ភ្នំពេញ៖ វាពុំមែនជារឿងចម្លែកទេដែលក្រុមអ្នកវាយប្រហារបង្កើតកម្មវិធីដែលមានមេរោគ ដើម្បីលួចយកទិន្នន័យពីអ្នកប្រើប្រាស់ ឬដើម្បីតាមដានក្រុមអ្នកប្រឆាំងណាមួយនោះ ប៉ុន្តែនៅពេលថ្មីៗនេះក្រុមហ៊ុនសុវត្ថិភាពបច្ចេកវិទ្យា Check Point បានរកឃើញក្រុមអ្នកវាយប្រហារដែលគេឱ្យឈ្មោះថា Rampant Kitten បានបង្កើតកម្មវិធី Android ដែលមានមេរោគដើម្បីលួចយកលេខកូដ 2FA (Two-factor Authentication) ពីក្នុងសារ។ នាយកដ្ឋានប្រឆាំងបទល្មើសបច្ចេកវិទ្យា Anti Cyber Crime Department បានចេញផ្សាយព័ត៌មានយ៉ាងដូច្នេះនៅថ្ងៃទី២២ខែកញ្ញាឆ្នាំ២០២០។
ក្រុមហ៊ុន Check Point បានឱ្យដឹងថា ទោះបីជាក្រុមអ្នកវាយប្រហារនេះ កាលពីដើមឡើយបានបង្កើតកម្មវិធីមេរោគសម្រាប់តែប្រព័ន្ធប្រតិបត្តិការ Windows ប៉ុន្តែពេលនេះពួកគេបានប្រើវិធីសាស្ត្រដូចគ្នានេះដើម្បីបង្កើតកម្មវិធីមេរោគសម្រាប់ប្រព័ន្ធប្រតិបត្តិការ Android ដែលពួកគេអាចលួចយកបញ្ជីឈ្មោះ សារ ថតសំឡេងតាមរយៈម៉ៃក្រូហ្វូន និងបើកគេហទំព័រដែលមានមេរោគបានផងដែរ។
ក្រុមអ្នកស្រាវជ្រាវបានបញ្ជាក់ផងដែរថា កម្មវិធីមេរោគនេះ នឹងរង់ចាំស្ទាក់យកសារដែលចាប់ផ្ដើមជាមួយអក្សរ “G-” ដែលនេះគឺជាការសម្គាល់ថា ជាសារមានលេខកូដ 2FA ដែលបានផ្ញើមកពីក្រុមហ៊ុន Google ហើយបន្ទាប់មកកម្មវិធីនេះក៏ផ្ញើសារបន្តទៅឱ្យក្រុមអ្នកវាយប្រហារ។ ប៉ុន្តែអ្វីដែលជាការព្រួយបារម្ភកាន់តែខ្លាំងនោះគឺ កម្មវិធីមេរោគនេះអាចថែមទាំងទាញយកសារពីកម្មវិធីទំនាក់ទំនងសង្គមផ្សេងៗទៀតដូចជាកម្មវិធី Telegram ជាដើម។
បច្ចុប្បន្នក្រុមហ៊ុន Check Point បានប្រទះឃើញកម្មវិធីដែលមានផ្ទុកមេរោគនេះក្នុងកម្មវិធីមួយ ដែលបន្លំជាកម្មវិធីសម្រាប់ជួយអ្នកនិយាយភាសា Persian (ភាសាភាគខាងលិចប្រទេសអ៊ីរ៉ង់) ដើម្បីទទួលបានប័ណ្ណបើកបរនៅក្នុងប្រទេសស៊ុយអែត។ ទោះជាយ៉ាងណាពួកគេក៏បានព្រមានផងដែរថាកម្មវិធីមេរោគនេះអាចមាននៅក្នុងកម្មវិធីផ្សេងៗទៀតផងដែរ៕ដោយ៖កូឡាប
