អ្នកជំនាញនិយាយកាលពីថ្ងៃព្រហស្បតិ៍ម្សិលមិញថា លទ្ធភាពនៃការឆ្លងវីរុស COVID-19 ពីអាហារ ជាពិសេសពីអាហារក្លាស្សេ និងអាហារកញ្ចប់មានកម្រិតទាបបំផុត។
ការបញ្ជាក់នោះកើតឡើង ក្រោយពេលមានការព្រួយបារម្ភពីសេចក្តីរាយការណ៍របស់ចិន ដែលបានរកឃើញថា ស្លាបមាន់ក្លាស្សេដែលនាំចូលពីប្រទេសប្រេស៊ីលមកមានផ្ទុកវីរុស COVID-19។
“នេះមានន័យថានរណាម្នាក់ប្រហែលជាកាន់ស្លាបមាន់ទាំងនោះ ហើយពួកគេប្រហែលជាមានផ្ទុកវីរុសស្រាប់ហើយ”។ នេះជាការបញ្ជាក់របស់អ្នកស្រី Angela Rasmussen អ្នកជំនាញសិក្សាពីវីរុស និងជំងឺមកពីសកលវិទ្យាល័យ Columbia។
គោលការណ៍ណែនាំពីមជ្ឈបណ្ឌលបង្ការ និងគ្រប់គ្រងជំងឺ បានអះអាងថា “មិនមានភស្ថុតាងដែលបង្ហាញថា ការកាន់អាហារ ឬទទួលទានអាហារមានទាក់ទងនឹងការឆ្លង COVID-19 ឡើយ”។
ផ្លូវដ៏សំខាន់ដែលវីរុសឆ្លងពីមនុស្សម្នាក់ទៅមនុស្សម្នាក់ គឺតាមរយៈការកណ្តាស់ ក្អក ការនិយាយ និងសូម្បីតាមការដកដង្ហើម។
សូមបញ្ជាក់ថា កាលពីថ្ងៃម្សិលមិញ ចិនបានប្រកាសថា សំណាករបស់ស្លាបមាន់កក ដែលនាំចូលពីប្រទេសប្រេស៊ីលទៅទីក្រុង Shenzhen របស់ចិន ត្រូវបានគេពិនិត្យរកឃើញមានវីរុស COVID-19។
អាជ្ញាធរសុខាភិបាលទីក្រុង Shenzhen បានធ្វើការតាមដានភ្លាមៗ និងពិនិត្យលើមនុស្សទាំងអស់ ដែលមានការពាក់ព័ន្ធនឹងអាហារនោះ ប៉ុន្តែគ្មាននរណាម្នាក់វិជ្ជមានឡើយ។
កាលពីថ្ងៃពុធ ចិនបានរាយការណ៍ថា វីរុសកូរ៉ូណាត្រូវបានគេរកឃើញនៅលើកញ្ចប់បង្គាដែលនាំចូលពីប្រទេសអេក្វាឌ័រ។
ចាប់តាំងពីខែកក្កដាមក ទីក្រុងផ្សេងៗទៀតរបស់ចិន រួមទាំងទីក្រុងកំពង់ផែ Xiamen និង ទីក្រុង Dalian ក៏បានរាយការណ៍ករណីដូចគ្នាដែរ ដែលជាហេតុធ្វើឲ្យចិនផ្អាកការនាំចូលទំនិញពីអ្នកផលិតបង្គាអេក្វាឌ័រ។
សូមរំលឹកថា វីរុសកូរ៉ូណា ដែលមានឈ្មោះផ្លូវការថា COVID-19 ត្រូវបានគេជឿជាក់ថា បានផ្ទុះចេញពីទីផ្សារសត្វព្រៃ និងគ្រឿងសមុទ្ធ ក្នុងទីក្រុងវូហាន ប្រទេសចិន កាលពីចុងឆ្នាំមុន។ វីរុសនោះបានរាតត្បាតយ៉ាងលឿនទៅជុំវិញពិភពលោក។
តួលេខចុងក្រោយ បានបង្ហាញថាវាបានឆ្លងទៅកាន់មនុស្សជាង ២០,៦លាននាក់ និងបានសម្លាប់មនុស្សជាង ៧៤៩.០០០នាក់ទូទាំងពិភពលោក៕
ប្រែសម្រួលដោយ៖ សុភ័ក្រ
ប្រភព៖ Reuters
