ភ្នំពេញ៖ ការផ្តន្ទាទោសស្ត្រីជាប់ចោទម្នាក់ឈ្មោះឃន ស្រីនាង អាយុ២៥ឆ្នាំ ជនជាតិខ្មែរ ធ្វើឡើងដោយចៅក្រមជំនុំជម្រះសាលាដំបូងរាជធានីភ្នំពេញ, លោកឯក ប៉ូលីហ្វីល នៅព្រឹកថ្ងៃទី១០ ខែកញ្ញា ឆ្នាំ២០២០នេះ បានប្រកាសសាលក្រមផ្តន្ទាទោស នៅចំពោះមុខជនជាប់ដាក់ពន្ធនាគារចំនួន២០ឆ្នាំ បទជួញដូរថ្នាំញៀន ប្រព្រឹត្តទៅនៅខណ្ឌទួលគោក រាជធានីភ្នំពេញ។
ក្នុងការសម្រេចនេះ តុលាការក៏បានពិន័យជនជាប់ជាប្រាក់ចំនួន ៤០លានរៀល (បង់ចូលថវិការដ្ឋ) ក្រោមការចោទប្រកាន់ពីបទជួញដូរដោយខុសច្បាប់ នូវសារធាតុញៀនតាមមាត្រា៤០ នៃច្បាប់ស្តីពីការត្រួតពិនិត្យគ្រឿងញៀន។ ប៉ុន្តែសាលក្រមតុលាការក៏បានទុកសិទ្ធិឲ្យជនជាប់ចោទរូបនេះក្នុងការប្តឹង ឧទ្ធរណ៍តាមកំណត់ច្បាប់ ប្រសិនមិនពេញនឹងការសម្រេចនេះ។
គួររំលឹកថា ជនជាប់ចោទត្រូវបានកម្លាំងសមត្ថកិច្ចមន្ទីរប្រឆាំងគ្រឿងញៀន ក៧ នៃអគ្គស្នង ការដ្ឋាននគរបាលជាតិ ឃាត់ខ្លួនកាលពីថ្ងៃទី២១ ខែមីនា ឆ្នាំ២០២០ នៅចំណុចទល់មុខផ្សារដើមគរ ផ្លូវម៉ៅសេងទុង សង្កាត់បឹងសាឡាង ខណ្ឌទួលគោក រាជធានីភ្នំពេញ ដោយដកហូតថ្នាំញៀន ប្រភេទមេតំហ្វេតាមីន(ICE) ចំនួន ៥៩៨,៨១ក្រាម ដោយមានការសម្របសម្រួលពី លោក គុជ គឹមឡុង ព្រះរាជអាជ្ញារង នៃអយ្យការអមសាលាដំបូងរាជធានីភ្នំពេញ៕ ដោយ៖ ឡេងបញ្ញាឬទ្ធិ
