ភ្នំពេញ៖ ក្នុងឱកាសឈប់សម្រាក សងថ្ងៃបុណ្យចូលឆ្នាំ ២០២០នេះ ក្រសួងទេសចរណ៍ បានរំលឹកសាជាថ្មីដល់ម្ចាស់អាជីវកម្មរមណីយដ្ឋានទេសចរណ៍ នៅក្នុងរាជធានីភ្នំពេញ និងបណ្ដាខេត្តទាំងអស់ យកចិត្តទុកដាក់អនុវត្ត និងត្រូវរៀបចំស្របតាមវិធានសុវត្ថិភាពទេសចរណ៍ឱ្យបានខ្ជាប់ខ្ជួនប្រកបដោយស្មារតីទទួលខុសត្រូវ។
ការក្រើនរំលឹករបស់ក្រសួងទេសចរណ៍ រួមមាន៖ ការលាងសម្អាតដៃ និងអាកុលជាប្រចាំ ការរក្សាគម្លាតសុវត្ថិភាព ត្រូវវាស់កម្តៅរាល់អ្នកចេញចូល ត្រូវពាក់ម៉ាស ត្រូវសម្អាតបរិវេណបន្ទប់ទឹក និងទីតាំងនានា ដែលភ្ញៀវទេសចរប្រើប្រាស់ញឹកញាប់ មធ្យោបាយឲ្យបានជាប់ជាប្រចាំ និងឲ្យបានត្រឹមត្រូវ និងត្រូវអនុវត្តតាមវិធានការណែនាំសំខាន់ៗមួយចំនួនទៀត ស្របតាមខ្លឹមសារក្រមប្រតិបត្តិ ស្ដីពី វិធានសុវត្ថិភាពទេសចរណ៍សម្រាប់អាជីវកម្មរមណីយដ្ឋានទេសចរណ៍។ ក្នុងនោះ ក្រសួងទេសចរណ៍សូមធ្វើការអំពាវនាវពីភ្ញៀវទេសចរ សហការចូលរួមចុះឈ្មោះក្នុងពេលចូលក្នុងរមណីយដ្ឋានទេសចរណ៍នានា៕
ដោយ : CEN
