ភ្នំពេញ៖ ក្នុងកាលៈទេសៈដែលមេរោគឆ្លង Covid-19 ស្ថិតក្នុងស្ថានភាពប្រុងប្រយ័ត្ននៅឡើយ ភាគីកម្ពុជានិងសឹង្ហបុរីបើកកិច្ចប្រជុំកំរិតខ្ពស់លើកទី១១ តាមប្រព័ន្ធ online ស្តីពីកិច្ចសហប្រតិបត្តិការវិស័យកម្មសិទ្ធិបញ្ញារវាងក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ និងប្រធានអង្គភាពកម្មសិទ្ធិបញ្ញាសឹង្ហបុរី ទើបតែងតាំងថ្មី ត្រូវបានប្រារព្វធ្វើឡើង នៅទីស្តីការក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ នៅព្រឹកថ្ងៃទី ៣០ ខែកក្កដា ឆ្នាំ២០២០ ។
នៅក្នុងជំនួបតាមប្រព័ន្ធ Online នោះ ភាគីទាំងពីរបានសាទរ និងវាយតម្លៃខ្ពស់ចំពោះលទ្ធផលកិច្ចប្រជុំកំរិតមន្ត្រីបច្ចេកទេស ដែលបានរៀបចំធ្វើមុននេះបន្តិច ។ ជាពិសេស ឯកឧត្តមកិត្តិសេដ្ឋាបណ្ឌិត ក៏បានអបអរសាទរដល់លោក Daren TANG ដែលត្រូវបានបោះឆ្នោតជាប់ធ្វើជាអគ្គនាយកអង្គការកម្មសិទ្ធិបញ្ញាពិភពលោក (WIPO) ដែលនឹងចូលកាន់តំណែងនាពេលខាងមុខ និងលោកស្រី Rena LEE ប្រធានអង្គភាពកម្មសិទ្ធិបញ្ញាសឹង្ហបុរី ទើបតែងតាំងថ្មី ។
ឯកឧត្តមកិត្តិសេដ្ឋាបណ្ឌិត ចម ប្រសិទ្ធ ទេសរដ្ឋមន្ត្រីរដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានឲ្យដឹងថាកិច្ចសហប្រតិបត្តិការលើវិស័យកម្មសិទ្ធិបញ្ញារវាងកម្ពុជា និងសឹង្ហបុរី នឹងបន្តវិវឌ្ឍន៍រីកចម្រើនទៅមុខជាលំដាប់ ។ ជាក់ស្តែង ជាការកត់សម្គាល់ ក្រោមកិច្ចសហប្រតិបត្តិការរវាងក្រសួង(MITIS) និងអង្គភាពកម្មសិទ្ធិបញ្ញា ផែនការសកម្មភាពចំនួន០៥ សម្រាប់ឆ្នាំ២០១៩ ត្រូវបានអនុវត្តន៍បញ្ចប់ ។
ឯកឧត្តមថា ក្រសួងឧស្សាហកម្ម បានទទួលការដាក់ពាក្យស្នើសុំប្រកាសនីយបត្រតក្កកម្ម(Patent) ចាប់តាំងពីឆ្នាំ២០១៦ ដល់ខែមិថុនា ឆ្នាំ២០២០ បានចំនួនសរុប ៦២ Patent ។ យើងបានចេញវិញ្ញាបនបត្របញ្ជាក់ចំនួន ៥៤ ។ ប៉ុន្តែ កំឡុងពេលនៃវិបត្តិកូវីដ-១៩ យើងទទួលពាក្យស្នើសុំបានតែ០១ ប៉ុណ្ណោះ ពី IPOS ។ ចំណែកនៅ០៨ពាក្យស្នើសុំទៀត គឺបានអនុវត្តន៍ដូចតទៅ គឺ ចំនួន០៣ ពាក្យស្នើសុំ កំពុងរង់ចាំការឆ្លើយតបពីអ្នកដាក់ពាក្យ , ចំនួន០៤ Patent ទាក់ទងនិងរបបគំហើញផ្នែកឱសថ ត្រូវបានបដិសេធ ដោយសារស្ថិតនៅក្រៅតំបន់ការពារ ព្រោះបានកំណត់ដោយអង្គការពាណិជ្ជកម្មពិភពលោក (WTO) និងពាក្យស្នើសុំPatent ចំនួន០១ ត្រូវបានដកចេញ ។
ឯកឧត្តមកិត្តិសេដ្ឋាបណ្ឌិត សង្ឃឹមយ៉ាងមុតមាំថា៖ ក្នុងនោះ បើពិនិត្យជារួម ក្រោមកិច្ចសហប្រតិបត្តិការរវាងកម្ពុជា ជាមួយអង្គភាពកម្មសិទ្ធិបញ្ញានៃប្រទេសមួយចំនួនទៀត រួមមាន៖ ជាមួយប្រទេស ជប៉ុន អឺរ៉ុប ចិន កូរ៉េ និងរួមទាំងប្រទេសសឹង្ហបុរីផង យើងទទួលបានការដាក់ពាក្យស្នើសុំការចុះបញ្ជីឡើងវិញនៃប្រកាសនីយបត្តតក្កកម្ម(Patent) សរុបបានចំនួន ១.១៥៨ Patent ។ ក្នុងនោះ Patent ចំនួន២៣៦ ត្រូវបានផ្តល់ជូន។
ឯកឧត្តមកិត្តិសេដ្ឋាបណ្ឌិតទេសរដ្ឋមន្ត្រី ចម ប្រសិទ្ធ បានលើកទឹកចិត្តឲ្យមន្ត្រីបច្ចេកទេសទាំងពីរភាគីបន្តពិភាក្សារួមគ្នា ស្ទីពីកិច្ចសហប្រតិបត្តិការអភិវឌ្ឍន៍ និងប្រតិបត្តិការ ប្រព័ន្ធហេក (Hague System) សម្រាប់ការចុះបញ្ជីជាលក្ខណៈអន្តរជាតិទាក់ទងគំនូរឧស្សាហកម្ម និងសិទ្ធិសញ្ញា PCT សម្រាប់ប្រកាសនីយបត្រតក្កកម្មនៅកម្ពុជា រួមបញ្ជូលទាំងការបណ្តុះបណ្តាលវិស័យកម្មសិទ្ធិបញ្ញាដល់មន្ត្រីក្រសួងផងដែរ ។
លោក Daren TANG ជាអតីត និងលោកស្រី Rena LEE ប្រធានអង្គភាពកម្មសិទ្ធិបញ្ញាសឹង្ហបុរី ទើបតែងតាំងថ្មី បានវាយតម្លៃខ្ពស់ចំពោះកិច្ចសហប្រតិបត្តិការ និងបង្ហាញជំហរសហការគាំទ្របន្តទៀតក្នុងវិស័យកម្មសិទ្ធិបញ្ញានៅកម្ពុជា។ បន្ទាប់មកភាគីទាំងពីរបានពិភាក្សាលើរបៀបវារៈនៃកិច្ចប្រជុំសំខាន់ៗរួមមានដូចជា៖កម្មវិធីកសាងសមត្ថភាពមន្ត្រី និងការត្រៀមរៀបចំកិច្ចប្រជុំមន្ត្រីបច្ចេទេស និងកិច្ចប្រជុំកំរិតខ្ពស់លើកទី១២ នាពេលខាងមុខ ។
ជាមួយអង្គភាពកម្មសិទ្ធិបញ្ញានៃប្រទេសសឹង្ហបុរី ដែលដឹកនាំដោយលោក Daren TANG អតីតប្រធានអង្គភាពកម្មសិទ្ធិបញ្ញា នៃប្រទេសសឹង្ហបុរី (IPOS) និងលោកស្រី Rena LEE ប្រធានអង្គភាពកម្មសិទ្ធិបញ្ញាសឹង្ហបុរី ទើបតែងតាំងថ្មី ត្រូវបានប្រារព្ធធ្វើឡើង នៅទីស្តីការក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ នៅព្រឹកថ្ងៃទី ៣០ ខែកក្កដា ឆ្នាំ២០២០៕
ដោយ៖CEN
