ខេត្តកំពង់ស្ពឺ៖លោក កង ភារី អធិការរងនគរបាលស្រុកសំរោងទង ត្រូវបាននគរបាលនៃស្នងការដ្ឋានគរបាលខេត្តកំពង់ស្ពឺ ធ្វើការឃាត់ខ្លួន និងរាយការណ៍ទៅថ្នាក់លើដើម្បីដាក់វិន័យកងកម្លាំង បន្ទាប់ពីលោកអធិការរងរូបនេះបានផឹកស៊ី បង្កភាពអាណាធិបតេយ្យបាញ់បោះសេរី។
ក្រោយពីនិយាយអួតក្អេងក្អាងចប់រួចមក លោកអធិការរងទទួលផែនសន្តិសុខរូបនេះ បានទាញអាវុធខ្លីរបស់ខ្លួន ម៉ាកឡុក ទៅឈរបាញ់លេងយ៉ាងអាណាធិបតេយ្យ នៅក្នុងបរិវេនសាលាស្រុកសំរោងទង ចំណុចមាត់ត្រពាំងទឹកខាងត្បូង ជាមួយកូនចៅរបស់ខ្លួនជាច្រើននាក់។
បន្ទាប់ពីការបាញ់បោះយ៉ាងអនាធិបតេយ្យនេះ សមត្ថកិច្ចស្នងការដ្ឋាននគរបាលខេត្តកំពង់ស្ពឺ នៃកងអន្តរាគមន៍ ធ្វើការឃាត់ខ្លួនយកទៅសួរនាំ នៅស្នងការដ្ឋាននគរបាលខេត្តកំពង់ស្ពឺ។
យោងតាមរបាយការណ៍ដែលអធិការដ្ថាននគរបាលស្រុកសំរោងទង គោរពផ្ញើជូនលោកស្នងការនគរបាលខេត្តកំពង់ស្ពឺ ចុះថ្ងៃទី២០ ខែសីហា ឆ្នាំ២០២០ បានរៀបរាប់ថា កាលពីថ្ងៃទី១៨ ខែសីហា ឆ្នាំ២០២០ វេលាម៉ោង៩ និង០០ នាទីលោកវរសេនីយ៍ទោ កង ភារី អធិការរងទទួលការងារសន្តិសុខ នៃអធិការដ្ឋាននគរបាលស្រុកសំរោងទង បានយកអាវុធខ្លីរបស់ខ្លួនមួយដើមម៉ាកឡុក ធ្វើសកម្មភាពឈរបាញ់បោះយ៉ាងសេរី អាណាធិបតេយ្យបំផុតចំនួន ៣គ្រាប់ គឺនៅចំណុចបរិវេណសាលាស្រុកមាត់ស្រះទឹកខាងត្បូង។ លុះមកដល់ថ្ងៃទី១៩ ខែសីហា ឆ្នាំ២០២០ វេលាម៉ោង១៨ និង៣០ នាទីលោកវរសេនីយ៍ទោ កង ភារី អធិការរង បាននាំកូនចៅក្រោមឱវាទផឹកស៊ីស្រវឹង និយាយអួតក្អេងក្អាងហើយបានយកអាវុធខ្លីម៉ាកឡុក មកឈរបាញ់បោះលេងយ៉ាងសេរី នៅក្នុងបរិវេណសាលាស្រុក ចំណុចមាត់ស្រះទឹកដដែល ក្នុងនោះកូនចៅរបស់ខ្លួនជាច្រើន ដែលផឹកស៊ីក៏បានចូលរួមក្នុងការបាញ់បោះនេះដែរ រួមមាន លោកអនុសេនីយ៍ឯក ដន សុខុម ឋានៈនាយរងផ្នែកសន្តិសុខ បាញ់ចំនួន២គ្រាប់ លោកអនុសេនីយ៍ត្រី ព្រីង ឡងឌី ឋានៈនាយរងប៉ុស្តិ៍វល្លិ៍សបាញ់ចំនួន២ គ្រាប់ លោកអនុសេនីយ៍ត្រី តាន់ សៅលី ឋានៈនាយរងផ្នែកគ្រឿងញៀនបាញ់ចំនួន ២គ្រាប់ លោកអនុសេនីយ៍ត្រី ម៉ាន់ ប៊ុណ្ណារ៉ា ឋានៈនាយរងផ្នែកគ្រឿងញៀនបាញ់ចំនួន២គ្រាប់ លោកព្រិន្ទបាលទោ ឌី សូភក្តិ ឋានៈមន្ត្រីប៉ុស្តិ៍ទំព័រមាសបាញ់ចំនួន២ គ្រាប់។
ការបាញ់បោះបង្កភាពអាណាធិបតេយ្យ បង្កើតឲ្យមានអសន្តិសុខនៅក្នុងសង្គមរបស់ ក្រុមមន្ត្រីនគរបាលនិងលោក កង ភារី សមត្ថកិច្ចជំនាញបានរកឃើញសម្បកគ្រាប់នៅកន្លែងកើតហេតុចំនួន១១ គ្រាប់ ហើយលោកអធិការងដ៏ទំនើងរូបនេះ ត្រូវបានសមត្ថកិច្ចកម្លាំងការិយាល័យអន្តរាគមន៍ ឃាត់ខ្លួននៅវេលាម៉ោង២២និង៣០នាទីថ្ងៃទី២០ខែសីហាឆ្នាំ២០២០។
លោកឧត្តមសេនីយ៍ទោ សម សាមួន ស្នងការនគរបាលខេត្តកំពង់ស្ពឺ បានឲ្យអ្នកយកព័ត៌មានក្នុងស្រុកថា លោកបានរាយការណ៍ទៅថ្នាក់លើ ដើម្បីឲ្យដាក់តាមវិន័យរបស់កងកម្លាំងអគ្គស្នងការនគរបាលជាតិលេខ០០៦ ឲ្យសមទោសកំហុសដែលមន្ត្រីនគរបាលយុត្តិធម៌បានប្រព្រឹត្ត។ លោកស្នងការនគរបាលខេត្តបន្តថា លោកវរសេនីយ៍ទោ កង ភារី បានបាញ់បោះចំនួន២លើក កាលពីថ្ងៃទី១៨ ខែសីហា ឆ្នាំ២០២០ បាញ់ចំនួន៣គ្រាប់ ហើយនៅយប់ថ្ងៃទី១៩ខែសីហា ឆ្នាំ២០២០ បាញ់ចំនួន១៧គ្រាប់បន្ថែមទៀត។ ហើយរហូតមកដល់ពេលនេះ ជំនាញប្រមូលបានជាង១០គ្រាប់តែប៉ុណ្ណោះ កំពុងតែរុករកបន្ថែមទៀត។
ពេលនេះកម្លាំងនគរបាលជំនាញ នៃស្នងការដ្ឋាននគរបាលខេត្តកំពង់ស្ពឺ កំពុងតែធ្វើការសាកសួរលោកអធិការរងរូបនេះ រកមូលហេតុដើមចម នៃការបង្កភាពអាណាធិបតេយ្យ និងបង្កបញ្ហាអសន្តិសុខដល់សង្គម ក្នុងឋានៈខ្លួនជាសមត្ថកិច្ចគួរធ្វើជាគំរូដល់ប្រជាពលរដ្ឋ និងជាអ្នកការពារសន្តិសុខសុវត្ថិភាព តែបែរជាប្រព្រឹត្តិទង្វើដែលសង្គមស្អប់ខ្ពើមទៅវិញ។
លោកកង ភារីហៅម៉ៅ ផឹកស៊ីនៅក្នុងអធិការដ្ឋាននគរបាលស្រុកសំរោងទងហើយបង្កបញ្ហាបាញ់បោះ បង្កភាពអនាធិបតេយ្យ ដោយគ្មានខ្លាចរអែងច្បាប់បន្តិចណាទាល់តែសោះ ខណៈខ្លួនគឺជាអ្នកអនុវត្តច្បាប់ ។
សូមរំលឹកផងដែរថា ការបាញ់បោះសេរីរបស់លោក កង ភារី មិនមែនជាលើកទី១នោះទេ រាល់ពេលដែលផឹកស៊ីម្តងៗ លោកអធិការរងនេះ តែងតែបាញ់បោះសេរី បង្អួតកូនចៅថាគ្មានអ្នកហ៊ានមកចាប់ខ្លួនលោកឡើយ ព្រោះមានខ្នងបង្អែកយ៉ាងធំរឹងមាំនៅក្រសួងមហាផ្ទៃ៕ ដោយ៖បញ្ញាស័ក្តិ
