បច្ចុប្បន្ននេះ ឃើញថា ធុបបាស់ប្ល៊ូធូ បាននិងកំពុងមានការពេញនិយមខ្លាំងណាស់ សម្រាប់បងប្អូនជាប្រជាពលរដ្ឋខ្មែរយើង ចាក់ស្តាប់ ពិសេសច្រៀងលេងកម្សាន្តជួបជុំគ្នា នៅពាសពេញគ្រប់ទីកន្លែងមិនថានៅក្នុងទីក្រុង ឬ ជនបទស្រុកស្រែចម្ការនោះទេ។
តែទោះយ៉ាងណា ប្រជាពលរដ្ឋមួយចំនួន ដែលហាក់ខ្វះសុជីវធម៌ មិនខ្វល់ពីអារម្មណ៍អ្នករស់នៅជិត បានចាក់ធុងបាស់ឮៗ ពិសេសនោះ គឺស្រែកច្រៀងឡូឡារហូតទល់ៗយប់អធ្រាត្រ ដែលធ្វើឲ្យប្រជាពលរដ្ឋជិតខាង តែងតែឮរអ៊ូរទាំជាខ្លាំង។
ជាក់ស្តែង ដូចករណីនេះ ផ្ទះពលរដ្ឋមួយ ត្រូវបានសមត្ថកិច្ចចុះទៅអប់រំណែនាំដល់ផ្ទះទាំងយប់ បន្ទាប់ពីទទួលការខមិនត្អូញត្អែរពីប្រជាពលរដ្ឋជាអ្នកជិតខាង ប្រាប់ថា ផ្ទះខាងលើនេះបានចាក់ធុងបាស់ស្រែកច្រៀងឡូឡា បង្កការរំខានរកដេកពួនពុំបានសោះឡើយ ដែលរហូតយប់ជ្រៅម៉ោង ១០ និង ៣០ នាទី ទៅហើយ។
យោងតាមទំព័រហ្វេសប៊ុក ស្នងការដ្ឋាននគរបាលរាជធានីភ្នំពេញ បានឲ្យដឹងថា ក្រុមសមត្ថកិច្ចបានចុះទៅបញ្ឈប់សកម្មភាពប្រជាពលរដ្ឋខាងលើ និងបានធ្វើការអប់រំណែនាំ កុំឱ្យបង្កការរំខានដល់អ្នកជិតខាងបន្តទៀត ព្រោះថាអ្នកជិតខាងត្រូវការពេលវេលាសម្រាក បន្ទាប់ពីធ្វើការហត់នឿយពេញមួយថ្ងៃ និងព្រមទាំងអប់រំណែនាំពីការគោរពសិទ្ធិអ្នកដទៃ ក្នុងនាមជាអ្នករស់នៅភូមិផងរបងជាមួយគ្នាផងដែរ៕ ដោយ៖ លឹម ហុង
