ភ្នំពេញ ៖ ព្រះសុមេធាធិបតី នន្ទ ង៉ែត សម្ដេច ព្រះសង្ឃនាយកនៃគណៈមហានិកាយ បានអំពាវនាវឲ្យប្រជាពុទ្ធបរិស័ទ ដែលមកចូលរួមកាន់បិណ្ឌ និងបុណ្យភ្ជុំបិណ្ឌ តាមវត្តអារាមទាំងអស់ ឲ្យបន្តនិងពង្រឹងការការពារជំងឺកូវីដ១៩ ដោយត្រូវអនុវត្តឲ្យបានខ្ជាប់ខ្ជួនតាវិធានការ ណែនាំរបស់ក្រសួងសុខាភិបាល។
ការអំពាវនាវរបស់សម្ដេចព្រះសង្ឃនាយក នន្ទ ង៉ែត ទៅកាន់ប្រជាពុទ្ធបរិស័ទដូចនេះ នៅក្នុងឱកាសនៃថ្ងៃកាន់បិណ្ឌទី៧ នៅវត្តបទុមវតី ស្ថិតនៅសង្កាត់ចតុមុខ ខណ្ឌដូនពេញ រាជធានីភ្នំពេញ នាថ្ងៃទី៩ ខែកញ្ញា ឆ្នាំ២០២០ ដែលជាវេណរបស់ឯកឧត្តមជា ចាន់តូ អគ្គទេសាភិបាលធនាគារជាតិនៃកម្ពុជា និង លោកជំទាវ រួមនឹងថ្នាក់ដឹកនាំ មន្ត្រី បុគ្គលិធនាគារជាតិនៃកម្ពុជា ចូលរួមកាន់ថ្ងៃបិណ្ឌទី៧នេះ។
ដោយឡែកសម្រាប់សម្ដេចព្រះពុទ្ធិជ័យ ឃឹម សន ព្រះប្រធានលេខាធិការដ្ឋាគណៈសង្ឃនាយក នៃព្រះរាជាណាចក្រកម្ពុជា បានមានសង្ឃដីកាថា ការគោរព្ធប្រតិបត្តិ និងការធ្វើបុណ្យទាននានា ពិសេសបុណ្យជាប្រៃណីរបស់ជាតិខ្មែរ គឺជាកិច្ចដ៏ប្រពៃណាស់ដែលត្រូវគោរពប្រតិបត្តិ ប៉ុន្តែនៅក្នុងកាលៈទេសៈនៃការរីករាលដាលនៃជំងឺកូវីដ១៩នេះ ការរក្សាគម្លាតសង្គម និងការអនុវត្តអនាម័យ ក៏ជាបញ្ហាចម្បង និងជាបញ្ហាអាទិភាពដែលត្រូវតែអនុវត្តជាប្រចាំ តាមការណែនាំរបស់ក្រសួងសុខាភិបាល។
សូមបញ្ជាក់ថា តាមរយៈបុណ្យកុសលកើតចេញពីបុណ្យកាន់បិណ្ឌនេះទី៧នេះ ឯកឧត្តមជា ចាន់តូ និងលោកជំទាវ ព្រមទាំងថ្នាក់ដឹកនាំ មន្ត្រី បុគ្គលិកធនាគារជាតិនៃកម្ពុជា មួយចំណែកបានឧទ្ទិសជូនដល់ជីដូន ជីតាមាតា បិតា និងញាតិការទាំង៧សណ្ដាន បានចែកឋាននោះមួយចំណែកទៀត ក៏បានឧទ្ទិសជូនចំពោះដល់ឌួងវិញ្ញាក្ខន្ខ នៃវីរៈយុទ្ធជន យុទ្ធនារី ស្នេហាជាតិគ្រប់ៗជំនាន់ ដែលបានបូជាអាយុជីវិត ដើម្បីបុព្វហេតុជាតិមាតុភូមិ និងបានឧទ្ទិសជូនដល់វិញ្ញាណក្ខន្ធប្រជាជានកម្ពុជា ដែលស្លាប់បាត់បង់ជីវិតក្នុងរបរប្រល័យពូជសាសន៍ ប៉ុល ពត នោះផងដែរ ។
ទន្ទឹមនឹងនេះដែរ ឯកឧត្តម ជា ចាន់តូ និង លោកជំទាវ ក៏បានបួងសួងសូមឲ្យមនុញ្ញផលដែលកើតចេញទឹកសុទ្ធាជ្រះថ្លា នៃមហាកម្លាំងសាមគ្គីរបស់ថ្នាក់ដឹកនាំ និងមន្ត្រី បុគ្គលិធនាគារជាតិនៃកម្ពុជា នាឱកាសនេះ ផ្ដល់មកនូវសេចក្ដីសុខចម្រុងចម្រើន ដល់ថ្នាក់ជាន់ខ្ពស់ប្រទេសកម្ពុជា ប្រជាជននិងសូមឲ្យមាតុភូមិកម្ពុជា ជួបសន្តិភាពនិងមានសេចក្ដីសុខគ្រប់ប្រការ ព្រមទាំងទទួលបានការអភិវឌ្ឍរីកចម្រើនលើគ្រប់វិស័យ និងសម្បូររុងរឿង។
នៅក្នុងឱកាសនៃថ្ងៃកាន់បិណ្ឌទី៧នេះដែរ ឯកឧត្តមជា ចាន់តូ និងលោកជំទាវ បានវេបច្ច័យដែលកើតចេញពីទឹកចិត្ត ប្រកបដោយសុទ្ធារបស់ថ្នាក់ដឹកនាំ មន្ត្រីបុគ្គលិកធនាគារជាតិនៃកម្ពុជា ថ្វាយសម្ដេច ព្រះសុមេធាធិបតី នន្ទ ង៉ែត សម្រាប់ទ្រទ្រង់និងកសាងវត្តបទុមវតី និងបានប្រគេនទេយ្យវត្ថុ និងបច្ច័យដល់ព្រះសង្ឃក្នុងអារាមនេះផងដែរ៕
ដោយ៖CEN
