បន្ទាយមានជ័យ៖ ព្រះសង្ឃជាច្រើនអង្គអង្គភូមិបឹងត្រស់ឃុំភ្នំតូចនៅស្រុកមង្គលបូរី ខេត្តបន្ទាយមានជ័យ បានផ្ទុះកើតរោគសញ្ញា គ្រុនក្តៅ ក្តៅញាក់ វិលមុខឈឺក្បាល និងពិបាកដកដង្ហើម ហើយចាំបាច់ត្រូវបានបញ្ជូនបន្ទាន់ទៅមន្ទីរពេទ្យខេត្តមិត្តភាពកម្ពុជា ជប៉ុនមង្គលបូរីខេត្តបន្ទាយមានជ័យ និងទៅមន្ទីរពេទ្យបង្អែកស្រុកថ្មគោលខេត្តបាត់ដំបង តាំងពីកាលពីម៉ោង៨និង៤៥នាទីយប់ ថ្ងៃទី ១៤ ខែ កញ្ញា ឆ្នាំ ២០២០ ។
លោករ័ត្ន ដាស៊ីណង់ អភិបាលស្រុកមង្គលបូរី ឲ្យដឹងកាលពីយប់ថ្ងៃទី១៤ខែកញ្ញាថា៖ មានព្រះសង្ឃចំនួន២៦អង្គ មានអការក្តៅព្រះកាយ ឈីក្បាលឬសង្ស័យផ្តាសសាយធំ ។
ក្នុងនោះ១៣អង្គ ត្រូវបញ្ជូនទៅគង់សម្រាកព្យាបាលនៅមន្ទីរពេទ្យមិត្តភាពជប៉ុន មង្គលបូរី និង១៣អង្គ គង់សម្រាកនៅមន្ទីរពេទ្យបង្អែកស្រុកថ្មគោលខេត្តបាត់ដំបង ។ ករណីនេះកើតហេតុនៅវត្តបឹងត្រស់ ភូមិត្រស់់ឃុំភ្នំតូច ស្រុកមង្គលបូរី បន្ទាយមានជ័យ។
ចំពោះជំនាញ លោកវេជ្ជបណ្ឌិតឡេ ច័ន្ទសង្វាត ប្រធានមន្ទីរសុខាភិបាលខេត្តបន្ទាយមានជ័យ ឲ្យដឹងកាលពីថ្ងៃទី១៤ខែកញ្ញាថា៖ នៅវត្តបឹងត្រស់ ស្ថិតនៅភូមិ បឹងត្រស់ ឃុំភ្នំតូច ស្រុកមង្គលបូរី គឺមានព្រះសង្ឃ ជាច្រើនអង្គ មានរោគសញ្ញា គ្រុនក្តៅ ក្តៅញាក់ វិលមុខឈឺក្បាល និងពិបាកដកដង្ហើម។ ទទួលព័ត៌មាន ពីសហការី ពីចៅអធិការ លោកបានបញ្ជាឲ្យ រថយន្តសង្គ្រោះបន្ទាន់ របស់មណ្ឌលសុខភាព អូរប្រាសាទ ចេញទៅដឹកព្រះសង្ឃមកព្យាបាលនៅមន្ទីរពេទ្យខេត្តមិត្តភាពកម្ពុជា ជប៉ុនមង្គលបូរី។
ជាលទ្ធផលបឋម នៅវត្តនេះ មានព្រះសង្ឃចំនួន៤៨អង្គ ហើយនៅថ្ងៃទី ១៣ មានព្រះសង្ឃ ចំនួន១៣អង្គមានអាពាធ ហើយ បានបញ្ជូន ទៅមន្ទីរពេទ្យបង្អែកថ្មគោល ។
ហើយ ករណីនេះ នៅតែរាលដាល ដល់ព្រះសង្ឃផ្សេងទៀត ទើបចៅអធិការ ស្វែងរកជំនួយអន្តរាគមន៍ ក្នុងសង្គ្រោះ បន្ទាន់ និងការព្យាបាល។
ក្រុមការងារមន្ទីរសុខាភិបាលខេត្តនិងលោកផ្ទាល់ បានចុះដឹកជញ្ជូន យកមកកាន់មន្ទីរពេទ្យខេត្ត មិត្តភាពមង្គលបូរី ដើម្បីពិនិត្យ និងព្យាបាល រួមទាំង ការត្រួតពិនិត្យជំងឺដទៃទៀត ៕
ដោយ ៖ បន្ទាយ
