ភ្នំពេញ៖ អគ្គនាយកដ្ឋានគយ និងរដ្ឋាករកម្ពុជា នៅថ្ងៃទី៧ ខែកញ្ញា ឆ្នាំ២០២០នេះ បានចេញសេចក្តីជូនដំណឹង ជម្រាបមកលោក លោកស្រីប្រធាននាយកដ្ឋាន សាខា និងការិយាល័យគយនិងរដ្ឋាករក្នុងកម្មវត្ថុ ការកំណត់ជាបណ្ដោះអាសន្ននូវមាត់ច្រក សម្រាប់ការនាំចូលមុខទំនិញស្រា និងបារីគ្រប់ប្រភេទ ដោយយោងតាមយុទ្ធសាស្ត្រកៀរគរចំណូល ២០១៩-២០២៣ របស់រាជរដ្ឋាភិបាល និងផែនការសកម្មភាពឆ្នាំ២០២០ របស់អគ្គនាយកដ្ឋានគយនិងរដ្ឋាករកម្ពុជា។
លិខិតរបស់លោក គុណ ញឹម ប្រតិភូរាជរដ្ឋាភិបាលទទួលបន្ទុកជាអគ្គនាយក នៃអគ្គនាយកដ្ឋានគយ និងរដ្ឋាករកម្ពុជា បានបញ្ជាក់ថា ដើម្បីពង្រឹងប្រសិទ្ធភាព នៃការប្រមូលចំណូលពន្ធ និងអាករលើមុខទំនិញដែលមានវេទយិតភាពលើចំណូល និងរួមចំណែកទប់ស្កាត់អំពើរត់គេចពន្ធ អគ្គនាយកដ្ឋានគយ និងរដ្ឋាករកម្ពុជាកំណត់ជាបណ្ដោះអាសន្ន នូវមាត់ច្រកនាំចូល សម្រាប់មុខទំនិញស្រា (ដែលមានជាតិអាល់កុលលើសពី១០%) និងបារី (ស្ថិតក្នុងទីតាំង ២៤,០២) គ្រប់ប្រភេទ ដូចខាងក្រោម៖
១៖ អនុញ្ញាតឱ្យនាំចូលតែតាមមាត់ច្រកកំពង់ផែអន្តរជាតិក្រុងព្រះសីហនុ កំពង់ផែអន្តរជាតិភ្នំពេញ និងអាកាសយានដ្ឋានអន្តរជាតិ លើកលែងតែការនាំចូលតាមរបបអគារលក់ទំនិញរួចពន្ធ។
២៖ ការនាំចូលតាមមាត់ច្រកព្រំដែនផ្សេងទៀត ត្រូវមានការអនុញ្ញាតជាមុនពីអគ្គនាយកដ្ឋានគយ និង រដ្ឋាករកម្ពុជា។
អគ្គនាយកដ្ឋានគយ បានបញ្ជាក់ថា ប្រធាននាយកដ្ឋាន សាខា និងការិយាល័យគយនិងរដ្ឋាករ ចាត់ចែងអនុវត្តតាមខ្លឹមសារនេះ ឲ្យមានប្រសិទ្ធភាពខ្ពស់ ចាប់ពីថ្ងៃទី១ ខែវិច្ឆិកា ឆ្នាំ២០២០ (គិតតាមកាលបរិច្ឆេទនៃការផ្ទៀងផ្ទាត់តម្លៃគិតពន្ធគយ) រហូតដល់មានការកំណត់ជាថ្មី៕
ដោយ៖កូឡាប