ភ្នំពេញ ៖ បុរសជាចុងភៅត្រូវបានតុលាការក្រុងភ្នំពេញ សម្រេចឲ្យឃុំខ្លួនបណ្តោះអាសន្នសិន នៅគុកព្រៃស បន្ទាប់សមត្ថកិច្ចខណ្ឌមានជ័យចាប់ខ្លួនថ្ងៃទី២៨ ខែសីហា ឆ្នាំ២០២០នេះ ក្រោមបទហិង្សាដោយចេតនា ដាក់ថ្នាំពុលក្នុងអាហារ សង្ស័យដោយសហការគ្នាជាមួយប្រពន្ធជនរងគ្រោះ ក្នុងបាយសម្លឲ្យប្តីហូបជាច្រើនខែ បណ្តាលឲ្យប្តីឈឺក្រពះ ទើបបែកការរឿងសហាយស្មន់ ទៅអយ្យការអមសាលាដំបូងរាជធានីភ្នំពេញ ដើម្បីធ្វើការសាកសួរ។
ចៅក្រមស៊ើបសួរសាលាដំបូងរាជធានីភ្នំពេញ កាលពីថ្ងៃ៣០ ខែសីហា ឆ្នាំ២០២០ បានសម្រេចចេញដីកាឃុំខ្លួនជនត្រូវចោទមា្នក់ឈ្មោះ ស្រេង ចាន់ណា ភេទប្រុស អាយុ ២១ឆ្នាំ មុខរបរ ចុងភៅ ស្នាក់នៅផ្ទះកើតហេតុខាងលើ ភូមិព្រៃសំបួរកើត ឃុំមៀន ស្រុកអូរាំងឪ ខេត្តកំពង់ចាម ដាក់ពន្ធនាគារជាបណ្តោះអាសន្ន ក្រោមការចោទប្រកាន់ពីបទហិង្សាដោយចេតនា ដាក់ជាតិពុលក្នុងម្ហូបអាហារ តាមមាត្រា២២៦ , ២២៧នៃក្រមព្រហ្មទណ្ឌ ។ ចំណែកជនសង្ស័យជាប្រពន្ធមានឈ្មោះ តាំង លីណា អាយុ២៥ (រត់គេចខ្លួន) ។
ការឃាត់ខ្លួនជនជាប់បន្ទាប់ពីបុរសជាប្តី និងជាជនរងគ្រោះមានឈ្មោះ ហ្វុង លីម ភេទប្រុស អាយុ ៣០ឆ្នាំ មុខរបរ បុគ្គលិកក្រុមហ៊ុនឯកជន ស្នាក់នៅផ្ទះលេខ៩១១C ផ្លូវ៧៥C ស្ថិតនៅភូមិចំរើនផល សង្កាត់ បឹងទំពុនទី១ ខណ្ឌមានជ័យ រាជធានីភ្នំពេញ បានដាក់ពាក្យប្តឹងទៅសមត្ថកិច្ចក្រោយពេលសង្ស័យលើប្រពន្ធគាត់ បែករឿងថាសយស្មន់ទៀត។
តាមមាត្រា២២៦ ចែងថា “អំពើលក់ ធ្វើអនុប្រទាន ឬឲ្យចំណីឬភេសជ្ជៈ ដោយដឹងថាចំណីឬភេសជ្ជៈ មានសារធាតុពុល នាំឲ្យខូចសុខភាពនោះ ត្រូវចាត់ទុកជាអំពើហិង្សាដោយចេតនា”។
មាត្រា២២៧ បទអំពើហិង្សាដោយចេតនា ត្រូវផ្តន្ទាទោសដាក់ពន្ធនាគារពី១ឆ្នាំដល់៣ឆ្នាំ និងពិន័យជាប្រាក់ពី២លានរៀល ដល់៤លានរៀល ប្រសិនតុលាការស្រាវជ្រាវរកឃើញកំហុស។
សមត្ថកិច្ចបានលើកឡើងទៀតថា តាមជនរងគ្រោះរៀបរាប់ថា គាត់ចេះតែឆ្ងល់ថា មួយរយៈងងុកដេកខុសប្លែកធម្មតា ហូបបាយមិនទាន់អស់ពីចានដេកលក់បាត់ព្រឹកឡើងនៅលើគ្រែ ការពិតប្រពន្ធខ្លួនសហការ និងចុងភៅដាក់ថ្នាំងងុកដេកក្នុងម្ហូបអាហារសោះ ដើម្បីផ្អើមល្ហែមគ្នានៅពេលយប់។
សង្ស័យចំនួន២នាក់ គឺ១.ឈ្មោះ ស្រេង ចាន់ណា ភេទប្រុស អាយុ ២១ឆ្នាំ មុខរបរ ចុងភៅ ស្នាក់នៅផ្ទះកើតហេតុខាងលើ ភូមិព្រៃសំបួរកើត ឃុំមៀន ស្រុកអូរាំងឪខេត្តកំពង់ចាម ជនសង្ស័យ២.ជាប្រពន្ធមានឈ្មោះ តាំង លីណា អាយុ២៥ ឆ្នាំ បានរត់គេចខ្លួន ៕ដោយ៖ឡេង បញ្ញាឬទ្ធិ
