយកដ្ឋាននគរបាលព្រហ្មទណ្ឌបានរៀបចំកសាងសំណុំរឿងនីតិវិធីតាមផ្លូវច្បាប់ និងបានស្នើសុំការអង្កេតបឋមពីតំណាងអយ្យការអមសាលាដំបូងរាជធានីភ្នំពេញ។
នាយកដ្ឋាននគរបាលព្រហ្មទណ្ឌ សង្ឃឹមថា សាធារណជន អ្នកសារព័ត៌មាន និងអ្នកនិយមប្រើប្រាស់បណ្ដាញទំនាក់ទំនងសង្គមមេត្តាទទួលជ្រាបជាព័ត៌មាន និងសូមមេត្តាកុំធ្វើការសន្និដ្ឋាន វាយតម្លៃ រឿងហេតុដោយពុំមូលដ្ឋាន ភស្តុតាង និងការស៊ើបបញ្ជាក់ឲ្យបានច្បាស់លាស់។
លោកផ្កាយ២ម្នាក់ឈ្មោះ យឹម វុទ្ធី ក្នុងនាមជាដើមបណ្តឹង បានប្តឹងចោទប្រកាន់ស្ត្រីចំណាស់ម្នាក់ឈ្មោះ ផង សៀមឆេងពីបទ «លួចចិញ្ចៀនពេជ្រ និងជំរិតទារប្រាក់»។ នេះបើយោងតាមលិខិតកោះហៅរបស់នាយកដ្ឋាននគរបាលព្រហ្មទណ្ឌក្រសួងមហាផ្ទៃ អញ្ជើញស្ត្រីខាងលើឲ្យចូលខ្លួនមកបំភ្លឺ កាលពីថ្ងៃទី២៨ ខែកក្កដា ឆ្នាំ២០២០។
ស្ត្រីចំណាស់ឈ្មោះ ផង សៀមឆេង មានទីលំនៅក្នុងភូមិទ្រុងមាន់ សង្កាត់អូរបែកខ្អម ខណ្ឌសែនសុខ ពុំបានលួចដូចក្នុងលិខិតកោះអញ្ជើញនោះទេ។ នេះបើតាមគណនីហ្វេសប៊ុកឈ្មោះ សេង សុវណ្ណ មង្គល ដែលត្រូវជាកូនបានបង្ហោះកាលពីល្ងាចថ្ងៃទី២៨ ខែកក្កដា ឆ្នាំ២០២០ ឲ្យដឹងថា៖ «ឯណាយុត្តិធម៌ ! ម្ដាយខ្ញុំរើសបានចិញ្ចៀនកណ្តាលថ្នល់សោះ មិនដឹងថាចិញ្ចៀនបុគ្គលណាទេ តែបែរជាលោកផ្កាយ២ ចោទថា ម្ដាយខ្ញុំជាអ្នកលួចចិញ្ចៀនទៅវិញ ។ រូបភាព មានហើយហេតុអីបានថា គ្រួសារខ្ញុំលួចចិញ្ចៀន ប្រទេសខ្មែរមានយុត្តិធម៌ទេ សម្រាប់គ្រួសាររបស់ខ្ញុំ តើគ្រួសាររបស់ខ្ញុំទទួលបានយុត្តិធម៌យ៉ាងណា»៕ ដោយ៖កូឡាប
