រតនគិរី៖ មន្ត្រីជំនាញនគរបាលព្រហ្មទណ្ឌកម្រិតធ្ងន់ នៃស្នងការនគរបាលខេត្តរតនគិរី បានបញ្ជូនជនសង្ស័យ២នាក់ ករណីឃាតកម្មសម្លាប់មនុស្ស២នាក់ ក្នុងចំការចេកក្រុមហ៊ុនហ័ងអាញ់ នៅស្រុកកូនមុំ ខេត្តរតនគិរី ព្រោះរឿងសហាយស្មន់ ទៅតុលាការ នៅព្រឹកថ្ងៃទី៥ ខែសីហា ឆ្នាំ២០២០នេះ។
ជនសង្ស័យ ឈ្មោះ សេត លី ជាជនដៃដល់ និង ឈ្មោះ លី ក្រីវាន់ ជាអ្នកសមគំនិត។ សមត្ថកិច្ចបានរឹបអូសយកវត្ថុតាង ដូចជា ម៉ូតូ១គ្រឿង ជាមធ្យោបាយធ្វើសកម្មភាព កូនកាំបិតចុងស្រួច ១ គោម២ និងស្បែកជើង២គូ ជារបស់ជនរងគ្រោះ ។
សូមបញ្ជាក់ថា នៅយប់ថ្ងៃទី២៣ ខែកក្កដា ឆ្នាំ២០២០ មានករណីឃាតកម្មកើតឡើង ស្ថិតនៅក្នុងក្រុមហ៊ុនហង័អាន់យ៉ាឡាយចំការចេក ស្ថិតនៅក្នុងភូមិសាស្ត្រ ឃុំសេរីមង្គល ស្រុកកូនមុំ ខេត្តរតនគិរី។ រហូតដល់ថ្ងៃទី២៤ ខែកក្កដា ទើបមានការភ្ញាក់ផ្អើលដល់កម្លាំងសមត្ថកិច្ចថា មានមនុស្សដេកសម្លាប់នៅក្នុងចំការចេក ហើយកម្លាំងជំនាញបើកការស្រាវជ្រាវតែម្ដង។ ជនសង្ស័យ២នាក់ ត្រូវបានចាប់ខ្លួនជាបន្តបន្ទាប់ ដែលប្រតិបត្តិការនេះធ្វើឡើងក្រោមការបញ្ជាផ្ទាល់ពីនាយឧត្តមសេនីយ៍ សន្ដិបណ្ឌិត នេត សាវឿន អគ្គស្នងការនគរបាលជាតិ, ឧត្តមសេនីយ៍ឯក អ៊ិន បូរ៉ា អគ្គស្នងការរងទទួលផែន និងចង្អុលបង្ហាញយ៉ាងយកចិត្តទុកដាក់ពីលោកឧត្តមសេនីយ៍ឯក ង៉េង ជួ ប្រធាននាយកដ្ឋាននគរបាលព្រហ្មទណ្ឌ សហការជាមួយកម្លាំងនគរបាលខេត្តរតនគិរី (ម្ចាស់ករណី) និងកម្លាំងនគរបាលខេត្តត្បូងឃ្មុំ។
ជនដៃដល់ដែលសមត្ថកិច្ចចាប់ខ្លួនឈ្មោះ សេត លី បានសារភាពថា ជនរងគ្រោះទាំងពីរនាក់ (បងថ្លៃ ប្អូនថ្លៃ) ដែលខ្លួនចាក់សម្លាប់ មានម្នាក់ជាសហាយស្មន់ជាមួយប្រពន្ធរបស់ខ្លួន ហើយនៅថ្ងៃកើតហេតុ ខ្លួនបានឃើញប្រពន្ធ និងជនរងគ្រោះកំពុងដេកជាមួយគ្នា។ ជនរងគ្រោះទី១៖ឈ្មោះ បាក់ ណាន (សហាយជាមួយប្រពន្ធជនដៃដល់) និងទី២៖ឈ្មោះ គឹម សារឿន (បងថ្លៃ ឈ្មោះ បាក់ ណាន)។
ដោយចិត្តខឹងទ្រាំមិនបានប្រហែលម៉ោង៨យប់ ថ្ងៃកើតហេតុពេលជនរងគ្រោះ និងបងថ្លៃ កំពុងដើរឆ្លុះកង្កែប ខ្លួនបានជិះម៉ូតូទៅកាក់ពីមុខដើម្បីសួរនាំ ហើយក៏ដកកាំបិតចាក់ចំបំពង់កតែម្ដង។ ពេលនោះ បងថ្លៃរបស់ជនរងគ្រោះឃើញក៏រត់គេច ប៉ុន្ដែខ្លួនក៏ស្ទុះទៅចាក់ និងអារកបន្ថែមទៀត រហូតស្លាប់ទាំងពីរនាក់នៅក្នុងថ្លុកឈាម។ ក្រោយធ្វើសកម្មភាពរួចមក ជនដៃដល់បានរត់ទៅស្រុកកំណើត នៅស្រុកពញាក្រែក ខេត្តត្បូងឃ្មុំ៕
ដោយ៖បញ្ញាស័ក្តិ
