ក្រសួងសុខាភិបាលវៀតណាមបានចុះឈ្មោះដើម្បីទិញវ៉ាក់សាំង COVID-19 របស់ប្រទេសរុស្ស៊ី ខណៈដែលវ៉ាក់សាំងអភិវឌ្ឍន៍ដោយខ្លួនឯងត្រូវការពេលយូរទៀត។ នេះបើតាមការចុះផ្សាយរបស់ទូរទស្សន៍រដ្ឋវៀតណាមនៅថ្ងៃសុក្រនេះ។
ការប្រកាសកម្មង់វ៉ាក់សាំងរុស្ស៊ី កើតឡើងខណៈដែលប្រទេសសមាជិកអាស៊ាននេះ កំពុងប្រយុទ្ធប្រឆាំងនឹងការផ្ទុះឡើងវិញ នូវវីរុសមរណៈនេះ បន្ទាប់ពីគ្មានការឆ្លងថ្មីអស់រយៈពេលជាច្រើនខែ។
រុស្ស៊ី និយាយកាលពីថ្ងៃពុធថា វ៉ាក់សាំង COVID-19 ដំបូងបង្អស់របស់ពិភពលោក នឹងត្រូវដាក់ឲ្យដំណើរការក្នុងរយៈពេល ២សប្តាហ៍ទៀត ហើយប្រទេសនេះក៏បានច្រានចោលការព្រួយបារម្ភ របស់អ្នកជំនាញដែលបានលើកឡើងថា វ៉ាក់សាំងនោះមិនទាន់ឆ្លងកាត់ការសាកល្បងពេញលេញ និងធ្វើការអនុម័តយ៉ាងលឿន។
រុស្ស៊ីនិយាយថា ប្រទេសចំនួន ២០បានធ្វើការកម្មង់ទុកមុននូវវ៉ាក់សាំង Sputnik V ចំនួន ១ពាន់លានដូស។ ដោយមានការសហការជាមួយដៃគូរបរទេស រុស្ស៊ីនឹងអាចមានសមត្ថភាពផលិតវ៉ាក់សាំងបានរហូតដល់ ៥០០លានដូសក្នុងមួយឆ្នាំ នៅក្នុងប្រទេសចំនួន ៥។
ទូរទស្សន៍វៀតណាម VTV ចុះផ្សាយថាដោយដកស្រងសម្តីពីក្រសួងសុខាភិបាលថា “វៀតណាមនៅតែបន្តអភិវឌ្ឍន៍វ៉ាក់សាំងផ្ទាល់ខ្លួន”។
ក្រសួងវៀតណាមមិនបានបញ្ជាក់ពីចំនួនវ៉ាក់សាំង ដែលខ្លួនបានកម្មង់ពីរុស្ស៊ី ឬពេលវេលាដែលខ្លួននឹងទទួលបានវាឡើយ។
ក្រសួងនិយាយថា វ៉ាក់សាំងផលិតដោយវៀតណាមនឹងមាននៅចុងឆ្នាំ ២០២១។
សូមបញ្ជាក់ថា វៀតណាមមានការទប់ស្កាត់ប្រឆាំងនឹងវីរុសកូរ៉ូណបានយ៉ាងល្អ ចាប់តាំងពីវាផ្ទុះរាតត្បាតចេញពីទីក្រុងវូហាន ប្រទេសចិនកាលពីចុងឆ្នាំ ២០១៩។
ប្រទេសដែលមានប្រជាជនជាង ៩៥លាននាក់នេះ មានអ្នកឆ្លងវីរុសសរុបទាំងអស់ចំនួន ៩១១នាក់ និងអ្នកស្លាប់ ២១នាក់៕
ប្រែសម្រួលដោយ៖ សុភ័ក្រ
ប្រភព៖ Reuters
