ខេត្ដកណ្ដាល៖ ចោរមួយក្រុម បានឡើងទៅលើផ្ទះរបស់អ្នកឡេ Love Riya លួចទូដែកតូច គ្មានដាក់លុយអស់១ ចំណែកឯទូដែកអាធំ ត្រូវបានចោរលើកមកដាក់នៅសំយ៉ាបខាងមុខ ក្រៅពីនេះពុំមានបាត់បង់អ្វីទៀតឡើយ។
ស្នងការដ្ឋាននគរបាលខេត្តកណ្តាល បានឲ្យដឹងថា នៅថ្ងៃអាទិត្យ ទី០២ ខែសីហាឆ្នាំ២០២០ វេលាម៉ោង១១៖០០នាទី មានករណីអំពើលួចនៅចំណុចផ្ទះជនរងគ្រោះ ស្ថិតក្នុងភូមិព្រែកតាពៅ សង្កាត់ដើមមៀន ក្រុងតាខ្មៅ ខេត្តកណ្តាល។
ជនរងគ្រោះឈ្មោះ សេង ស្រីរ័ត្ន ភេទស្រី ហៅLove Riya អាយុ៣៥ឆ្នាំ ទីលំនៅកន្លែងកើតហេតុខាងលើ មុខរបរលក់ឡេ។ សម្ភារបាត់បង់ ទូដែកតូចទទេ (គ្មានលុយ) ចំនួន១ ។
កាលពីថ្ងៃទី១ ខែសីហា ឆ្នាំ២០២០ វេលាម៉ោង១០ និង០០នាទី ជនរងគ្រោះ និងក្រុមគ្រួសារ ព្រមទាំងបុគ្គលិកលក់ឡេទាំងអស់ បានចាកចេញពីផ្ទះទៅលេងខេត្តកំពត ដោយបានបិទបារ៉ែតភ្លើង បិទទ្វារបង្អួចផ្ទះជាន់ក្រោមទាំងអស់ ចំណែឯជាន់ទី១វិញ បានបិទទ្វារតែភ្លេចចាក់សោ។ រួចហើយក៏បានធ្វើដំណើរចេញពីផ្ទះទាំងអស់គ្នាទៅ។ លុះដល់ថ្ងៃទី២ ខែឆ្នាំដដែល វេលាម៉ោង១១ថ្ងៃត្រង់ ពេលជនរងគ្រោះត្រឡប់មកដល់ផ្ទះវិញ ទើបដឹងថាមានចោរឡើងចូលលួចទូដែកតូច គ្មានដាក់លុយអស់១ ចំណែកឯទូដែកអាធំត្រូវបានចោរលើកមកដាក់នៅសំយ៉ាបខាងមុខ ក្រៅពីនេះពុំមានបាត់បង់អ្វីទៀតឡើយ។ ក្រោយទទួលបានដំណឹង សមត្ថកិច្ចបានចុះពិនិត្យកន្លែងកើត និងជួយស្រាវជ្រាវរកមុខសញ្ញាយកមកផ្តន្ទាទោសតាមច្បាប់៕
ដោយ៖កូឡាប
