ភ្នំពេញ៖ដោយពិនិត្យឃើញពីស្ថានភាពខ្វះខាតរបស់ប្រជាពលរដ្ឋ នៅសង្កាត់បឹងទំពុន១ ខណ្ឌមានជ័យ នៅព្រឹកថ្ងៃសុក្រ ទី១១ ខែកញ្ញា ឆ្នាំ២០២០ ឯកឧត្តម ស ថេត ប្រធានក្រុមការងារគណបក្សប្រជាជនកម្ពុជា ចុះជួយសង្កាត់បឹងទំពុនទី១ ខណ្ឌមានជ័យ បានអញ្ជើញជួបសំណេះសំណាល និងចែកអំណោយជូនដល់គ្រួសារក្រីក្រ នៅសង្កាត់បឹងទំពុន១ ចំនួន២១៦ គ្រួសារ ក្នុងពិធីនេះដែរ ក៏មានការចូលរួមពីឯកឧត្តម លោកជំទាវ លោក លោកស្រី អនុប្រធានក្រុមការងារ និងសមាជិក សមាជិកសមាជិការ នៃគណបក្សប្រជាជនចុះជួយសង្កាត់បឹងទំពុន១ ខណ្ឌមានជ័យ ។
ឯកឧត្តមប្រធានក្រុមការងារ បាននាំយកអំណោយមួយចំនួន ដើម្បីចែកជូនចៅសង្កាត់ ក្រុមប្រឹក្សាសង្កាត់ ប្រធានអនុប្រធានភូមិ ជាពិសេសប្រជាពលរដ្ឋក្រីក្រដែលខ្វះខាតជីវភាពចំនួន ២១៦គ្រួសារ ដោយក្នុងមួយគ្រួសារទទួលបានថវិកាចំនួន ១០០.០០០ (ដប់ម៉ឺនរៀល) អង្ករ២បេស្នើ១០០គីឡូក្រាម ទឹកក្រូច២កេស ទឹកសុទ្ធ២កេស មី១កេសតូច ត្រីខ១យួរ ទឹកត្រី១យួរ ប្រេងឆា១ដប ប៊ីចេង១កញ្ចប់ និងអំបិល១កញ្ចប់ ។
ក្នុងពិធីជួបសំណេះសំណាលនេះដែរ ឯកឧត្តម ស ថេត ប្រធានក្រុមការងារបាននាំយកការសួរសុខទុក្ខពីថ្នាក់ដឹកនាំគ្រប់លំដាប់ថ្នាក់ របស់គណបក្សប្រជាជនកម្ពុជា ដែលតែងតែយកចិត្តទុកដាក់ដល់សុខទុក្ខរបស់ប្រជាពលរដ្ឋ នៅពេលដែលប្រជាពលរដ្ឋមួយចំនួន ប្រឈមនឹងបញ្ហាជីវភាពក្នុងអំឡុងពេលពិភពលោកកំពុងជួបបញ្ហាវីរុសកូវីដ១៩ ។
ឯកឧត្តមប្រធានក្រុមការងារ បានណែនាំដល់ក្រុមការងារចុះជួយសង្កាត់បឹងទំពុនទី១ ទាំងអស់ឲ្យយកចិត្តទុកដាក់បន្ថែម ក្នុងការចុះជួបសួរសុខទុក្ខប្រជាពលរដ្ឋ ដើម្បីឲ្យបានដឹងច្បាស់ពីស្ថានភាព និងជីវភាពរស់នៅរបស់ប្រជាពលរដ្ឋ ក៏ដូចជាសិក្សាស្វែងយល់អំពីតម្រូវការ និងក្តីកង្វល់របស់ប្រជាពលរដ្ឋ ជាមួយនេះដែរ ឯកឧត្តមប្រធានក្រុមការងារបានណែនាំក្រុមប្រឹក្សាសង្កាត់ មន្ត្រីប៉ុស្តិ៍ទាំងអស់ ត្រូវផ្តល់សេវាសាធារណៈជូនប្រជាពលរដ្ឋឲ្យបានឆាប់រហ័ស ធានាការពារសន្តិសុខសុវត្ថិភាពឲ្យបានល្អ អោយបានល្អនិច្ច ឯកឧត្តមស្នងការក៏បានផ្តល់លេខទូរស័ព្ទរបស់ឯកឧត្តម ដល់ប្រជាពលរដ្ឋ ដើម្បីទាក់ទងផ្ទាល់នៅពេលមានបញ្ហាផ្សេងៗកើតមានឡើង ៕ដោយ៖មីដា ផាន់ណា
