ភ្នំពេញ៖កូនប្រុសបង្កើតចិត្តតិរច្ឆានយកកាំបិតកាត់ក្បាលម្តាយរបស់ខ្លួន ក្នុងបុរីសឡា៣ នៅចំណុចខាងកើតពេទ្យមូលមិត្ត ភូមិចោមចៅ៣ សង្កាត់ចោមចៅ២ ខណ្ឌពោធិ៍សែនជ័យ នាព្រឹកថ្ងៃទី២៩ ខែសីហា ឆ្នាំ២០២០ ត្រូវបានសមត្ថកិច្ចចាប់ខ្លួនបានហើយ នៅដីឡូត៍មួយកន្លែង ក្រោយសាកលវិទ្យាល័យ IU នៃខណ្ឌសែនសុខ ។
នេះបើតាមសម្ដីប្អូនស្រីម្នាក់ដែលជាអ្នកប្រទះឃើញភិនភាគជនសង្ស័យខាងលើ មានសភាពអាក្រាតកាយ បានដើរកាត់តាមផ្លូវម្ដុំមុខផ្ទះ រួចដើរទៅក្នុងដីឡូត៍មួយកន្លែង ក្រោយសាកលវិទ្យាល័យ IU នៃខណ្ឌសែនសុខ ហើយបានផ្ដល់ព័ត៌មានឲ្យសមត្ថកិច្ចខណ្ឌសែនសុខបានដឹង បន្ទាប់ពីទទួលបានដំណឹងនេះ លោកវរសេនីយ៍ឯក ហួរ ម៉េងវ៉ាង អធិការដ្ឋាននគរបាលខណ្ឌសែនសុខ បានឲ្យកម្លាំងចុះទៅពិនិត្យមើលភ្លាម ដោយមានទាំងលោក ជាវ វិបុល អនុប្រធាននាយកដ្ឋាននគរបាលព្រហ្មទណ្ឌ បានកំពុងដឹកនាំកម្លាំងជំនាញ សហការជាមួយកម្លាំងនគរបាលខណ្ឌសែនសុខ និងខណ្ឌពោធិ៍សែនជ័យ បានចុះទៅដល់ ជនសង្ស័យមានសភាពអាក្រាតកាយ និងបម្រុងចងកសម្លាប់ខ្លួន តែត្រូវសមត្ថកិច្ចទៅដល់ទាន់ក៏ចាប់ឃាត់ខ្លួនបានតែម្ដង ។
លោកឧត្តមសេនីយ៍ត្រី ជាវ វិបុល អនុប្រធាននាយកដ្ឋាននគរបាលព្រហ្មទណ្ឌ បានប្រាប់បណ្ដាញព័ត៌មានឲ្យដឹងថា ជនដៃដល់ត្រូវកម្លាំងជំនាញចាប់ខ្លួនបានហើយ ពេលកំពុងរត់គេចខ្លួន ហើយជនដៃដល់បម្រុងធ្វើសកម្មភាពចងកសម្លាប់ខ្លួនឯងតាមក្រោយ។
ប្រតិបត្តិការនេះធ្វើឡើងដោយសហការរវាងកម្លាំងនាយកដ្ឋាននគរបាលព្រហ្មទណ្ឌ, កម្លាំងនគរបាលខណ្ឌពោធិ៍សែន និងកម្លាំងនគរបាលខណ្ឌសែនសុខ នៃស្នងការដ្ឋាននគរបាលរាជធានីភ្នំពេញ។
តាមប្រភពព័ត៌មានពីសមត្ថកិច្ចមូលដ្ឋានបានបញ្ជាក់ថា ជនដៃដល់ឈ្មោះ អ៊ាម សំណាង អាយុ៣២ឆ្នាំ ជាមនុស្សសរសៃប្រសាទ។
គួរជម្រាបថា នៅវេលាម៉ោងប្រមាណ៧ព្រឹកមិញនេះ មានករណីឃាតកម្មមួយកើតឡើង ដោយកូនសម្លាប់ម្ដាយបង្កើតខ្លួនឯងដោយកាត់ក្បាលចេញពីខ្លួន ស្ថិតក្នុងបន្ទប់ជួល សង្កាត់ចោមចៅទី២ ខណ្ឌពោធិ៍សែនជ័យ រាជធានីភ្នំពេញ។
បច្ចុប្បន្ននេះ ជនសង្ស័យត្រូវបានបញ្ជូនទៅអធិការដ្ឋាននគរបាលខណ្ឌពោធិ៍សែនជ័យ ជាម្ចាស់ករណី ដើម្បីបន្តនីតិវិធី ៕ដោយ៖មីដា
