ប្រទេសនេប៉ាល់នឹងបើកប្រជុំភ្នំហិមាល័យ រួមមានភ្នំអេវឺរេស ឲ្យអ្នកឡើងភ្នំឡើងលេងកម្សាន្តវិញសម្រាប់រដូវស្លឹកឈើជ្រុះ ដើម្បីជំរុញសេដ្ឋកិច្ចរបស់ខ្លួនដែលពឹងផ្អែកលើវិស័យទេសចរណ៍ បើទោះបីមានការកើនឡើងនៃវីរុសកូរ៉ូណាយ៉ាងណាក្តី។ នេះបើតាមការបញ្ជាក់របស់មន្ត្រីកាលពីថ្ងៃព្រហស្បតិ៍។
ប្រទេសនេប៉ាល់ មានភ្នំខ្ពស់បំផុតចំនួន ៨ ក្នុងចំណោមភ្នំខ្ពស់ៗបំផុតចំនួន ១៤ក្នុងពិភពលោក។ នេប៉ាល់បានបិទការឡើងភ្នំកម្សាន្តកាលពីខែមីនា ដើម្បីទប់ស្កាត់វីរុសកូរ៉ូណា ដែលរហូតមកដល់បច្ចុប្បន្ននេះ វីរុសនេះបានឆ្លងទៅកាន់មនុស្សចំនួន ១៩.៥៤៧នាក់ និងបណ្តាលឲ្យស្លាប់មនុស្ស ៥២នាក់។
មន្ត្រីមន្ទីរបរិស្ថាននេប៉ាល់ Mira Acharya បាននិយាយថា “ពួកយើងបានបើកឲ្យមានការឡើងភ្នំវិញ ហើយនឹងធ្វើការចេញការអនុញ្ញាតិសម្រាប់រដូវស្លឹកឈើជ្រុះ”។
ការឡើងភ្នំនៅរដូវស្លឹកឈើជ្រុះ ក្នុងប្រទេសនេប៉ាល់ ចាប់ផ្តើមពីខែកញ្ញា ដល់ខែវិច្ឆការ។
ការបិទការឡើងភ្នំនៅក្នុងរដូវដ៏មមាញឹក ចាប់ពីខែមេសា ដល់ខែឧសភា បានធ្វើឲ្យប្រទេសនេប៉ាល់បាត់បង់ប្រាក់ចំណូលរាប់លានដុល្លារ។ អ្នកធ្វើដំណើររាប់រយនាក់ និងអ្នករស់នៅក្បែរតំបន់ភ្នំ អ្នកជួយយួរអីវ៉ាន់ និងមគ្គុទេសចំនួនជាង ២០០.០០០នាក់។
បើទោះបីរដ្ឋាភិបាលចង់បើកឲ្យមានការឡើងភ្នំលេងវិញក៏ដោយ ជើងហោះហើរអន្តរជាតិត្រូវបានបិទរហូតដល់ពាក់កណ្តាលខែសីហា៕
អត្ថបទប្រែសម្រួលដោយ៖ សុភ័ក្រ
ប្រភព៖ Reuters
