មនុស្សយ៉ាងហោចណាស់ចំនួន ១៧នាក់បានស្លាប់ នៅពេលយន្តហោះដឹកអ្នកដំណើរមួយគ្រឿងរបស់ឥណ្ឌា បានបាក់ជាពីរកំណាត់ ក្រោយពេលរត់រអិលធ្លាក់ផ្លូវ ពេលកំពុងចុះចត កាលពីថ្ងៃសុក្រម្សិលមិញ នៅក្នុងរដ្ឋ Kerala។
ក្នុងហេតុការណ៍នោះ ក៏បណ្តាលឲ្យមនុស្សជាង ១០០នាក់រងរបួសផងដែរ ដោយមាន ១៥នាក់រងរបួសធ្ងន់។ យន្តហោះប្រភេទ Boeing 373 របស់ក្រុមហ៊ុនអាកាសចរណ៍ Air India Express បានធ្វើដំណើរមកពី់ទីក្រុង Dubai ប្រទេសអារ៉ាប់រួម មុនពេលវារត់ធ្លាក់ផ្លូវដោយសារភ្លៀងធ្លាក់ខ្លាំងនៅក្នុងទីក្រុង Kozhikode របស់ឥណ្ឌា។
មន្ត្រីឥណ្ឌានិយាយថា មានបុគ្គលិកយន្តហោះ និងអ្នកដំណើរចំនួន ១៩១នាក់នៅលើយន្តហោះមុនពេលកើតហេតុណ៍។
បើតាមបញ្ជីអ្នកស្លាប់ ដែលទីភ្នាក់ងារសារព័ត៌មាន AFP បានឃើញ ក្នុងចំណោមអ្នកស្លាប់ មានទារកអាយុ ១០ខែម្នាក់ និងកូនក្មេងអាយុ ១៨ខែម្នាក់។
អ្នកបើកយន្តហោះម្នាក់ក្នុងចំណោម ២នាក់ ក៏បានស្លាប់ក្នុងហេតុការណ៍នោះផងដែរ។
សូមបញ្ជាក់ថា រដ្ឋ Kerala មានភ្លៀងធ្លាក់យ៉ាងខ្លាំងក្នុងរយៈពេលប៉ុន្មានថ្ងៃចុងក្រោយនេះ។ កាលពីថ្ងៃសុក្រផងដែរ មានមនុស្សចំនួនយ៉ាងតិច ១៥នាក់បានស្លាប់ ក្រោយពេលមានការរអិលបាក់ដី ដែលបណ្តាលមកពីភ្លៀងខ្លាំងនៅក្នុងរដ្ឋខាងលើ៕
អត្ថបទប្រែសម្រួលដោយ៖ សុភ័ក្រ
ប្រភព៖ CNA
