ភ្នំពេញ៖ កាលពីអំឡុងខែកក្កដា កន្លងទៅនេះ មានរឿងរ៉ាវមួយរវាងលោកអាចារ្យ អេ និងម៉ែរួយ ដែលទើបឡើងងារជាឱកញ៉ាកាលពីពេលថ្មីៗនេះ បានផ្ទុះកក្រើកពេញបណ្តាញសង្គមតែម្តង បន្ទាប់ពីម៉ែរួយ បានចេញលិខិតគំរាមប្តឹងអាចារ្យអេ ដែលត្រូវបានចោទប្រកាន់និយាយបរិហារកេរ្តិ៍ខ្លួន។
ក្នុងលិខិតឆ្លើយតប និងគំរាមប្តឹងចាត់វិធានការផ្លូវច្បាប់នោះ គឺត្រូវបានធ្វើឡើងបន្ទាប់ពីលោក អាចារ្យ អេ ដែលហាក់បានដឹងរឿងស៊ីជម្រៅ ដែលជាហេតុធ្វើឲ្យម៉ែរួយ ឆេះកំហឹងបានចោទប្រកាន់ថា លោក អាចារ្យ អេ បានវាយប្រហារមកលើក្រុមហ៊ុនរបស់នាង និងបរិហារកេរ្តិ៍មកលើរូបនាងតែម្តង ដែលថាជាបក្ខពួករកស៊ីបោកប្រាស់ ទៅលើតំណាងចែកចាយរបស់ខ្លួនដែលសុទ្ធតែពួកភ្លើខំខ្ចីលុយជំពាក់បំណុលគេ មកទិញផលិតផលរបស់នាងទៅលក់បន្ត។
ក្រោយពីបានឃើញលិខិតនោះ លោក អាចារ្យ អេ បានធ្វើការឆ្លើយតបទៅកាន់អ្នកនាង ស្រី ណារួម ដែលជាអគ្គនាយកក្រុមហ៊ុន ROUY INFINITY CO.,LTD ដែលជាបឋម អាចារ្យ អេ សម្តែងនូវការសោកស្តាយចំពោះការយល់ច្រឡំដែលស្មានថា នាងជាជនជាតិថៃ និងសូមការកោតសរសើរចំពោះ ម៉ែរួយ ដែលបានចេញលិខិតដាស់តឿនមួយនេះ ដោយពុំបង្ហាញកាយវិការក្តែងៗដូចអ្នកដទៃ នេះជាសុជីវធម៌ថ្លៃថ្នូរមួយ។
អាចារ្យ អេ បន្តថា លោកនឹងលំឱនកាយទទួលយកចំពោះការដាស់តឿននេះ ប៉ុន្តែ ប្រសិនបើម៉ែរួយ ចង់ប្រើភាសាគំរាមវិញ លោកសូមឲ្យម៉ែរួយ ជ្រាបច្បាស់ថា ២០ ឆ្នាំ កន្លងមកនេះ ABC បានជួបរឿងរ៉ាវជាច្រើនរហូតដល់ថ្នាក់ត្រូវប្តូរជីវិត ដើម្បីតែផលប្រយោជន៍ប្រជាពលរដ្ឋ តែមិនដែលករណីណាដែល ABC ចាញ់ឡើយ។ លោកថា រឿងផ្ទាល់ខ្លួនលោកសុខចិត្តចុះចាញ់ ព្រោះចាស់ហើយមិនចង់តតាំងនឹងរឿងកំប៉ិចកំប៉ុកដូចនេះទេ តែបើរឿងប៉ះពាល់ដល់សង្គម ទៅលើប្រជាពលរដ្ឋទន់ខ្សោយជាដើម គឺលោកមិនចុះចាញ់ដាច់ខាត។
ទោះយ៉ាងណា អាចារ្យ អេ នៅតែនិយាយយ៉ាងចំហរថា បើជាសារដាស់តឿន លោកសូមឱនកាយទទួលខុស ព្រោះវាធ្វើឲ្យប៉ះពាល់ផលប្រយោជន៍ ម៉ាដាម រួយ និងបក្ខពួកជាច្រើនដែលបានផលប្រយោជន៍ពីម៉ាដាម រួយ ដែលកំពុងក្លាយជាអ្នកមានច្រើនគ្នា តែលោកសំដៅទៅលើតែអ្នកជោគជ័យទេ សម្រាប់អ្នកមិនជោគជ័យលោកមិននិយាយ ព្រោះខ្លាចខ្លាសគេ ដែលឲ្យគេបោកក្បាលបានយ៉ាងស្រួលៗនោះ។
តែយ៉ាងណាមិញ ក្រោយពីបានឃើញ អាចារ្យ អេ បានធ្វើការបកស្រាយខាងលើ ក៏ស្រាប់តែមានសារព័ត៌មានមួយបានធ្វើការចុះផ្សាយ ដោយលើកឡើងថា អាចារ្យ អេ បានចោទវាយហារម៉ែរួយ ប្រើគ្រប់វិធីសាស្ត្រដើម្បីបោកប្រាស់គេ ទាំងពុំបានស្គាល់ម៉ែរួយច្បាស់ផង ដោយនិយាយចោទធ្វើឡើងតែទៅតាមប្រិយមិត្តខ្លួនផ្តល់ព័ត៌មានឲ្យប៉ុណ្ណោះ និងព្រមទាំងដាក់ចំណើងជើងថា «ផ្ទុះសង្គ្រាមពាក្យសម្តី ម៉ែរួយ និងអាចារ្យអេ ផ្អើលពេញហ្វេសប៊ុកតាមពិតគឺជារឿងយល់ច្រឡំ» ស្រាប់តែ អាចារ្យ អេ សម្តែងការហួសចិត្តទ្រាំពុំបាន ក៏ចេញប្រតិកម្មទៅកាន់សារព័ត៌មាននោះថា មិនចង់តបតរឿងអ្វីបន្តទៀតនោះទេ តែគ្រាន់តែចង់បង្រៀនសកលវិទ្យាល័យវិជ្ជាជីវៈសារព័ត៌មានអនអ៊ែរប៉ុណ្ណោះ ដោយក្នុងនោះ អាចារ្យអេ បានបញ្ជាក់ប្រាប់ថា អត់មានអ្នកណាមកប្រាប់អាចារ្យ អេ នោះទេ គឺអាចារ្យ អេ បានដឹងរឿងនេះខ្ទេចអស់រាប់ឆ្នាំទៅហើយ ប៉ុន្តែ មិនចង់ទៅប៉ះពាល់ គ្រាន់តែក្រោយឡើង វាធ្វើឲ្យប៉ះពាល់ដល់បុគ្គលិក ABC ដែលលោកភ្ញាក់ផ្អើលថា ម្នាក់ធ្វើការនៅ ABC នៅភ្លើអ៊ីចឹងទៀត ចុះទម្រាំអ្នកស្រុកភ្លើប៉ុណ្ណា ត្រូវគេបោកក្បាលបានប៉ុណ្ណា។
លើសពីនេះ នៅត្រង់ចំណុចលើកឡើងថា អាចារ្យ អេ និយាយថា ក្រុមហ៊ុនម៉ែរួយ ជាក្រុមហ៊ុនស្របច្បាប់ និងឈប់វាយប្រហារម៉ែរួយតទៅទៀតហើយចាប់ពីថ្ងៃនេះទៅ ក៏ត្រូវបាន អាចារ្យ អេ ប្រតិកម្មហួសចិត្តទៀតថា អាចារ្យ ទទួលស្គាល់នូវពាក្យថា អាក្រុមហ៊ុនហ្នឹងវាស្របច្បាប់ ប៉ុន្តែ ហេតុអ្វីមិនយកពាក្យដែលលោកថា ស្របច្បាប់ តែយកប្រៀបទៅលើអ្នកទន់ខ្សោយ ទៅលើពួកអាភ្លើមីភ្លើ មកនិយាយតផង។ ហើយមួយវិញទៀត ពាក្យថាឈប់និយាយ គឺលោកចង់និយាយសំដៅថា «អាញ់ចាស់ហើយ អាញ់មិនចង់តស៊ូតតាំងជាមួយនាងឯង ម៉ែរួយទេ» មិនមែនឈប់និយាយក្រោយដឹងថាក្រុមហ៊ុនម៉ែរួយស្របច្បាប់ តែប្រើគ្រប់វិធីបោកក្បាលពួកអាភ្លើមីភ្លើនោះទេ សូមជ្រាប៕ ដោយ៖ លឹម ហុង
