កណ្ដាល ៖ លោក វេង សាខុន រដ្ឋមន្ដ្រីកសិកម្ម រុក្ខាប្រមាញ់ និងនេសាទ នាព្រឹកថ្ងៃទី៧ ខែកញ្ញា ឆ្នាំ២០២០នេះ បានអញ្ជើញមកជួបសំណេះសំណាល សាកសួរសុខទុក្ខ និងនាំយកកូនត្រីអណ្តែង និងសម្ភារចិញ្ចឹមមួយចំនួនទៀត មកចែកជូនកសិករ នៅភូមិព្រែកតូច ឃុំព្រែកដាច់ ស្រុកលើកដែក ខេត្តកណ្តាល។
ក្រសួងកសិកម្មរុក្ខាប្រមាញ់និងនេសាទ បានប្រកាសថា នាព្រឹកថ្ងៃចន្ទ ទី៧ ខែកញ្ញា ឆ្នាំ២០ ២០ ឯកឧត្តមរដ្ឋមន្ត្រី វេង សាខុន ឯកឧត្តម អ៊ុក ដាមរី អ្នកតំណាងរាស្ត្រមណ្ឌលកណ្តាល ឯកឧត្តម ហាក់ ប៊ុនធឿន រដ្ឋលេខាធិការក្រសួងធម្មការ និងសាសនា ឯកឧត្តម នូវប៉េង ច័ន្ទតារា អភិបាលរងនៃគណអភិបាលខេត្ត បានអញ្ជើញមកជួបសំណេះសំណាល សាកសួរសុខទុក្ខ និងនាំយកកូនត្រីអណ្តែង និងសម្ភារចិញ្ចឹមមួយចំនួនទៀតមកចែកជូនកសិករ នៅភូមិព្រែកតូច ឃុំព្រែកដាច់ ស្រុកលើកដែក ខេត្តកណ្តាល។
ឯកឧត្តម នូវប៉េង ច័ន្ទតារា បានរាយការណ៍ជូនអង្គពិធីជ្រាបដោយសង្ខេបអំពីវឌ្ឍនភាពនៃវិស័យកសិកម្មនៅទូទាំងខេត្តកណ្តាល ជាពិសេសផលិតកម្មបន្លែដែលទូទាំងខេត្តមានលទ្ធភាពផ្គត់ផ្គង់ឲ្យទីផ្សាររាជធានីភ្នំពេញបានជាង ៤០០តោនក្នុង១ថ្ងៃ។ ដោយឡែកវិស័យវារីវប្បកម្មនៅទូទាំងខេត្តមាន ២៨សហគមន៍នេសាទ តំបន់អភិរក្សមាន ៥កន្លែង និងអន្លុងអភិរក្សមាន ៨ កន្លែង និងមាន ១៧គ្រួសារចិញ្ចឹមត្រី មានស្រះចិញ្ចឹម ១៧ មានត្រីពូជ ១៣៤ ០០០ ក្បាល។ ក្រៅពីនេះ ក៏មានកសិករចិញ្ចឹមត្រីតាមបែមាន ៨គ្រួសារ មានបែចំនួន ២០។
បន្ទាប់មក ឯកឧត្តមរដ្ឋមន្ត្រីបានធ្វើការសំណេះសំណាលដោយបានពាំនាំនូវការផ្តាំផ្ញើសាកសួរសុខទុក្ខពីសម្តេចតេជោ ហ៊ុន សែន នាយករដ្ឋមន្ត្រី មកជូនប្រជាពលរដ្ឋនៅទូទាំងខេត្តកណ្តាល ព្រមទាំងជូនពរបងប្អូនប្រជាពលរដ្ឋគ្រប់ៗក្រុមគ្រួសារឲ្យជួបតែពុទ្ធពរទាំង ៤ប្រការកុំបីឃ្លាងឃ្លាតឡើយ។ ឆ្លៀតយកឱកាសនេះ ឯកឧត្តមរដ្ឋមន្ត្រីជម្រាបជូនអង្គពិធីផងដែរអំពីការងារបង្កបង្កើនផល (ស្រូវ បន្លែ ដំណាំ មាន់ ជ្រូក ត្រី និងកង្កែប)។ ដោយឡែក ការងារវារីវប្បកម្ម។
ឯកឧត្តមរដ្ឋមន្ត្រីបានជម្រាបជូនអង្គពិធីជ្រាបថាតាមប្រសាសន៍ណែនាំដ៏ខ្ពង់ខ្ពស់របស់សម្តេចតេជោកាលពីថ្ងៃទី១៨ ខែកុម្ភ: និងកាលពីថ្ងៃទី១៤ ខែ កក្កដាកន្លងមកសម្តេចបានណែនាំឲ្យប្រជាពលរដ្ឋ និងជាពិសេសក្រសួងកសិកម្ម រុក្ខាប្រមាញ់ និងនេសាទឲ្យខិតខំជំរុញការងារផលិតកម្មស្បៀង ដើម្បីចូលរួមបង្កើនផលិតភាពផលិតកម្មស្បៀង បង្កើតការងារ តាមរយ:ការពង្រឹង និងពង្រីកសកម្មភាពចិញ្ចឹមត្រី និងកង្កែប ដាំដំណាំ និងបន្លែបង្កាជាលក្ខណៈគ្រួសារដើម្បីបង្កើតចំណូល ធានាសន្តិសុខស្បៀងក្នុងគ្រួសារ ស្របពេលដែលវិស័យមួយចំនួនទៀតកំពុងប្រឈមបញ្ហាដោយសារជំងឺឆ្លងកូវីដ-១៩ ជាពិសេសនោះសម្រាប់កម្មវិធីដ៏មានសារសំខាន់នេះ សម្តេចតេជោបានជួយឧបត្ថម្ភថវិកាចំនួន ២០០០ លានរៀលផងដែរ។
ក្រៅពីផលិតកម្មស្បៀង ឯកឧត្តមរដ្ឋមន្ត្រីក៏បានរំលេចជូនអង្គពិធីផងដែរអំពីស្ថានភាពសេដ្ឋកិច្ចរបស់ប្រទេសជាតិ និងការកសាងហេដ្ឋារចនាសម្ព័ន្ធចាំបាច់ ជាក់ស្តែង នៅខេត្តព្រះសីហនុ ហើយថ្មីៗសម្តេចតេជោ ហ៊ុន សែន នាយករដ្ឋមន្ត្រីបានអនុម័តថវិកា ១៥០ លានដុល្លារដើម្បីរៀបចំរចនាសម្ព័ន្ធផ្លូវថ្នល់ក្នុងទីរួមខេត្តសៀមរាប។
ចំពោះការចិញ្ចឹមត្រី ឯកឧត្តមរដ្ឋមន្ត្រីបានណែនាំឲ្យមន្ទីរ មន្ត្រីជំនាញរដ្ឋបាលជលផល និងអាជ្ញាធរមូលដ្ឋានត្រូវខិតខំពុះពារគ្រប់បែបយ៉ាងចុះមកជួយជំរុញការចិញ្ចឹមត្រី និងកង្កែប ដាំបន្លែ ចិញ្ចឹមសត្វ ធ្វើយ៉ាងណាបង្កើនផលិតភាពផលិតកម្មស្បៀង តាមរយ:ការបង្កើនផលិតភាពផលិត ក្លាយវិបត្តិទៅ ជាឱកាសដើម្បីពង្រីក និងពង្រឹងសមត្ថភាពចិញ្ចឹមតាមគ្រប់រូបភាព។ ត្រូវធ្វើការតាមដាននូវរាល់សកម្មភាពរបស់វារីវប្បករដែលនឹងយកកូនត្រីទៅចិញ្ចឹមនាថ្ងៃនេះ ធ្វើយ៉ាងណាឲ្យការចិញ្ចឹម ទទួលបានផលល្អ។ ព្រមជាមួយគ្នានេះ មន្ត្រីជំនាញរដ្ឋបាលជលផលត្រូវបន្តចុះជួយផ្សព្វផ្សាយ បណ្តុះបណ្តាលបន្ថែមលើការងារបច្ចេកទេសចិញ្ចឹម បង្កាត់ ភ្ញាស់កូន វិធីលាយផ្សំចំណី ការថែទាំ និងប្រសិទ្ធភាពសេដ្ឋកិច្ច ហើយត្រូវបង្កើនសកម្មភាពចុះចែកកូនត្រី កូនកង្កែប និងតង់ចិញ្ចឹម ដល់គ្រួសារដែលចង់ពង្រីកអាជីវកម្មបន្ថែម និងអ្នកដែលចង់ចាប់ផ្តើមចិញ្ចឹម។ សម្រាប់ថ្ងៃនេះ កសិករចំនួន ៥០គ្រួសារ គ្រួសារនីមួយៗទទួលបានកូនត្រីអណ្តែង ៧០០ក្បាល ចំណី ៤បាវ និងតង់ប្លា ស្ទិកចិញ្ចឹមត្រី ១។
ចេញពីកម្មវិធីចែកកូនត្រីអណ្តែង នៅជាប់កន្លែងកម្មវិធី លោករដ្ឋមន្ត្រី វេង សាខុង, លោកតំណាងរាស្ត្រ និងសហការី ក៏បានអញ្ជើញមកពិនិត្យស្រះចិញ្ចឹមត្រីឆ្តោ របស់លោក សុខ ភាព ជាលក្ខណគ្រួសារ រួចបន្តដំណើរមកក្នុងភូមិ ឃុំដដែល ដើម្បីពិនិត្យមើលការចិញ្ចឹមត្រីឆ្តោ របស់លោក លឹម ម៉េង ចិញ្ចឹមត្រីឆ្តោ ត្រីពោ ឆ្ពិន កាហែ ព្រួល ត្រីរៀល -ល-។
ជាលក្ខណៈគ្រសារ តាំងពីឆ្នាំ២០១៧ លើផ្ទៃដី១២ហិកតា ក្នុងស្រះចិញ្ចឹមធំៗចំនួន៣ហើយ ក្នុង១ឆ្នាំអាចរកចំណូលបានជាង៣ម៉ឺនដុល្លារ ដោយឡែកឆ្នាំទី១ និងទី២ ដោយសារខ្វះបទពិសោធន៍ និងដើមទុន ធ្វើឲ្យការចិញ្ចឹមត្រីរបស់គាត់គ្មានចំណូល។ បច្ចុប្បន្ន ដោយសារចំណូលខ្ពស់ កសិកររូបនេះទិញដីពង្រីកបន្ថែម ហើយថា នឹងពង្រីកផលិតកម្មចិញ្ចឹម ឲ្យបានច្រើនស្របតាមសេចក្តីត្រូវការរបស់ទីផ្សារ។
បច្ចុប្បន្ន តម្លៃត្រីគ្រប់ប្រភេទមានការធ្លាក់ចុះបន្តិច ប៉ុន្តែអាចទទួលយកបាន រឿងដែលសំខាន់គឺទុនវិនិយោគដែលខ្ចីពីធនាគារ ឬមីក្រូហិរញ្ញវត្ថុឯកជន មានការប្រាក់ខ្ពស់ ពេក នេះបើតាមម្ចាស់កសិដ្ឋានបានលើក ឡើង។ ពួកគាត់ទាំងពីរនាក់ សង្ឃឹម និងជឿជាក់អនាគតដ៏ខ្លី បន្ទាប់ពីស្ថានភាពជំងឺឆ្លងត្រឡប់ទៅរកស្ថានភាពប្រក្រតី ទាំងទីផ្សារ និងតម្លៃនឹងបានល្អប្រសើរជាបន្តបន្ទាប់ឡើងវិញ។
ពិនិត្យឃើញទិដ្ឋភាព និងសកម្មភាពចិញ្ចឹមត្រីទាំងពីរកន្លែងរួចមក លោករដ្ឋមន្ត្រី វេង សាខុន បានកោតសរសើរ និងវាយតម្លៃខ្ពស់ ចំពោះការខិតខំប្រឹងប្រែង ប្រកាន់យករបរចិញ្ចឹមត្រី ដើម្បីចូលរួមចំណែកបំពេញសេចក្តីត្រូវការទីផ្សារក្នុងខេត្ត ដើម្បីកាត់បន្ថយការនាំចូល។
បើទោះជាតម្រូវការទីផ្សារ និងតម្លៃមានការធ្លាក់ចុះបន្តិចក្តី លោករដ្ឋមន្ត្រី វេង សាខុន បានលើកទឹកចិត្តឲ្យពួកគាត់បន្តរក្សាមុខរបរនេះ រង់ចាំស្ថានភាពល្អប្រសើរឡើងវិញ ពីព្រោះនេះ គឺជាអាជីពយ៉ាងរឹងមាំ និងជាប្រភពចំណូលក្នុងគ្រួសារ យើងមានបទពិសោធន៍ និងចុះទុនវិនិយោគជាច្រើន ដូច្នេះត្រូវអត់ធ្មត់ តស៊ូរង់ចាំឱកាសល្អវិញ។
ឆ្លៀតយកឱកាសនេះ លោកបានណែនាំឲ្យរដ្ឋបាលជលផល និងមន្ទីរកសិកម្ម រុក្ខាប្រមាញ់ និងនេសាទខេត្ត ជំរុញបន្ថែមការងារបច្ចេកទេស ផលិតចំណី បង្កាត់ពូជ និងទីផ្សារ។ នៅក្នុងស្ថានភាពល្អប្រសើរ គួរជួយរៀបចំផែនការផលិតកម្ម និងអនុវត្តបច្ចេកទេស បានត្រឹមត្រូវដើម្បីធានានិរន្តរភាពនៃការផ្គត់ផ្គង់ និងគួរពង្រីកផលិតកម្ម លើផ្ទៃដីដែលមានស្រាប់។
មន្ទីរគួររៀបចំគោលនយោបាយពង្រីកផលិតកម្មបន្លែ និងចិញ្ចឹមត្រី ដើម្បីប្រែក្លាយខេត្តកណ្តាលជាប្រភព ផ្គត់ផ្គង់ស្បៀង (បន្លែ និងត្រី) ដោយនិរន្តរភាពសម្រាប់រាជធានីភ្នំពេញ នាពេលអនាគត៕ដោយ៖កូឡាប
